ବିଜେଡ଼ି ପୋଡ଼ା ଟ୍ରାନ୍ସଫର୍ମର, ଏହାକୁ ଉପାଡ଼ି ଫୋପାଡ଼ି ଦିଅ : ଅମିତ୍‌ ଶାହା

ଆଜି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ପୁରୀରେ ଚାଲିଥିବା ଦୁଇଦିନିଆ ଜନଜାତି ରାଲିକୁ ସମ୍ବୋଧିତ କରିଛନ୍ତି  । ଏହି ପରିପ୍ରେକ୍ଷୀରେ ସେ ଉଭୟ ବିଜେଡି ଏବଂ କଂଗ୍ରେସ ଉପରେ ବର୍ଷିଛନ୍ତି । ଏହାସହ ନବୀନ ପଟ୍ଟନାୟକଙ୍କୁ ସେ କଟୁ ସମାଲୋଚନା କରିଛନ୍ତି ।  ବିଜେଡି କଂଗ୍ରେସର ବି ଟିମ କହିବା ସହିତ ଦୁହେଁ ଗୋଟିଏ ମୁଦ୍ରାର ଦୁଇ ପାର୍ଶ୍ବ ବୋଲି କହିଛନ୍ତି । କଂଗ୍ରେସ ଶାସନରେ ଓଡିଶାର ବିକାଶ କରିନଥିଲା କି ୧୯ ବର୍ଷରେ ନବୀନ ଓଡିଶାରେ ବିକାଶ କରୁ ନାହାନ୍ତି  ବୋଲି କହିଛନ୍ତି । ବିଜେଡ଼ିକୁ ପୋଡ଼ା ଟ୍ରାନ୍ସଫର୍ମର କହିବା ସହିତ ବିଜେଡ଼ିକୁ ଉପାଡ଼ି ଫୋପାଡ଼ି ଦେବାକୁ ଆହ୍ଵାନ ଦେଇଛନ୍ତି ଶ୍ରୀ ଶାହା ।

ପଦ୍ମଶ୍ରୀ ଫେରାଇବେ ଫିଲ୍ମ ନିର୍ମାତା ଅରିବାମ୍‌ ଶ୍ୟାମ ଶର୍ମା

ବରିଷ୍ଠ ମଣିପୁରୀ ଫିଲ୍ମନିର୍ମାତା ଅରିବାମ୍‌ ଶ୍ୟାମ୍‌ ଶର୍ମା ଭାରତ ସରକାରଙ୍କ ଦ୍ବାରା ପ୍ରଦତ୍ତ ପଦ୍ମଶ୍ରୀ ଉପାଧି ଫେରାଇଦେବାକୁ ନିଷ୍ପତ୍ତି ନେଇଛନ୍ତି । ୨୦୦୬ ମସିହାରେ ମଣିପୁରୀ ଫିଲ୍ମ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ତାଙ୍କୁ ଏହି ପୁରସ୍କାରରେ ସମ୍ମାନିତ କରାଯାଇଥିଲା । ଏହି ୮୨ ବର୍ଷୀୟ କଳାକାର ଜଣକ ନାଗରିକତ୍ୱ ବିଧେୟକଙ୍କୁ ବିରୋଧ ପୂର୍ବକ ଏହି ସମ୍ମାନ ଫେରାଇବାକୁ ଚାହୁଁଛନ୍ତି ବୋଲି  କହିଛନ୍ତି । ୧୯୭୪ ମସିହାରେ ସେ ‘ଲମ୍‌ଜା ପର୍ଶୁରାମ’ ଫିଲ୍ମର ନିର୍ଦ୍ଦେଶନା ଦେଇଥିଲେ ।

ଜମ୍ମୁ କାଶ୍ମୀର ଗସ୍ତରେ ପ୍ରଧାନମନ୍ତ୍ରୀ ମୋଦି

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶ୍ରୀନଗର ଓ ଲେହ ଗସ୍ତ କରିଛନ୍ତି । ଏହି ଗସ୍ତ ସମୟରେ ସେ ଜମ୍ମୁ-କଶ୍ମୀରରେ ବିଭିନ୍ନ ଯୋଜନାର ଉଦ୍‌ଘାଟନ କରିଛନ୍ତି । ଜମ୍ମୁରେ ଏମ୍ସର ଶିଳାନ୍ୟାସ କରିବା ସହ କିଶୱାଡାରେ ୬୨୪ ମେଗାୱାଟର ଏକ ବିଦ୍ୟୁତ ପ୍ରକଳ୍ପର ଶିଳାନ୍ୟାସ କରିଛନ୍ତି । ଏହା ବ୍ୟତୀତ ଲଦାଖ ବିଶ୍ୱବିଦ୍ୟାଳୟର ଶୁଭାରମ୍ଭ, ଏହାସହ କିଛି ମଡେଲ ଡିଗ୍ରୀ କଲେଜ, ପ୍ରଫେସନାଲ କଲେଜ ଓ ମହିଳା ୟୁନିଭର୍ସିଟିର ମଧ୍ୟ ଆଧାରଶୀଳା ରଖିଛନ୍ତି । ଏହି ଗସ୍ତ ସମୟରେ ଜମ୍ମୁରେ ଅନୁଷ୍ଠିତ ଏକ ଜନସଭାରେ ମଧ୍ୟ ଉଦ୍‌ବୋଧନ ଦେଇଛନ୍ତି ।

କାଳିଆ ହିତାଧିକାରୀଙ୍କ ମେଧାବୀ ଛାତ୍ରଛାତ୍ରୀମାନଙ୍କୁ ମିଳିବ କାଳିଆ ଛାତ୍ରବୃତ୍ତି : ନବୀନ ପଟ୍ଟନାୟକ

କେନ୍ଦୁଝର ପଣ୍ଡାପଡାରେ ଆୟୋଜିତ ‘କାଳିଆ’ ସମାବେଶରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗଦେଇ ୬୬ କୋଟି ଟଙ୍କାର ୧୭ଟି ବିଭିନ୍ନ ଜନକଲ୍ୟାଣମୂଳକ ପ୍ରକଳ୍ପର ଉଦ୍‌ଘାଟନ କରିଛନ୍ତି । ସେଠାରେ ସେ ଆଉ ୨୧ କୋଟି ଟଙ୍କାର ୪୭ଟି ପ୍ରକଳ୍ପର ଶିଳାନ୍ୟାସ କରିଛନ୍ତି । ଏହାଛଡ଼ା ଜିଲ୍ଲାରେ ଶୁଦ୍ଧ ପାନୀୟ ଜଳ ଯୋଗାଣ ଲାଗି ୧୦୫୦ କୋଟି ଟଙ୍କାର ଏକ ପାନୀୟ ଜଳ ପ୍ରକଳ୍ପ ମଞ୍ଜୁର କରିଛନ୍ତି । ଏଥିସହ କେନ୍ଦୁଝର ମିଶନ ଶକ୍ତି ସମାବେଶରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କାଳିଆ ଛାତ୍ରବୃତ୍ତି ଯୋଜନାର ଘୋଷଣା ମଧ୍ୟ କରିଛନ୍ତି ।

ଥାନାରେ କୁକୁଡ଼ା

ମଧ୍ୟପ୍ରଦେଶ ଶିବପୁରୀ ଜିଲ୍ଲାରେ ୮ ମାସ ଶିଶୁ ପୁତ୍ରକୁ ଗୋଡ଼ ନଖରେ ରାମ୍ପୁଡ଼ି ଥିବା ଅଭିଯୋଗରେ ଗୋଟିଏ କୁକୁଡ଼ାକୁ ପୋଲିସ ଥାନା ଆସିବାକୁ ପଡ଼ିଛି । ପୁନମ୍‌ କୁଶୱାହ ନାମକ ଜଣେ ମହିଳା ପଡ଼ିଶା ଘର ପୋଷା କୁକୁଡ଼ା ତାଙ୍କ ଶିଶୁପୁତ୍ରକୁ ରାମ୍ପୁଡ଼ି ଥିବା ଅଭିଯୋଗ ଥାନାରେ କରିଥିଲେ । ପୂର୍ବରୁ ମଧ୍ୟ କୁକୁଡ଼ା ଏଭଳି କରିଥିବା ପୁନମ୍‌ ପୋଲିସକୁ କହିଥିଲେ । ଏହାପରେ ଥାନା ପକ୍ଷରୁ କୁକୁଡ଼ା ସମେତ ମାଲିକାଣୀ-ମାଲିକଙ୍କୁ ଥାନାକୁ ଡ଼କାଯାଇଥିଲା । କୁକୁଡ଼ାକୁ ଜଗିବେ ବୋଲି କୁକୁଡ଼ାର ମାଲିକାଣୀ-ମାଲିକ ଥାନାଧିକାରୀଙ୍କ ପ୍ରତିଶ୍ରୁତି ଦେବା ସହିତ ପୁନମ୍‌ଙ୍କୁ କ୍ଷମା ପ୍ରାର୍ଥନା କରିଛନ୍ତି ।

୪-୧ରେ ଦିନିକିଆ ସିରିଜ୍‌ କବ୍‌ଜା କଲା ଭାରତ

ୱେଲିଙ୍ଗ୍‌ଟନ୍‌ଠାରେ ଚାଲିଥିବା ୫ମ ତଥା ଅନ୍ତିମ ଦିନିକିଆ କ୍ରିକେଟ୍‌‌ ମ୍ୟାଚ୍‌ରେ ଭାରତ ୩୫ ରନ୍‌ରେ ନ୍ୟୁଜିଲାଣ୍ଡ୍‌କୁ ହରାଇଛି । ଭାରତ ପ୍ରଥମେ ବ୍ୟାଟିଂ କରି ୨୫୨ ରନ୍‌ରେ ଅଲ୍‌ ଆଉଟ୍‌ ହୋଇ ନ୍ୟୁଜିଲାଣ୍ଡ୍‌କୁ ୨୫୩ ରନ୍‌ର ଟାର୍ଗେଟ୍‌ ଦେଇଥିଲା । ଲକ୍ଷ୍ୟରନ୍‌ର ପିଛା କରି ନ୍ୟୁଜ୍‌ଲାଣ୍ଡ୍‌ ୨୧୭ ରନ୍‌ରେ ଅଲ୍‌ଆଉଟ୍‌ ହୋଇଯାଇଛି । ଭାରତ ପକ୍ଷରୁ ୟୁଜବେନ୍ଦ୍ର ଚହଲ୍‌ ସର୍ବାଧିକ ୩ଟି, ପାଣ୍ଡ୍ୟା ଓ ସାମି ୨ଟି ଲେଖାଏଁ ୱିକେଟ୍‌ ନେଇଛନ୍ତି । ଅମ୍ବାତି ରାୟୁଡୁ(୯୦)ଙ୍କୁ ମ୍ୟାନ୍‌ ଅଫ୍‌ ଦି ମ୍ୟାଚ୍‌ ଘୋଷଣା କରାଯାଇଛି ।

ଔପଚାରିକ ଭାବେ ବିଜେପିର ନିର୍ବାଚନ ପ୍ରଚାର ଆରମ୍ଭ : ସଂକଳ୍ପ ପତ୍ର ପାଇଁ ୧୦ କୋଟି ଜନତାଙ୍କ ରାୟ ମାଗିବ ବିଜେପି

ଲୋକସଭା ନିର୍ବାଚନକୁ ଆଖି ଆଗରେ ରଖି ବିଜେପି ଔପଚାରିକ ଭାବେ ପ୍ରଚାର ଅଭିଯାନ ଆରମ୍ଭ କରିଦେଇଛି । ବିଜେପି ଅଧ୍ୟକ୍ଷ ଅମିତ୍‌ ଶାହା ଓ ଗୃହମନ୍ତ୍ରୀ ରାଜନାଥ ସିଂହ ‘ଭାରତ କେ ମନ କୀ ବାତ୍‌, ମୋଦି କେ ସାଥ୍‌’ କାର୍ଯ୍ୟକ୍ରମରେ ଭାଗ ନେଇ ବିଜେପି ତା’ର ସଂକଳ୍ପ ପତ୍ରରେ ଡୋର ଟୁ ଡୋର  ଅଭିଯାନ ଆରମ୍ଭ କରିବ ବୋଲି ସୂଚନା ଦେଇଛନ୍ତି । ସଂକଳ୍ପ ପତ୍ର ପାଇଁ ବିଜେପିର କାର୍ଯ୍ୟକର୍ତ୍ତା ଆସନ୍ତା ୧ମାସ ମଧ୍ୟରେ ଦଶ କୋଟି ଲୋକଙ୍କର ରାୟ ଗ୍ରହଣ କରିବେ ବୋଲି ଅମିତ୍‌ ଶାହା ସୂଚନା ଦେଇଛନ୍ତି ।

 

ରାଇରଙ୍ଗପୁରରେ ନବୀନ ପଟ୍ଟନାୟକ : ୨୧ଟି ପ୍ରକଳ୍ପର କଲେ ଉଦ୍‌ଘାଟନ

ମୟୂରଭଞ୍ଜର ରାଇରଙ୍ଗପୁର ମହୁଲଡିହା ପଡ଼ିଆରେ ମିଶନ ଶକ୍ତି ସମାବେଶରେ ଯୋଗଦେଇ ୪୫ କୋଟି ଟଙ୍କା ମୂଲ୍ୟର ୨୧ଟି ପ୍ରକଳ୍ପର ଉଦ୍‌ଘାଟନ କରିଛନ୍ତି ମୁଖ୍ୟମନ୍ତ୍ରୀ । ଏହି ସମାବେଶରେ ମହିଳାମାନଙ୍କୁ ଉଦବୋଧନ ଦେବା ସହ ସ୍ବୟଂ ସହାୟକ ଗୋଷ୍ଠୀର ମହିଳାଙ୍କୁ ମିଶନ ଶକ୍ତି ଯୋଜନାରେ ୧୬ କୋଟି ଟଙ୍କାର ବିଭିନ୍ନ ସହାୟତା ପ୍ରଦାନ କରିଛନ୍ତି । ଆଉ ଏହାସହ ରାଇରଙ୍ଗପୁରବାସୀଙ୍କ ପାଇଁ ୩ଟି ବଡ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରାଇରଙ୍ଗପୁରରେ ସବଡିଭିଜନାଲ ହସ୍ପିଟାଲ ନିର୍ମାଣ ସହ ୧୦୦ ଶଯ୍ୟା ବିଶିଷ୍ଟ ଏହି ହସ୍ପିଟାଲଟି ପିପିପି ମୋଡରେ ନିର୍ମାଣ ହେବ । ରାଇରଙ୍ଗପୁରରେ ଜଣେ ଅତିରିକ୍ତ ଜିଲ୍ଲାପାଳ ରହିବା ସହ କ୍ରୀଡାର ବିକାଶ ପାଇଁ ଷ୍ଟାଡିୟମ ନିର୍ମାଣ କରାଯିବ ବୋଲି କହିଛନ୍ତି ନବୀନ ।

ପୁଣି ଥରେ ସଲ୍ଲୁଙ୍କ ସହ ଠୁମ୍‌କା ଲଗାଇବେ କରୀନା

ଭାଇଜାନ୍‌ ସଲମନ୍‌ ଖାନ୍‌ ବହୁତ୍‌ ଶୀଘ୍ର ଫିଲ୍ମ ‘ଦବଙ୍ଗ୍‌ ୩’ର ଶୁଟିଂ କରିବାକୁ ଯାଉଥିବାର ଜଣାପଡିଛି । ଏବେ ଏହି ଫିଲ୍ମରେ  ନଜର ଆସିବେ କରୀନା କପୁର ଖାନ୍‌। କରୀନା ଏଥିରେ ଆଇଟମ୍‌ ନମ୍ବରରେ ଠୁମ୍‌କା ଲଗାଇବେ ବୋଲି ଶୁଣାଯାଉଛି। ଏହି ଫିଲ୍ମରେ ଜଣାଶୁଣା କୋରିଓଗ୍ରାଫର୍‌ ତଥା ନିର୍ଦ୍ଦେଶକ ପ୍ରଭୁଦେବା ନିର୍ଦ୍ଦେଶନା ଦେବେ ବୋଲି ଜଣାପଡିଛି । କରୀନା ନିକଟରେ ଫିଲ୍ମର ନିର୍ଦ୍ଦେଶକ ପ୍ରଭୁଦେବା ଓ ପ୍ରଯୋଜକ ଅରବାଜ ଖାଁଙ୍କୁ ସାକ୍ଷାତ କରିଥିବା ଜଣାଯାଇଛି । ‘ଦବଙ୍ଗ୍‌-୨’ରେ ମଧ୍ୟ କରୀନାଙ୍କ ଆଇଟମ୍‌ ସଙ୍ଗ୍‌ ରହିଥିଲା ।

ଯୋଗୀଙ୍କୁ ମିଳିଲା ନାହିଁ ଦିଦିଙ୍କ ଅନୁମତି

ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ପଶ୍ଚିମବଙ୍ଗରେ ରାଲି କରିବାର ଅନୁମତି ମିଳିଲା ନାହିଁ । ରବିବାର ଦିନ ଏହି ରାଲି କରିବାର କାର୍ଯ୍ୟକ୍ରମ ଥିଲା। ହେଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜି ଏହାକୁ ଅନୁମତି ନ ଦେବାରୁ ଯୋଗୀଙ୍କ ରାଲିକୁ ସ୍ଥଗିତ ରଖାଯାଇଛି। ଯୋଗୀଙ୍କ ହେଲିକ୍ୟାପ୍ଟର ଲ୍ୟାଣ୍ଡିଂ ପାଇଁ ମଧ୍ୟ ଅନୁମତି ମିଳିନାହିଁ ।  ପୂର୍ବ ସୂଚନା ବିନା ଯୋଗୀ ପଶ୍ଚିମବଙ୍ଗରେ ରାଲି କରିପାରିବେ ନାହିଁ ବୋଲି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି । ସୂଚନାଯୋଗ୍ୟ, ପଶ୍ଚିମବଙ୍ଗରେ ଭାଜପା ଶହେ ରାଲି ପାଇଁ ଯୋଜନା କରିଛି।

ବିଏସପିରେ ମିଶିଲେ ସଗରିଆ

ବହୁଜନ ସମାଜବାଦୀ ପାର୍ଟିରେ ଯୋଗ ଦେଲେ ପୂର୍ବତନ ବିଧାୟକ କୃଷ୍ଣ ସଗରିଆ । ଲୋୟର ପିଏମଜିରେ ଆୟୋଜିତ ଏକ ଜନସଭାରେ ବିଏସପିରେ ଆନୁଷ୍ଠାନିକ ଭାବେ ଯୋଗ ଦେଇଛନ୍ତି ସଗରିଆ । କିଛି ମାସ ପୂର୍ବରୁ ବିଧାୟକ ପଦରୁ ଇସ୍ତଫା ଦେଇଥିଲେ କୃଷ୍ଣ ।  ଗତମାସରେ ଦଳ ବିରୋଧୀ କାର୍ଯ୍ୟ ପାଇଁ କଂଗ୍ରେସ ଦଳରୁ ବହିଷ୍କୃତ ହୋଇଥିଲେ । କୃଷ୍ଣଙ୍କ ସହ ତାଙ୍କର ସମର୍ଥକମାନେ ମଧ୍ୟ ବିଏସପିରେ ଯୋଗ ଦେଇଛନ୍ତି । ବିଏସପି ସୁପ୍ରିମୋ ମାୟାବତୀଙ୍କ ପ୍ରତିନିଧଙ୍କ ଉପସ୍ଥିତିରେ ଏହି ମିଶ୍ରଣ ପର୍ବ ଅନୁଷ୍ଠିତ ହୋଇଛି ।

ଡ୍ୟାନ୍ସ ପ୍ଲସ୍‌ ୪ର ବିଜେତା ହେଲେ ଚେତନ ସାଲୁଙ୍ଖେ

ପୁନେର ୧୯ ବର୍ଷୀୟ ବାଳକ ଚେତନ ସାଲୁଙ୍ଖେ ଲୋକପ୍ରିୟ ରିଅଲିଟି ଶୋ’ ‘ଡ୍ୟାନ୍ସ ପ୍ଲସ୍‌ ୪’ର ବିଜେତା ହୋଇଛନ୍ତି । ଚେତନଙ୍କ ପିତା ଜଣେ ଦିନ ମଜୁରିଆ ହୋଇଥିବାବେଳେ ତାଙ୍କ ମା’ ଜଣଙ୍କ ଘରେ କାମ କରିଥା’ନ୍ତି । ସେ ନିଜ ପ୍ରଚେଷ୍ଟାରେ ନୃତ୍ୟ ଶିଖିଛନ୍ତି ।  ମେଣ୍ଟର୍‌ ପୁନିତ୍‌ଙ୍କ ଟିମ୍‌ର ଚେତନ୍‌ ତାଙ୍କ ନୃତ୍ୟକୁ ନେଇ ସେ ଶୋ’ରେ ‘ପପିଙ୍ଗ୍‌ ବାଦଶାହା’ରେ ନାମରେ ନାମିତ ହୋଇଛନ୍ତି । ଫାଇନାଲ୍‌ରେ ଚେତନ୍‌ ଅନ୍ତରାର୍ଷ୍ଟ୍ରୀୟ ନୃତ୍ୟ ଶିଳ୍ପୀ ମାର୍କୋଜ୍‌ ସ୍କଟ୍ ଙ୍କ ସହ ନୃତ୍ୟ ପ୍ରଦର୍ଶନ କରିଥିଲେ ।  ସେ ଟାଇଟଲ୍‌ ସହିତ ୨୫ ଲକ୍ଷଟଙ୍କା ଅର୍ଥରାଶି ଜିତିଛନ୍ତି ।

ଭିସା ନିୟମ ଉଲ୍ଲଂଘନ : ଶ୍ରୀଲଙ୍କାରେ ୭୩ ଭାରତୀୟ ଗିରଫ

ଶ୍ରୀଲଙ୍କାରେ ବିଭିନ୍ନ କମ୍ପାନୀ ଓ ଅନୁଷ୍ଠାନରେ କାର୍ଯ୍ୟ କରୁଥିବା ୭୩ ଜଣ ଭାରତୀୟ ଗିରଫ ହୋଇଛନ୍ତି। ଏମାନଙ୍କୁ ଶ୍ରୀଲଙ୍କା ପ୍ରଶାସନ ଭିସା ନିୟମ ଉଲ୍ଲଙ୍ଘନ କରିଥିବା ଅଭିଯୋଗରେ ୭୩ଜଣ ଭାରତୀୟଙ୍କୁ ଗିରଫ କରିଛି। ୪୯ ଜଣ ଭାରତୀୟଙ୍କୁ ମାଟୁଗାମା ସ୍ଥିତ ଏକ କାରଖାନାରୁ ଗିରଫ କରାଯାଇଛି। ଗତ ମାସରେ ଅନୁରୂପ କାରଣରୁ ୨୪ ଜଣ ଭାରତୀୟଙ୍କୁ ଗିରଫ କରାଯାଇଥିଲା। ଏମାନେ ଭିସା ଅବଧି ଶେଷ ହୋଇଯାଇଥିବା ସତ୍ତ୍ୱେ ବେଆଇନ୍‌ ଭାବେ ଶ୍ରୀଲଙ୍କାରେ ରହୁଥିଲେ। ଆବଶ୍ୟକ ଆନୁଷ୍ଠାନିକ ପ୍ରକ୍ରିୟା ସରିବା ପରେ ସମସ୍ତଙ୍କୁ ଭାରତ ପଠାଇ ଦିଆଯିବ ବୋଲି ଜଣାପଡ଼ିଛି।

ଅନୁରାଗଙ୍କ ଫିଲ୍ମରେ ସାନ୍ୟା

ନିର୍ଦ୍ଦେଶକ ଅନୁରାଗ ବସୁଙ୍କ ଆଗାମୀ ଫିଲ୍ମରେ ଅଭିନେତ୍ରୀ ସାନ୍ୟା ମାଲହୋତ୍ରା ନଜର ଆସିବେ ।  ରହସ୍ୟ ତଥା ରୋମାଞ୍ଚକର ଏହି ଫିଲ୍ମରେ ବଲିଉଡ୍‌ର ବହୁ ଅଭିଜ୍ଞ କଳାକାର ସାମିଲ୍‌ ହୋଇଥିବାର ସୂଚନା ରହିଛି। ଟି-ସିରିଜ୍‌ ନିର୍ମାତା ଭୂଷଣ କୁମାରଙ୍କ ଦ୍ୱାରା ଏହି ଫିଲ୍ମ ନିର୍ମାଣ ହେଉଥିବା ବେଳେ ଏଥିରେ ଅଭିଷେକ ବଚ୍ଚନ, ରାଜକୁମାର ରାଓ, ଫତିମା ସାନା ଶେଖ୍‌, ଆଦିତ୍ୟ ରଏ କପୁର ଏବଂ ପଙ୍କଜ ତ୍ରିପାଠୀ ପ୍ରମୁଖ ଅଭିନୟ କରୁଛନ୍ତି। ଫିଲ୍ମର ଶୀର୍ଷକ ଚୂଡ଼ାନ୍ତ ହୋଇପାରିନଥିବାବେଳେ ଫିଲ୍ମଟି ସେପ୍ଟେମ୍ବର ମାସରେ ରିଲିଜ୍‌ ହେବ ବୋଲି ସୂଚନା ରହିଛି । ଏତଦ୍‌ବ୍ୟତୀତ ସାନ୍ୟା ରିତେଶ ବାତ୍ରାଙ୍କ ‘ଫଟୋଗ୍ରାଫ୍‌’ରେ ମଧ୍ୟ ଅଭିନୟ କରୁଛନ୍ତି । ଏଥିରେ ତାଙ୍କ ବିପକ୍ଷରେ ନୱାଜ୍‌ଉଦ୍ଦିନ୍‌ ସିଦ୍ଦିକି ନଜର ଆସିବେ ।

ବହୁତ୍‌ ଶୀଘ୍ର ପରଦାକୁ ଫେରିବେ ସୋନାଲି

ବଲିଉଡ୍‌ ନାୟିକା ସୋନାଲି ବେନ୍ଦ୍ରେ ତାଙ୍କ ପ୍ରଶଂସକମାନଙ୍କ ପାଇଁ ଖୁସି ଖବର ଆଣିଛନ୍ତି । ସେ ଖୁବ୍‌ଶୀଘ୍ର ବଡ ପରଦାକୁ ଫେରିବେ ବୋଲି ଜଣାପଡିଛି। ସୋସିଆଲ ମିଡିଆରେ ସବୁବେଳେ ଆକ୍ଟିଭ ରହୁଥିବା ଏହି ନାୟିକା  ନିକଟରେ ଏକ ଫଟୋ ଶେୟାର କରିବା ସହ ଏକ ଇମୋସନାଲ୍‌ ବାର୍ତ୍ତା ଲେଖିଛନ୍ତି । ସେ ଏହି ବାର୍ତ୍ତାରେ ସେ ବହୁଦିନ ପରେ କ୍ୟାମେରାକୁ ସାମ୍ନା କରିବାକୁ ଯାଉଛନ୍ତି ବୋଲି କହିଛନ୍ତି ।  ଏଥରର ଅଭିନୟ ତାଙ୍କ ପାଇଁ ସମ୍ପୂର୍ଣ୍ଣ    ସ୍ଵତନ୍ତ୍ର ବୋଲି ସେ କହିଛନ୍ତି। ସୂଚନାଯୋଗ୍ୟ, ନିକଟରେ ସୋନାଲି ବିଦେଶରେ  କ୍ୟାନସରର ଚିକିତ୍ସା କରି ମୁମ୍ବାଇ ଫେରିଛନ୍ତି।

୬୭ ବର୍ଷରେ ପଦାର୍ପଣ କଲେ ଦିପ୍ତୀ

ବଲିଉଡ୍‌ ଅଭିନେତ୍ରୀ ଦିପ୍ତୀ ନଭାଲ ରବିବାର ୬୭ ବର୍ଷରେ ପଦାର୍ପଣ କରିଛନ୍ତି । ସେ ୧୯୫୨ ଫେବୃୟାରୀ ୩ରେ ପଞ୍ଜାବର ଅମୃତସରଠାରେ ଜନ୍ମଗ୍ରହଣ କରିଥିଲେ । ପିଲାଟି ଦିନରୁ ଅଭିନୟ ନିଶା ତାଙ୍କୁ ବଲିଉଡ୍‌ ଟାଣିଆଣିଥିଲା ।  ୧୯୭୮ ମସିହାରେ ଶ୍ୟାମ ବେନଗଲ୍‌ଙ୍କ ଫିଲ୍ମ ‘ଜୁନୁନ୍‌’ ଜରିଆରେ ଫିଲ୍ମ ଇଣ୍ଡଷ୍ଟ୍ରିରେ ପାଦ ଥାପିଥିବା ଏହି ଅଭିନେତ୍ରୀ ଜଣକ ‘ଏକବାର୍‌ ଫିର୍‌’ରେ ଲିଡ୍‌ ଅଭିନେତ୍ରୀ ଭାବେ ନଜର ଆସିଥିଲେ । ସାଥ୍‌ ସାଥ୍‌, ଚଶମେ ବଦ୍ଦୁର,  ମିର୍ଚ୍ଚ୍ ମସାଲା, ଅଙ୍ଗୁର, ରଙ୍ଗ ବିରଙ୍ଗୀ ଆଦି ଫିଲ୍ମରେ ସେ ଅଭିନୟ କରି ଦର୍ଶକଙ୍କୁ ବେଶ୍‌ ଆକୃଷ୍ଟ କରିଥିଲେ । ୧୯୮୫ରେ ପ୍ରକାଶ ଝା’ଙ୍କୁ ବିବାହ କରିଥିଲେ । ରିଲ୍‌ ଲାଇଫ୍‌ରେ ଦର୍ଶକଙ୍କୁ ବାନ୍ଧି ରଖିଥିବା ଦିପ୍ତୀ ପ୍ରକାଶଙ୍କୁ ରିୟଲ ଲାଇଫ୍‌ରେ ବାନ୍ଧି ରଖିପାରି ନ ଥିଲେ । ୨୦୦୨ରେ ଉଭୟଙ୍କର ଛାଡ଼ପତ୍ର ହୋଇଥିଲା ।

ଭାରତ-ନ୍ୟୁଜିଲାଣ୍ଡ୍‌ ୫ମ ଦିନିକିଆ: ୨୫୨ରେ ଭାରତ ଅଲ୍‌ ଆଉଟ୍‌

ୱେଲିଙ୍ଗ୍‌ଟନ୍‌ଠାରେ ଚାଲିଥିବା ୫ମ ଦିନିକିଆ କ୍ରିକେଟ୍‌‌ ମ୍ୟାଚ୍‌ରେ ଭାରତ ୪୯. ୫ ଓଭର୍‌ ଖେଳି ୨୫୨ ରନ୍‌ରେ ଅଲ୍‌ ଆଉଟ୍‌ ହୋଇ ନ୍ୟୁଜିଲାଣ୍ଡ୍‌କୁ୨୫୩ ରନ୍‌ ଟାର୍ଗେଟ୍‌ ଦେଇଛି। ଅମ୍ବାତି ରାୟୁଡୁ ୧୧୩ଟି ବଲ୍‌ ଖେଳି ୯୦ ରନ୍‌ କରିଥିବାବେଳେ ହାର୍ଦ୍ଦିକ୍‌ ପାଣ୍ଡ୍ୟାଙ୍କ ୨୨ଟି ବଲ୍‌ ଖେଳି ୨ଟି ଚୌକା ଓ ୫ଟି ଛକା ସମେତ ସମୁଦାୟ ୪୫ ରନ୍‌ ସଂଗ୍ରହ କରିଛନ୍ତି।  ନ୍ୟୁଜିଲାଣ୍ଡର ଜେମସ୍‌ ହେନେରୀ ସର୍ବାଧିକ ୪ଟି ୱିକେଟ୍‌ ନେଇଥିବାବେଳେ ଟ୍ରେଣ୍ଟ୍‌ ବୋଲ୍ଟ ୩ଟି ଓ୍ବିକେଟ୍‌ ନେଇଛନ୍ତି ।

ସୀମାଞ୍ଚଳ ଏକ୍ସପ୍ରେସ୍‌ ଦୁର୍ଘଟଣା: ଅନୁକମ୍ପାମୂଳକ ସହାୟତା ରାଶି ଘୋଷଣା କଲେ ରେଳମନ୍ତ୍ରୀ

ବିହାରର ବୈଶାଳୀ ଜିଲ୍ଲା ଶାହାଜାଇବୁଜୁର୍ଗରେ ସୀମାଞ୍ଚଳ ଏକ୍ସପ୍ରେସର ୯ଟି ବଗି ଲାଇନଚ୍ୟୁତ ହୋଇ ୭ ଜଣଙ୍କ ମୃତ୍ୟୁ ଘଟିଥିବାବେଳେ ୨୯ଜଣ ଆହତ ହୋଇଥିବାର ସୂଚନା ରହିଛି ।  ବିହାରର ଯୋଗବାଣୀରୁ ନୂଆଦିଲ୍ଲୀ ଆନନ୍ଦ ବିହାର ଟର୍ମିନାଲକୁ ଯାଉଥିବା ସୀମାଞ୍ଚଳ ଏକ୍ସପ୍ରେସ ରବିବାର ରାତି ପ୍ରାୟ ୩ଟା ୫୨ରେ ଦୁର୍ଘଟଣାଗ୍ରସ୍ତ ହୋଇଥିଲା । ଦୁର୍ଘଟଣାରେ ମୃତ ବ୍ୟକ୍ତିଙ୍କ ନିକଟ ସମ୍ପର୍କୀୟଙ୍କୁ ୫ ଲକ୍ଷ ଟଙ୍କାର ଅନୁକମ୍ପାମୂଳକ ସହାୟତା ରାଶି, ଗୁରୁତର ଆହତ ହୋଇଥିବା ବ୍ୟକ୍ତିଙ୍କୁ ୧ ଲକ୍ଷ ଟଙ୍କା ଓ ଆହତ ହୋଇଥିବା ଯାତ୍ରୀଙ୍କୁ ୫୦ ହଜାର ଟଙ୍କାର ସହାୟତା ମିଳିବ ବୋଲି ରେଳମନ୍ତ୍ରୀ ଘୋଷଣା କରିଛନ୍ତି ।

ଓ୍ୱେଲିଂଟନରେ ଭାରତ-ନ୍ୟୁଜିଲାଣ୍ଡ ଶେଷ ଦିନିକିଆ

5ଟିକିଆ ଦିନିକିଆ ସିରିଜରେ ଶେଷ ମ୍ୟାଚରେ ମୁହାଁମୁହିଁ ହୋଇଛନ୍ତି ଭାରତ-ନ୍ୟୁଜିଲାଣ୍ଡ। ଏହି ମ୍ୟାଚ୍ ଭାରତ ପାଇଁ ବେଶୀ ଗୁରୁତ୍ୱ ରଖୁନାହିଁ। କାରଣ ଟିମ୍ ଇଣ୍ଡିଆ ଆଗୁଆ 3-1ରେ ସିରିଜ ବିଜୟୀ ହୋଇଛି। ଏହି ମ୍ୟାଚ୍ ଜିତିଲେ ସିରିଜକୁ ଶେଷ କରିବାକୁ ଚାହିଁବ ମେନ୍ ଇନ୍ ବ୍ଲ୍ୟୁ। ବିରାଟ କୋହଲିଙ୍କ ଅନୁପସ୍ଥିତିରେ ରୋହିତ ଶର୍ମାଙ୍କ ନେତୃତ୍ୱରେ ଖେଳୁଛି ଦଳ। ତେବେ ଗତ ମ୍ୟାଚର ତ୍ରୁଟି ସଜାଡ଼ିବାକୁ ପଡ଼ିବ। ସେପଟେ ଗତ ମ୍ୟାଚରେ ଟିମ୍ ଇଣ୍ଡିଆକୁ ମାତ ଦେଇଥିବାରୁ କିଓ୍ୱି ବାହିନୀର ମନୋବଳ ଦୃଢ଼ ରହିଛି। ସିରିଜ ହାତଛଡ଼ା କରିଥିଲେ ବି ମ୍ୟାଚ୍ ଜିତିବାକୁ ରଣନୀତି ସହ ମୈଦାନକୁ ଓହ୍ଲାଇଛି ଘରୋଇ ଦଳ।

ଆଜି ପାଟଣାରେ ରାହୁଲଙ୍କ ଜନ ଆକାଂକ୍ଷା ରାଲି

ପାଖାପାଖି ତିନି ଦଶନ୍ଧି ପରେ କଂଗ୍ରେସ ପାଟଣାର ଐତିହାସିକ ଗାନ୍ଧି ମୈଦାନରେ ନିର୍ବାଚନୀ ରାଲି କରୁଛି। ଜନ ଆକାଂକ୍ଷା ରାଲିରେ ଯୋଗ ଦେବେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି। ସେହିପରି ମଧ୍ୟପ୍ରଦେଶ ମୁଖ୍ୟମନ୍ତ୍ରୀ କମଲ ନାଥ, ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଓ ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବାଘେଲ ମଧ୍ୟ ସାମିଲ ହେବେ। ଏହି ଜନସଭାକୁ ମହାମେଣ୍ଟର ମଜଭୁତ ମଞ୍ଚ ବୋଲି କୁହାଯାଉଛି। ଏଥିରେ ଆରଜେଡି ନେତା ତେଜସ୍ୱୀ ଯାଦବ, ଆରଏଲଏସପି ମୁଖ୍ୟ ଉପେନ୍ଦ୍ର କୁଶଓ୍ୱାହ, ହାମ୍ ମୁଖ୍ୟ ଜିତନ ରାମ ମାଞ୍ଝି, ବିଆଇପି ନେତା ମୁକେଶ ସାହନୀ ମଧ୍ୟ ଜନ ଆକାଂକ୍ଷା ରାଲିରେ ଯୋଗ ଦେଇ ଲୋକଙ୍କୁ ସମ୍ବୋଧିତ କରିବେ।

ଥଣ୍ଡାରେ କମ୍ପୁଛି ଆମେରିକା, ଗଲାଣି ୨୯ ଜୀବନ

ଆମେରିକାରେ ଜାରି ରହିଛି ବରଫପାତ। ଅସହ୍ୟ ହୋଇଛି ଥଣ୍ଡା। ତାପମାତ୍ରା ମାଇନସ୍‌ ୩୦ ଡିଗ୍ରୀ ପାଖାପାଖି ରହିଥିଲା। ଫଳରେ ୨୯ ଜଣ ଲୋକଙ୍କର ଜୀବନ ନେଲାଣି ଥଣ୍ଡା। ତେବେ ଗତକାଲି ତାପମାତ୍ରାରେ ୧୭ଡିଗ୍ରୀ ସେଲସିୟସ୍‌ ବୃଦ୍ଧି ହୋଇଥିଲା। ଗତକାଲି ପାରଦ ଥିଲା ମାଇନସ୍‌ ୫ ଡିଗ୍ରୀ ସେଲସିୟସ୍‌। ସେଠାକାର ପାଣିପାଗ ବିଭାଗ କହିଛି, ସପ୍ତାହେ ଭିତରେ ତାପମାତ୍ରାରେ ଅଧିକ ସୁଧାର ଆସିବା ସମ୍ଭାବନା ରହିଛି। ରାସ୍ତାଘାଟ ଚାରିଆଡେ ଖାଲି ବରଫ ଆଉ ବରଫର ଆସ୍ତରଣ। ଘୋଡ଼େଇ ହୋଇଯାଇଛି ଟ୍ରେନ୍‌ ଲାଇନ୍‌।

ବିହାର ବୈଶାଳୀରେ ସୀମାଞ୍ଚଳ ଏକ୍ସପ୍ରେସ ଲାଇନଚ୍ୟୁତ, ୭ ମୃତ

ଆଜି ଭୋରରୁ ଦିଲ୍ଲୀ ଅଭିମୁଖେ ଯାଉଥିବା ସୀମାଞ୍ଚଳ ଏକ୍ସପ୍ରେସ ବିିହାର ବୈଶାଳୀ ଶାହାଜାଇବୁଜୁର୍ଗରେ ଲାଇନଚ୍ୟୁତ ହୋଇଛି । ଏଥିରେ ୭ ଜଣ ଯାତ୍ରୀଙ୍କର ମୃତ୍ୟୁ ହୋଇଛି । ଏଥି ସହ ଅନେକ ଆହତ ହୋଇଛନ୍ତି । ଟ୍ରେନର ମୋଟ ୯ଟି ବଗି ଲାଇନଚ୍ୟୁତ ହୋଇଛି । ବିହାର ଯୋଗବାଣୀରୁ ନୂଆଦିଲ୍ଲୀ ଆନନ୍ଦମାର୍ଗ ଟର୍ମିନାଲକୁ ଟ୍ରେନଟି ଯାଉଥିଲା ।

କୋଲକାତା ପୋଲିସ କମିଶନରଙ୍କୁ ଖୋଜୁଛି ସିବିଆଇ

ସିବିଆଇ ସ୍କାନରରେ କୋଲକାତା ପୋଲିସ କମିଶନର ରାଜୀବ କୁମାର । ଚିଟଫଣ୍ଡ ଦୁର୍ନୀତି ଲିଙ୍କରେ ତାଙ୍କୁ ଖୋଜା ଚାଲିଛି। ରୋଜଭ୍ୟାଲି ଓ ସାରଦା ଚିଟଫଣ୍ଡ ଲିଙ୍କରେ ତାଙ୍କୁ ପଚରାଉଚରା କରିବ ସିବିଆଇ। ଏହି ମାମଲାରେ କିଛି ଗୁରୁତ୍ୱପୂର୍ଣ୍ଣ ଦସ୍ତାବିଜ ଗାଏବ ହେବା ଘଟଣାରେ ତାଙ୍କୁ ଜେରା ହୋଇପାରେ। ସିବିଆଇ ପକ୍ଷରୁ ଜାରି ନୋଟିସର ବି କିଛି ଜବାବ ଦେଉ ନାହାନ୍ତି ରାଜୀବ କୁମାର। ଏପରିକି ତାଙ୍କୁ ଗିରଫଦାରୀ ନେଇ ଆଶଙ୍କା ବି ବଢ଼ିଛି। ଚିଟଫଣ୍ଡ ଦୁର୍ନୀତିର ତଦନ୍ତ ପାଇଁ ଗଠିତ ପଶ୍ଚିମବଙ୍ଗ ପୋଲିସର ସ୍ୱତନ୍ତ୍ର ତଦନ୍ତକାରୀ ଟିମ୍‌ ବା ଏସଆଇଟିର ନେତୃତ୍ୱ ନେଉଥିଲେ ରାଜୀବ କୁମାର।

ଆଜି ପୁଣି ଓଡ଼ିଶା ଆସୁଛନ୍ତି ଅମିତ ଶାହ, ପୁରୀରେ କାର୍ଯ୍ୟକ୍ରମ

ପୁରୀରେ ଚାଲିଥିବା ବିଜେପିର ରାଷ୍ଟ୍ରୀୟ ଅନୁସୂଚିତ ଜନଜାତି ମହାଧିବେଶନର ଆଜି ଦ୍ୱିତୀୟ ଦିନ। ଏଥିରେ ଯୋଗ ଦେବେ ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ। ଏଥିପାଇଁ ସେ ଆଜି ପୁଣି ଓଡ଼ିଶା ଆସୁଛନ୍ତି। ସପ୍ତାହେ ଭିତରେ ଏହା ତାଙ୍କ ଦ୍ୱିତୀୟ ଓଡ଼ିଶା ଗସ୍ତ। ଆଜି ମହାଧିବେଶନରେ ରାଜ୍ୟର ଆଦିବାସୀ ଅଧ୍ୟୁଷିତ ଅଞ୍ଚଳ ପାଇଁ ରଣନୀତି ପ୍ରସ୍ତୁତ କରିବ ବିଜେପି। ରାଜ୍ୟରେ ୧୪୭ଟି ବିଧାନସଭା କ୍ଷେତ୍ରରୁ ୩୪ଟି ସିଟ୍‌ ଅନୁସୂଚିତ ଜନଜାତି ଓ ୨୫ଟି ଆସନ ଅନୁସୂଚିତ ଜାତିଙ୍କ ପାଇଁ ସଂରକ୍ଷିତ ରହିଛି। ଏସବୁ ଆସନରେ ବିଜେପି କିଭଳି ୨୦୧୯ରେ ଭଲ ପ୍ରଦର୍ଶନ କରିବ ସେ ନେଇ ଦଳୀୟ ନେତାଙ୍କୁ ଗୁରୁମନ୍ତ୍ର ଦେବେ ଅମିତ।

ସିବିଆଇ ନିର୍ଦ୍ଦେଶକ ନିଯୁକ୍ତିକୁ ନେଇ ଉଠିଲା ପ୍ରଶ୍ନବାଚୀ

ସିବିଆଇ ନିର୍ଦ୍ଦେଶକ ନିଯୁକ୍ତି ହେବା ପରେ ଋଷି କୁମାର ଶୁକ୍ଳାଙ୍କୁ ନେଇ ମୁଣ୍ଡ ଟେକିଛି ବିବାଦ। ନିଯୁକ୍ତିକୁ ନେଇ ଆପତ୍ତି ଉଠାଇଛନ୍ତି କଂଗ୍ରେସ ନେତା ମଲ୍ଲିକାର୍ଜୁନ ଖଡଗେ। ସେ ସିଲେକସନ୍‌ କମିଟିର ସଦସ୍ୟ ଅଛନ୍ତି। ଏନେଇ ପ୍ରଧାନମନ୍ତ୍ରୀଙ୍କୁ ଚିଠି ଲେଖିଛନ୍ତି ମଲ୍ଲିକାର୍ଜୁନ ଖଡଗେ । ଉଲ୍ଲେଖ କରିଛନ୍ତି, ଦୁର୍ନୀତି ସମ୍ପର୍କୀତ ମାମଲାର ତଦନ୍ତରେ ତାଙ୍କର ଅଭିଜ୍ଞତା ନାହିଁ। ୧୯୮୩ ବ୍ୟାଚର ଆଇପିଏସ୍‌ ଅଫିସର ଋଷ କୁମାର ଶୁକ୍ଳା। ପୂର୍ବରୁ ମଧ୍ୟପ୍ରଦେଶ ଡିଜିପି ଥିଲେ। ସେ ଦୁଇ ବର୍ଷ ପାଇଁ ସିବିଆଇ ମୁଖ୍ୟ ପଦବୀରେ ରହିବେ  ।

ଆମେରିକାଠାରୁ ଅତ୍ୟାଧୁନିକ ଆସଲ୍ଟ ରାଇଫଲ୍‌ କିଣିବ ଭାରତ

ଭାରତୀୟ ସେନାକୁ ମିଳିବ ଅତ୍ୟାଧୁନିକ ଆସଲ୍ଚ ରାଇଫଲ୍‌। ଆମେରିକାଠାରୁ ୭ଶହ କୋଟି ଟଙ୍କାରେ ୭୩ ହଜାର ଆସଲ୍ଟ ରାଇଫଲ୍‌ କିଣିବ ଭାରତ। ଏନେଇ ସେନା ଦେଇଥିବା ପ୍ରସ୍ତାବକୁ ମଞ୍ଜୁରୀ ମିଳିଛି। ସମସ୍ତ ଅସ୍ତ୍ରଶସ୍ତ୍ରକୁ ଫାଷ୍ଟଟ୍ରାକ୍‌ ପେ୍ରାକୁ୍ୟରମେଣ୍ଟ ବା ଏଫଟିପି ମାଧ୍ୟମରେ କିଣାଯିବ। କୁହାଯାଉଛି, ଆମେରିକା ଦ୍ୱାରା ନିର୍ମାଣ କରାଯାଇଥିବା ଆସଲ୍ଟ ରାଇଫଲ୍‌ ଇନସାସ୍‌ ରାଇଫଲ୍‌ର ସ୍ଥାନ ନେବ। ପାକିସ୍ତାନ ଓ ଚୀନ ସୀମାରେ ନିୟୋଜିତ ଯବାନଙ୍କୁ ଦିଆଯିବ ଆସଲ୍ଟ ରାଇଫଲ୍‌।

ମହାରାଷ୍ଟ୍ର ସରକାରଙ୍କ ଘୋଷଣା, ସାମ୍ବାଦିକଙ୍କୁ ମିଳିବ ପେନସନ୍‌

ବରିଷ୍ଠ ସାମ୍ବାଦିକଙ୍କୁ ପେନସନ୍‌ ଦେବାକୁ ଘୋଷଣା କରିଛନ୍ତି ମହାରାଷ୍ଟ୍ର ସରକାର। ୬୦ବର୍ଷ ବୟସରୁ ଅଧିକ ଓ ୩୦ ବର୍ଷ କାମ କରିଥିବା ସାମ୍ବାଦିକମାନେ ଯୋଜନାର ସୁଫଳ ପାଇବେ। ସାମ୍ବାଦିକ, ଫଟୋଗ୍ରାଫର, ଖବରକାଗଜ ଓ ବ୍ରଡକାଷ୍ଟ ମିଡିଆର ସମ୍ପାଦକମାନଙ୍କୁ ଲାଭ ମିଳିବ। ଆଜୀବନ ମିଳିବ ପେନସନ୍‌ ସୁବିଧା। ତେବେ ମୁତ୍ୟୁ ପରେ ସେମାନଙ୍କ ପରିବାର ଲୋକଙ୍କୁ ଏ ସୁବିଧା ମିଳିବ ନାହିଁ। ଯୋଜନାର ଲାଭ ଉଠାଇବା ପାଇଁ ପ୍ରକୃତ ହିତାଧିକାରୀ ଜିଲ୍ଲା ସୂଚନା ଅଧିକାରୀଙ୍କ ନିକଟରେ ଆବଶ୍ୟକୀୟ ଦସ୍ତାବିତ ଦାଖଲ କରିବେ।

ଅନ୍‌ଲାଇନ୍‌ ସପିଂରେ ଆଉ ଶୀଘ୍ର ମିଳିବନି ଡେଲିଭରି

ଇ-କମର୍ସରେ ଲାଗୁ ହୋଇଛି ପ୍ରତ୍ୟକ୍ଷ ବିଦେଶୀ ପୁଞ୍ଜି ନିବେଶର ନୂଆ ନିୟମ। ଫଳରେ ଅନଲାଇନ ସପିଂରେ ପାଉଥିବା ଅନେକ ସୁବିଧା ଏବେ ହରାଇବେ ଗ୍ରାହକ। ନୂଆ ବ୍ୟବସ୍ଥା ଅନୁସାରେ ଏଣିକି ଡେଲିଭରି ପାଇଁ ୪-୭ ଦିନ ଅପେକ୍ଷା କରିବାକୁ ପଡ଼ିବ। ତାସହ ଏଥିପାଇଁ ଅଧିକ ଚାର୍ଜ ବି ଦେବାକୁ ପଡ଼ିବ। ନୂଆ ନିୟମର ଅଧିକ ପ୍ରଭାବ ପଡ଼ିଛି ଆମାଜନ୍‌ ଉପରେ। ଏଥିପାଇଁ ମୋବାଇଲ୍‌, ଇଲେକେ୍ଟ୍ରାନିକ୍ସ, ଗ୍ରୋସରୀ ଓ ଫ୍ୟାସନ୍‌ ସହିତ ବିଭିନ୍ନ ବର୍ଗରେ ବହୁ ଉତ୍ପାତକୁ ହଟାଇଛି ଆମାଜନ୍‌।

 

ଆଇସିସି ରାଙ୍କିଙ୍ଗ୍: ଏକ ନମ୍ବର ସ୍ଥାନରେ ସ୍ମୃତି ମାନ୍ଧାନା

ଭାରତୀୟ ମହିଳା କ୍ରିକେଟର ସ୍ମୃତି ମାନ୍ଧାନା ଆଇସିସି ରାଙ୍କିଙ୍ଗ୍ ରେ ଏକ ନମ୍ବର ବ୍ୟାଟ୍ସମ୍ୟାନ୍‌ ହୋଇଛନ୍ତି। ନ୍ୟୁଜିଲାଣ୍ଡ ବିପକ୍ଷରେ ଶତକ ଓ ୯୦ ରନ ଇନିଂସ ଖେଳିଥିଲେ ସ୍ମୃତି। ଏହାପରେ ୩ଟି ସ୍ଥାନ ଉପରକୁ ଉଠି ସେ ଏକ ନମ୍ବର ସ୍ଥାନରେ ରହିଛନ୍ତି। ସ୍ମୃତିଙ୍କୁ ମିଳିଛି ମୋଟ୍‌ ୭୫୧ ପଏଣ୍ଟ। ଚଳିତ ବର୍ଷ ସେ ଖେଳିଛନ୍ତି ୧୫ଟି ମ୍ୟାଚ୍‌। ଏହା ଭିତରେ ରହିଛି ୨ଟି ଶତକ ଓ ୮ଟି ଅର୍ଦ୍ଧଶତକ। ସେହିପରି ଆଇସିସି ରାଙ୍କିଙ୍ଗ୍ ଶ୍ରେଷ୍ଠ ୫ ଜଣଙ୍କ ମଧ୍ୟରେ ଅଛନ୍ତି ଭାରତୀୟ ମହିଳା ଟିମ ଅଧିନାୟିକା ମିତାଲି ରାଜ।

ଆନନ୍ଦଙ୍କ ଗିରଫକୁ ବେଆଇନ୍‌ କଲେ ପୁନେ ହାଇକୋର୍ଟ

ଭୀମା କୋରେଗାଓଁ ଘଟଣାରେ  ଆନନ୍ଦ ତେଲତୁମ୍ବଡେଙ୍କ ଗିରଫକୁ ବେଆଇନ୍‌ କହିଛି ପୁନେ ହାଇକୋର୍ଟ । ଭୀମା କୋରେଗାଓଁ ଘଟଣାରେ ସାମାଜିକ କର୍ମୀ ଆନନ୍ଦଙ୍କୁ ସକାଳ ୩ଟାବେଳ ସେ କୋଚିରୁ ମୁମ୍ବାଇ ବିମାନବନ୍ଦରରେ ପହଞ୍ଚିବା କ୍ଷଣି ତାଙ୍କୁ ପୁଲିସ୍‌ ଉଠାଇ ନେଇଥିଲା। ଏହି ଘଟଣାରେ ପୁନେ ହାଇକୋର୍ଟ ତାଙ୍କୁ ଖଲାସ କରିବା ପାଇଁ ଆଦେଶ ଦେଇଛନ୍ତି । ସୁପ୍ରିମ୍‌କୋର୍ଟଙ୍କ ଆଦେଶ ଅନୁସାରେ ଆନନ୍ଦ ୧୧ ଫେବୃଆରୀ ପର୍ଯ୍ୟନ୍ତ ଅନ୍ତରୀଣ ସୁରକ୍ଷା ପ୍ରାପ୍ତ କରିଛନ୍ତି । ଏହା ପୂର୍ବରୁ ତାଙ୍କୁ ଗିରଫ କରାଯିବା ନାହିଁ ବୋଲି ପୁନା ହାଇକୋର୍ଟ ଆଦେଶ ଦେଇଛନ୍ତି ।

ଥରିଲା ରାଜଧାନୀ ଦିଲ୍ଲୀ

ଭୂମିକମ୍ପ ଝଟକାରେ ଥରିଲା ଦେଶର ରାଜଧାନୀ । ଦିଲ୍ଲୀ-ଏନସିଆର ଅଞ୍ଚଳରେ ଭୂମିକମ୍ପ ଝଟକା ।  ରିକ୍ଟର ସ୍କେଲରେ ୬.୪ ତ୍ରୀବତାର ଭୂକମ୍ପର ଝଟକା ଦିଲ୍ଲୀ-ଏନସିଆରରେ ଅନୁଭୂତ ହୋଇଛି । ସୂଚନା ଅନୁଯାୟୀ, ଶନିବାର ଅପରାହ୍ନ ୫ଟା ୫୦ ମିନିଟ ସମୟରେ ଏହି ଭୂକମ୍ପ ଅନୁଭୂତ ହୋଇଛି । ଭୂକମ୍ପର କେନ୍ଦ୍ରସ୍ଥଳ ହିନ୍ଦୁକୁଶ ପର୍ବତମାଳା ବୋଲି ସୂଚନା ମିଳିଛି । ଏହାଛଡା ଦିଲ୍ଲୀର ଗାଜିଆବାଦରେ ମଧ୍ୟ ଭୂକମ୍ପର ହାଲକା ଝଟକା ଅନୂଭୂତ ହୋଇଛି ।

ଦିଦିଙ୍କ ଗଡ଼ରେ ମୋଦି

ପଶ୍ଚିମବଙ୍ଗର ଠାକୁରନଗରଠାରେ ଏକ ଭରପୁର ମଇଦାନରେ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ ସରକାର ଉପରେ ବର୍ଷିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଆସନ୍ତା ମେ ମାସରେ ଲୋକସଭା ନିର୍ବାଚନ ହେବାର ସମ୍ଭାବନା ରହିଥିବାରୁ ମୋଦି ଏବେଠାରୁ ନିର୍ବାଚନ ବିଗୁଲ ବଜାଇଥିବା ଚର୍ଚ୍ଚା ହେଉଛି। ମଇଦାନରେ ବିଶାଳ ଜନସମାବେଶ ଫଳରେ ଦଳା ଚକଟା ଆରମ୍ଭ ହେବାରୁ ମୋଦି ବାଧ୍ୟ ହୋଇ ତାଙ୍କ ଭାଷଣକୁ ମାତ୍ର ୧୪ ମିନିଟ୍‌ରେ ସାରିଥିଲେ ଏହି ସ୍ୱଳ୍ପ ସମୟର ଭାଷଣରେ ସେ ସିଟିଜେନ୍‌ଶିପ୍‌ ବିଲ୍‌ ସପକ୍ଷରେ କହିବା ସହିତ ଏହି ପ୍ରସଙ୍ଗକୁ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ ଦଳକୁ ରାଜ୍ୟସଭାରେ ସମର୍ଥନ ଦେବାକୁ ସେ ଆହ୍ୱାନ କରିଥିଲେ।

ଆଇପିଏସ୍‌ ଋଷି କୁମାର ଶୁକ୍ଳା ହେଲେ ସିବିଆଇର ନୂତନ ନିର୍ଦ୍ଦେଶକ

ମଧ୍ୟପ୍ରଦେଶ କ୍ୟାଡରର ୧୯୮୩ ବ୍ୟାଚ୍‌ର ଆଇପିଏସ୍‌ ଋଷି କୁମାର ଶୁକ୍ଳା ସିବିଆଇର ନୂତନ ଡାଇରେକ୍ଟର ଭାବେ ନିଯୁକ୍ତି ହୋଇଛନ୍ତି । ତାଙ୍କ କାର୍ଯ୍ୟକାଳ ୨ ବର୍ଷ ରହିବ । ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା ୩ ଜଣିଆ ଚୟନ କମିଟି ତାଙ୍କ ନାମକୁ ସ୍ଵୀକୃତି ଦେଇଛନ୍ତି । ଏହି କମିଟିରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେ ଓ ସୁପ୍ରିମକୋର୍ଟ ମୁଖ୍ୟବିଚାରପତି ରଞ୍ଜନ ଗୋଗୋଇ ସଦସ୍ୟ ଅଛନ୍ତି । ୨୪ ଦିନ ଧରି ସିବିଆଇ ନିର୍ଦ୍ଦେଶକ ପଦବୀ ଖାଲି ପଡ଼ିଥିବାରୁ ଏଥିରେ ଉଦବେଗ ପ୍ରକାଶ କରି ଗତକାଲି ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ଏ ବାବଦରେ ତତ୍କାଳ ପଦକ୍ଷେପ ନେବାକୁ କହିଥିଲେ ।

ସଲମାନ ୟୁସୁଫ ଖାନଙ୍କ ବିରୁଦ୍ଧରେ ଯୌନ ଉତ୍ପୀଡନ ଅଭିଯୋଗ

ବଲିଉଡର ଜଣାଶୁଣା କୋରିଓଗ୍ରାଫର ‘ଡାନ୍ସ ଇଣ୍ଡିଆ ଡାନ୍ସ’ ଶୋ’ର ଡାନ୍ସର ସଲମାନ ୟୁସୁଫ୍ ଖାନଙ୍କ ଉପରେ ଯୌନ ଉତ୍ପୀଡନ ମାମଲା ରୁଜୁ କରିଛନ୍ତି । ମୁମ୍ବାଇର ଓଶିୱାରା ପୁଲିସ ଷ୍ଟେସନରେ ରୁଜୁ କରାଯାଇଥିବା ମାମଲା ଅନୁସାରେ, ଓଶିୱାରାର ଏକ କଫି ହାଉସରେ ସଲମାନ ଜଣେ ଡ୍ୟାନ୍ସରଙ୍କ ସହିତ ଅସଦାଚରଣ କରିବାକୁ ଚେଷ୍ଟା କରିଥିଲେ । ଏହି ଅଭିଯୋଗ ପରେ ପୁଲିସଧାରା ୩୫୪ ଅଧିନରେ ମାମଲା ରୁଜୁ କରିଛି । ଆରୋପୀ ଜଣକ ସଲମନ୍‌ ତାଙ୍କୁ ବଲିଉଡ୍‌ରେ କାମ କରାଇବାର ପ୍ରତିଶ୍ରୁତି ଦେଇଥିଲେ ।

ପ୍ରେମର ବିଭିନ୍ନ ରୂପକୁ ଲୋକେ ଗ୍ରହଣ କରିବା ଦରକାର : ରେଗିନା

‘ଏକ ଲଡକି କୋ ଦେଖା ତୋ ଐସା ଲଗା’ର ଅଭିନେତ୍ରୀ ରେଗିନା କ୍ୟାସେଣ୍ଡ୍ରାଙ୍କ ମତରେ ଲୋକମାନେ ପ୍ରେମକୁ ଗୋଟିଏ ରୂପରେ ନ ବାନ୍ଧି ତା’ର ବିଭିନ୍ନ ରୂପକୁ ଗ୍ରହଣ କରିବା ଦରକାର । ପ୍ରେମୀଙ୍କୁ ବନ୍ଦୀ କରାଯାଇପାରିବ ନାହିଁ କି କୌଣସି ନିୟମରେ ବନ୍ଧାଯାଇ ପାରିବ ନାହିଁ । ସମଲିଙ୍ଗୀ ସମ୍ପର୍କ ଉପରେ ଆଧାରିତ ଏହି ଫିଲ୍ମରେ ରେଗିନା କୁହୁ ଚରିତ୍ରରେ ନଜର ଆସିଛନ୍ତି । ଫିଲ୍ମଟି ରିଲିଜ୍‌ ହୋଇ ଦଶର୍କୀୟ ସଫଳତା ଲାଭ କରିଛି । ଏହି ଫିଲ୍ମରେ ସୋନମ୍‌ କପୁର୍‌, ରାଜକୁମାର ରାଓ, ଅନୀଲ୍‌ କପୁର୍‌ ଓ ଜୁହୀ ଚାୱଲା ପ୍ରମୁଖ ଅଭିନୟ କରିଛନ୍ତି ।

ଭୀମା କୋରେଗାଁଓ ମାମଲାରେ ଜଡିତ ଆନନ୍ଦ ତେଲତୁମ୍ବଡେ ଗିରଫ

ବହୁ ଚର୍ଚ୍ଚିତ କୋରେଗାଁଓ ଏଲଗାର ପରିଷଦ ମାମଲାରେ ପୁଲିସ୍‌ ଆଜି ବରିଷ୍ଠ ସାମାଜିକ କର୍ମୀ ଆନନ୍ଦ ତେଲତୁମ୍ବଡେଙ୍କୁ ଗିରଫ କରିଛି । ଭୀମା କୋରେଗାଓଁ ହିଂସା ଘଟଣା ସହ ଏଲଗାର ପରିଷଦ ସଂପୃକ୍ତ ରହିଥିଲା ।  ଆନନ୍ଦ ମାଓବାଦୀଙ୍କ ସହ ମିଶି ୨୦୧୭ ମସିହା ଡିସେମ୍ବର ୩୧ରେ ପୁଣେଠାରେ ଏଲଗାର ପରିଷଦ ବୈଠକର ଆୟୋଜନ କରିଥିବା ଅଭିଯୋଗ ହୋଇଥିଲା । ଏଥିରେ ଦିଆଯାଇଥିବା ଉତ୍ତେଜନାମୂଳକ ଭାଷଣ ୨୦୧୮ ଜାନୁଆରୀ ୧ ତାରିଖରେ ହୋଇଥିବା ଭୀମା କୋରେଗାଓଁ ହିଂସା ସୃଷ୍ଟିର ମୂଳକାରଣ ରହିଥିଲା ।

ଶ୍ରୀକ୍ଷେତ୍ରରେ ବିଜେପିର ଦୁଇ ଦିନିଆ ଜନଜାତି ରାଷ୍ଟ୍ରୀୟ ମହାଧିବେଶନ

ପୁରୀରେ ବିଜେପି ଜନଜାତି ରାଷ୍ଟ୍ରୀୟ ମହା ଅଧିବେଶନ ଆରମ୍ଭ ହୋଇଛି। ଦୁଇ ଦିନ ଧରି ଚାଲିବାକୁ ଥିବା ଏହି ଅଧିବେଶନକୁ ବିଜେପି ଏସ୍‌ଟି ମୋର୍ଚ୍ଚା ଅଧ୍ୟକ୍ଷ ରାମବିଚାର ନେତମ୍ ଉଦ୍‌ଘାଟିତ କରିଛନ୍ତି। କେନ୍ଦ୍ର ଅଦିବାସୀ ବ୍ୟାପାର ମନ୍ତ୍ରୀ ଜୁଏଲ ଓରାମ୍, ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନେୱାଲ୍ ସହ ଦେଶର ପ୍ରମୁଖ ଆଦିବାସୀ ନେତା, ମନ୍ତ୍ରୀ, ବିଧାୟକ, ଜିଲ୍ଲା ପରିଷଦ ଅଧ୍ୟକ୍ଷ ଏହି ଅଧିବେଶନ୍‌ରେ ଯୋଗ ଦେଇଛନ୍ତି। ଆସନ୍ତାକାଲି ପୁରୀରେ ଆଦିବାସୀ ଅଧିକାର ସମାବେଶକୁ ବିଜେପି ରାଷ୍ଟ୍ରୀୟ ସଭାପତି ଅମିତ୍ ଶାହ ଉଦ୍‌ବୋଧନ ଦେବେ।

ସିମି ଉପରେ ଲାଗିଥିବା ନିଷେଧାଦେଶକୁ ଆଉ ୫ବର୍ଷ ବୃଦ୍ଧି କଲେ ସରକାର

ଦେଶ-ବିରୋଧୀ କାର୍ଯ୍ୟରେ ଲିପ୍ତ ରହୁଥିବାରୁ ‘ଷ୍ଟୁଡେଣ୍ଟ୍‌ସ୍‌ ଇସ୍‌ଲାମିକ୍‌ ମୁଭ୍‌ମେଣ୍ଟ୍‌ ଅଫ୍‌ ଇଣ୍ଡିଆ’ (ଏସ୍‌ଆଇଏମ୍‌ଆଇ)କୁ କେନ୍ଦ୍ର ସରକାର ଆଉ ପାଞ୍ଚ ବର୍ଷ ସକାଶେ ନିଷିଦ୍ଧ କରିଛନ୍ତି । ସମଗ୍ର ଦେଶରେ ଗୁଡ଼ାଏ ଆତଙ୍କବାଦୀ କାର୍ଯ୍ୟରେ ‘ସିମି’ ସମ୍ପୃକ୍ତ ଥିଲା । ଗୃହ ମନ୍ତ୍ରାଳୟ ଜାରି କରିଥିବା ବିଜ୍ଞପ୍ତିରେ ‘ସିମି’ର ବେଆଇନ କାର୍ଯ୍ୟକଳାପକୁ ତୁରନ୍ତ ଦମନ ଓ ନିୟନ୍ତ୍ରଣ କରିବା ପାଇଁ ‘ସିମି’କୁ ବେଆଇନ୍‌ ଘୋଷଣା କରି ଆଗାମୀ ୫ବର୍ଷ ଯାଏଁ ନିଷେଧାଦେଶକୁ କାଏମ ରଖିଛନ୍ତି ।  ଏହି ନିଷିଦ୍ଧାଦେଶ ଗୁରୁବାର ଠାରୁ କାର୍ଯ୍ୟକ୍ଷମ କରାଯାଇଛି ।

ରିସର୍ଚ୍ଚ ସ୍କଲାରସିପ୍‌ଙ୍କ ଫେଲାସିପ୍‌ ରାଶି ବୃଦ୍ଧି

ଉଚ୍ଚଶିକ୍ଷା ହାସଲ କରିବାକୁ ଚାହୁଁଥିବା ଛାତ୍ରଛାତ୍ରୀମାନଙ୍କ ପାଇଁ ଖୁସିଖବର । ମାନବ ବିକାଶ ମନ୍ତ୍ରାଳୟ (ଏମ୍‌ଏଚ୍‌ଆର୍‌ଡି) ଜିଆର୍‌ଏଫ୍‌ ଓ ଏସ୍‌ଆର୍‌ଏଫ୍‌ ବିଦ୍ୟାର୍ଥୀଙ୍କ ପାଇଁ ଫେଲାସିଫ୍‌ ରାଶି ବଢାଇଦେଇଛନ୍ତି । ମିଳିଥିବା ସୂଚନା ଅନୁସାରେ ଜୁନିଅର୍‌ ରିସର୍ଚ୍ଚ ଫେଲୋଶିପ୍‌ଙ୍କୁ ୨୫,୦୦୦ ପରିବର୍ତ୍ତେ ୩୧,୦୦୦ ଓ ସିନିଅର୍‌ ରିସର୍ଚ୍ଚ ଫେଲୋସିପ୍‌ ପାଇଁ ୨୮,୦୦୦ ପରିବର୍ତ୍ତେ ୩୫ ହଜାରଟଙ୍କା ମିଳିବ । ରିସର୍ଚ୍ଚ ସ୍କଲାର୍‌ଙ୍କ ଫଲୋସିପ୍‌ ରାଶିରେ ୮୦ ପ୍ରତିଶତ ବଢାଇବାର ଦାବି ରହିଥିଲା । ଫେଲାସିପ୍‌ ରାଶି ବଢିବାକୁ  ନେଇ ଅଲ୍‌ଇଣ୍ଡିଆ ରିସର୍ଚ୍ଚ ସ୍କଲାର୍‌ ଆସୋସିଏସନ୍‌, ଏନ୍ଆଇଟି ଓ ଆଇଆଇଟି ବିଦ୍ୟାର୍ଥୀମାନେ ବିକ୍ଷୋଭ ପ୍ରଦର୍ଶନ କରିଥିଲେ ।

ଚର୍ଚ୍ଚାରେ ପ୍ରିୟଙ୍କାଙ୍କ ଗାଉନ୍‌

ପ୍ରିୟଙ୍କା ଚୋପ୍ରା ନିଜ ଫ୍ୟାଶନ୍‌ ସେନ୍ସ୍‌ ପାଇଁ ସବୁବେଳେ ଚର୍ଚ୍ଚାରେ ରହି ଆସିଛନ୍ତି । ଏବେ ପୁଣି ଆଉ ଗୋଟିଏ ଦାମିକା ଗାଉନ୍‌ ପିନ୍ଧି ଚର୍ଚ୍ଚାକୁ ଆସିଛନ୍ତି ପ୍ରିୟଙ୍କା । ନିକଟରେ ପ୍ରିୟଙ୍କା ନିକ୍‌ ଜୋନସ୍‌ଙ୍କ ସହିତ ୱିଣ୍ଟର ଗାଲା ୨୦୧୯ ପାର୍ଟିରେ ଏକ ସୁନ୍ଦର ଗାଉନ୍‌ରେ ଉଭା ହୋଇଥିଲେ । ତାଙ୍କର ଏହି ଆଉଟ୍‌ଫିଟ୍‌ ବର୍ତ୍ତମାନ ଚର୍ଚ୍ଚାରେ । ୨୦୧୯ର ସ୍ପ୍ରିଙ୍ଗ୍‌ ଆର୍‌ଟିଡବ୍ଲ୍ୟୁ କଲେକସନ୍‌ର ଏହି ଦାମୀ ଗାଉନ୍‌କୁ ପିନ୍ଧିଥିଲେ ପ୍ରିୟଙ୍କା । ଏହି ଗାଉନ୍‌ର ଦାମ୍‌ ୧୧୪୧୦ ଡଲାର୍‌ ଅର୍ଥାତ୍‌ ଭାରତୀୟ ମୁଦ୍ରାରେ ୮ ଲକ୍ଷ ଟଙ୍କା । ପ୍ରିୟଙ୍କା ତାଙ୍କ ନୂଆ ହଲିଉଡ୍‌ ଫିଲ୍ମ ‘ଇସେଣ୍ଟ୍‌-ଇଟ୍‌-ରୋମାଣ୍ଟିକ୍‌’ ର ପ୍ରଚାର ପାଇଁ ନିକଟରେ ଏଲେନ୍ ଡିଜାଇନର୍ସ ଶୋ’ରେ ପହଞ୍ଚିଥିଲେ ।

ପ୍ରୟାଗରାଜ ସଙ୍ଗମସ୍ଥଳରେ ଓଲଟିଲା ଡଙ୍ଗା

ପ୍ରୟାଗରାଜରେ ଚାଲିଥିବା କୁମ୍ଭମେଳାରେ ଏକ ବଡ ଦୁର୍ଘଟଣା ଘଟିଛି । ଶନିବାର ସକାଳେ ସଙ୍ଗମରେ ଶ୍ରଦ୍ଧାଳୁଙ୍କୁ ନେଇ ଯାଉଥିବା ଏକ ଡଙ୍ଗା ବୁଡିଯାଇଥିବାର ଖବର ଆସିଛି । ସୂଚନାଯୋଗ୍ୟ,ଏହି ଡଙ୍ଗାରେ ୧୨ଜଣ  ଯାତ୍ରା କରୁଥିଲେ । ସଙ୍ଗମରେ ଡଙ୍ଗା ବୁଡିବାର ସୂଚନା ମିଳିବା ପରେ ଏନଡିଆରଏଫ୍ ଓ ବୁଡାଳିଙ୍କ ଏକ ଦଳ  ଘଟଣାସ୍ଥଳରେ ପହଞ୍ଚି  ଉଦ୍ଧାର କାର୍ଯ୍ୟରେ ଲାଗି ସମସ୍ତ ଶ୍ରଦ୍ଧାଳୁଙ୍କୁ ସୁରକ୍ଷିତ ଉଦ୍ଧାର କରିଥିବା ସୂଚନା ମିଳିଛି । ସମସ୍ତଙ୍କୁ ନିକଟସ୍ଥ ହସପିଟାଲରେ ଭର୍ତ୍ତି କରାଯାଇଛି ।

୪୦ ରେ ଶମିତା

ଲୋକପ୍ରିୟ ଅଭିନେତ୍ରୀ ଶିଳ୍ପା ସେଟ୍ଟି କୁନ୍ଦ୍ରାଙ୍କର ସାନ ଭଉଣୀ ଶମିତାଙ୍କର ଆଜି ହେଉଛି ୪୦ତମ ଜନ୍ମଦିବସ । ‘ମୋହବ୍ବତେଁ’ରୁ କ୍ୟାରିଅର୍‌ ଆରମ୍ଭ କରିଥିବା ଏହି ଅଭିନେତ୍ରୀ ଜଣକ କିନ୍ତୁ ବଲିଉଡ୍‌ରେ ତିଷ୍ଠି ପାରିନାହାନ୍ତି । ୨ଫେବୃଆରୀ ୧୯୭୯ରେ ମାଙ୍ଗଲୋରେର ଜନ୍ମିତ ଏହି ଅଭିନେତ୍ରୀ ଜଣକ ମଡେଲିଂରୁ କ୍ୟାରିୟର୍ ଆରମ୍ଭ କରିଥିଲେ ।  ନିଜର ବୋଲ୍ଡ ଲୁକ୍‌ ପାଇଁ ବେଶ୍‌ ଚର୍ଚ୍ଚାରେ ଥିବା ଏହି ଅଭିନେତ୍ରୀଜଣକ ମନୋଜ ବାଜପେୟୀଙ୍କ ସହ ସମ୍ପର୍କକୁ ନେଇ ବେଶ୍‌ ଚର୍ଚ୍ଚିତ ହୋଇଥିଲେ । ‘ଫରେବ୍‌’, ‘ଜହର୍‌’, ବେୱଫା’, ‘ମୋହବ୍ବତ ହୋ ଗଇ ହୈ ତୁମସେ’, ‘ହେ ବେବି’ ଆଦି ଫିଲ୍ମରେ କାମ କରିଥିବା ଏହି ଅଭିନେତ୍ରୀ ଜଣକ ନିକଟରେ କଲର୍ସର ଲୋକପ୍ରିୟ ରିଅଲିଟି ଶୋ’ ’ଖତ୍‌ରୋଁ କେ ଖିଲାଡ଼ି’ରେ ନଜର ଆସୁଛନ୍ତି ।

ବାଘ ପୁଣି ମହିଳାଙ୍କୁ ଶିକାର କଲା

ରାଜସ୍ଥାନର ସଓ୍ଵାଇ ମାଧୋପୁର ଜିଲ୍ଲାରେ ଜଣେ ୪୦ ବର୍ଷୀୟା ମହିଳାଙ୍କୁ ଗୋଟିଏ ବାଘ ଖଣ୍ଡିଆ ଖାବରା କରି ମାରି ପକାଇଛି । ସକାଳ ୬ଟା ବେଳେ ରନ୍ଥମ୍ବୋର ନ୍ୟାସ୍‌ନାଲ୍‌ ପାର୍କ ଅନ୍ତର୍ଗତ ପାଡ଼ଲି ଅଞ୍ଚଳର ଏକ ବିଲରେ ଘଟଣାଟି ଘଟିଛି । ପୀଡ଼ିତା ମୁନ୍ନୀ ଦେବୀ ବିଲରୁ ଶୌଚ ହୋଇ ଘରକୁ ଫେରୁଥିବା ବେଳେ ବାଘଟି ତାଙ୍କୁ ଆକ୍ରମଣ କରି ମାରି ପକାଇଥିଲା । ଗତବର୍ଷ ଡିସେମ୍ବର ୨୮ ତାରିଖରେ ମଧ୍ୟ ବାଘ ଜଣେ ୬୫ ବର୍ଷୀୟ ମହିଳାଙ୍କୁ ମାରି ପକାଇ ଥିଲା । ସମ୍ପ୍ରତି ରନ୍ଥାମ୍ବୋର ନ୍ୟାସ୍‌ନାଲ୍‌ ପାର୍କରେ ୭୦ଟି ବାଘ ଅଛନ୍ତି ।

ବାର୍‌ହା ଆକ୍ରମଣରେ ଶିଶୁକନ୍ୟାର ପାପୁଲି ଛିଡ଼ିଲା

ଖୋର୍ଦ୍ଧା ସଦର ଥାନା ଅନ୍ତର୍ଗତ ଦଧିମାଛଗାଡ଼ିଆ ନିକଟରେ ଆଜି ଏକ ଜଙ୍ଗଲୀ ବାରହା ଆକ୍ରମଣରେ ଜଣେ ଶିଶୁ କନ୍ୟା ଗୁରୁତର ଭାବେ ଆହତ ହୋଇଛନ୍ତି । ଶିଶୁ କନ୍ୟାଟିର ଡାହାଣ ହାତ ପାପୁଲି ସମ୍ପୂର୍ଣ୍ଣ ଛିଡି ଯାଇଛି । ଗୁରୁତର ଅବସ୍ଥାରେ ତାଙ୍କୁ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ମିଳିଥିବା ସୂଚନା ଅନୁଯାୟୀ, ଗଞ୍ଜାମ ଜିଲ୍ଲା ପାଟରାପାଲି ଗାଁର ଭିକାରୀ ନାୟକ ପରିବାର ସହିତ ଖୋର୍ଦ୍ଧା ଜିଲ୍ଲା ଦଧିମାଛଗାଡ଼ିଆ ଅଞ୍ଚଳରେ ରହିବା ସହିତ ସେଠାରେ ଏକ କ୍ରସରରେ କାର୍ଯ୍ୟ କରନ୍ତି । ଆଜି ସକାଳେ ତାଙ୍କ ଦେଢ଼ ବର୍ଷର ଶିଶୁ କନ୍ୟା ଖେଳୁଥିବାବେଳେଏକ ଜଙ୍ଗଲୀ ବାର୍‌ହା ବାହାରି ଆସି ଶିଶୁ କନ୍ୟାଟିକୁ ଆକ୍ରମଣ କରିଥିଲା ।

ବନ୍ଧୁକ ତିଆରି କାରଖାନା ଠାବ, ଜଣେ ଗିରଫ

ନୟାଗଡ଼ ଜିଲ୍ଲା ସଦର ଥାନା ଅନ୍ତର୍ଗତ ଗୋପୀନାଥପୁର ଗାଁରୁ ଗତକାଲି ବିଳମ୍ବିତ ରାତିରେ ପୁଲିସ ଏକ ବନ୍ଧୁକ ତିଆରି କାରଖାନାକୁ ଠାବ କରିବା ସହିତ ଏଥିରେ ସମ୍ପୃକ୍ତ ଜଣେ ଯୁବକଙ୍କୁ ଗିରଫ କରିଛି।  ସେଠାରୁ ୪ଟି ସିଙ୍ଗଲ ବୋର ବନ୍ଧୁକ, ଗୋଟିଏ ପିସ୍ତଲ ସହିତ ଗୁଳି, ଗୁଳି ତିଆରି ପାଇଁ ବାରୁଦ, ଅନ୍ୟ ବନ୍ଧୁକ, ଗୁଳି ତିଆରି ସରଞ୍ଜାମ ଜବତ କରିବା ସହିତ ସମ୍ପୃକ୍ତ ସୁଧୀରଙ୍କୁ ଗିରଫ କରିଥିଲେ। ତେବେ ସୁଧୀର ସହିତ ଅନ୍ୟ କେଉଁମାନେ ସମ୍ପୃକ୍ତ ଅଛନ୍ତି, ସେ ବିଷୟରେ ତଦନ୍ତ ଚାଲିଛି ।

ପୂର୍ବତନ ୟୁନିବାର୍ତ୍ତା ସାମ୍ବାଦିକ ତଥା ସମ୍ପାଦକ ବନାରସୀ ସିଂହଙ୍କ ଦେହାନ୍ତ

ପୂର୍ବତନ ୟୁନିବାର୍ତ୍ତା ସାମ୍ବାଦିକ ଏବଂ ସମ୍ପାଦକ ବନାରସୀ ସିଂହଙ୍କ ଦେହାନ୍ତ ତାଙ୍କୁ ୮୫ ବର୍ଷ ହୋଇଯାଇଛି ।  ସେ ଗତ ସପ୍ତହେ ଧରି ଅସୁସ୍ଥ ଥିଲେ ଏବଂ ଯୋଶୋଦା ହସ୍ପିଟାଲ ଗଜିଆବାଦ ରେ ଭର୍ତ୍ତି ହୋଇଥିଲେ । ୯ଜୁଲାଇ  ୧୯୩୩ ରେ ଉତ୍ତରପ୍ରଦେଶର ମୁଜାଫରନଗର ସ୍ଥିତ ଗୋଗାବାନ ଜାଲଲପୁର ଗାଁରେ ଏକ କୃଷକ ପରିବାରରେ ଜନ୍ମ ହୋଇଥିଲେ ବନାରସୀ । ସେ ୧୯୬୦ ରେ ବୀର ଅର୍ଜୁନ ସଂବାଦପତ୍ର ରୁ ସମ୍ବାଦିକତା ଆରମ୍ଭ କରିଥିଲେ ଏବଂ ଜରୁରୀକାଳୀନ ପରିସ୍ଥିତ ସମୟରେ ସ୍ଵାଧୀନ ଭାବେ କାମ କରିଥିଲେ । ପରେ ୧୯୮୨ ରେ ୟୁନିବାର୍ତ୍ତାରେ ଯୋଗ ଦେଇ ନ୍ୟୁଜ୍‌ ଏଡିଟର ଭାବେ ଅଗଷ୍ଟ ୧୯୯୩ରେ ଅବସର ନେଇ ଥିଲେ ।

ଆପୋଲୋ ହସ୍‌ପିଟାଲରେ ନିଆଁ

ଭୁବନେଶ୍ୱର ଆପୋଲୋ ହସ୍‌ପିଟାଲରେ ଆଜି ସକାଳେ ପ୍ରାୟ ୧୦ଟା ବେଳେ ହଠାତ୍‌ ନିଆଁ ଲାଗିଯାଇଥିଲା । ହସ୍‌ପିଟାଲର ୫ମ ମହଲାରେ ଥିବା ଆଇସିୟୁ ପାଖରେ ଏହି ନିଆଁ ଲାଗିଥିଲା ।  ସେଠାରେ ଥିବା ରୋଗୀମାନଙ୍କୁ ଅନ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ଅଗ୍ନିକାଣ୍ଡର କାରଣ ଜଣାପଡ଼ି ନ ଥିଲେ ମଧ୍ୟ ସର୍ଟ୍ ସର୍କିଟରୁ ଏହି ଅଗ୍ନିକାଣ୍ଡ ଘଟିଥିବା ଆଶଙ୍କା କରାଯାଉଛି । ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି । ସୂଚନାଯୋଗ୍ୟ ଯେ, ୨୦୧୭ ମସିହାରେ ଅଗ୍ନିକାଣ୍ଡ ଘଟି ସମ୍‌ ହସ୍‌ପିଟାଲରେ ମଧ୍ୟ ବହୁ ରୋଗୀଙ୍କ ମୃତ୍ୟୁ ଘଟିଥିଲା ।

 

ଆମେରିକାରେ ଗିରଫ ବିଦ୍ୟାର୍ଥୀଙ୍କୁ ସହାୟତା କରିବାକୁ ୨୪ ଘଣ୍ଟିଆ ହଟ୍‌ଲାଇନ୍‌ ଖୋଲିଲା ଭାରତୀୟ ଦୂତାବାସ

‘ପେ-ଆଣ୍ଡ୍‌-ଷ୍ଟେ’ ୟୁନିଭର୍ସିଟି ସ୍କାମ୍‌ରେ ସମ୍ପୃକ୍ତି ଅଭିଯୋଗରେ ଯୁକ୍ତରାଷ୍ଟ୍ର ଆମେରିକାରେ ଗିରଫ ହୋଇ ଥିବା ୧୨୯ ଜଣ ବିଦ୍ୟାର୍ଥୀଙ୍କୁ ଆବଶ୍ୟକ ଆଇନଗତ ସହାୟତା ଯୋଗାଇ ଦେବାକୁ ଭାରତୀୟ ଦୂତାବାସ ୨୪/୭ ହଟ୍‌ଲାଇନ୍‌ ଖୋଲିଛି  । ଯୁକ୍ତରାଷ୍ଟ୍ର ଆମେରିକାରେ ବେଆଇନ୍‌ ଭାବେ ରହିବାକୁ ଜାଲ୍‌ ୟୁନିଭର୍ସିଟିରେ ନାମ ଲେଖାଇ ଥିବା ୧୨୯ ଜଣ ଭାରତୀୟ ବିଦ୍ୟାର୍ଥୀଙ୍କୁ ଆମେରିକୀୟ କର୍ତ୍ତୃପକ୍ଷମାନେ ଗିରଫ କରିଛନ୍ତି । ଯୁକ୍ତରାଷ୍ଟ୍ର ଆମେରିକାସ୍ଥିତ ଭାରତୀୟ ଦୂତାବାସର ବରିଷ୍ଠ ଅଧିକାରୀମାନେ ୨୦୨-୩୨୨-୧୧୯୦ ଓ ୨୦୨-୩୪୦-୨୫୯୦ ଦୁଇଟି ହଟ୍‌ଲାଇନ୍‌ ନମ୍ବର ପରିଚାଳନା କରୁଛନ୍ତି ।

ଜଳ ସମ୍ପଦ ସଚିବ ଓ ମୁଖ୍ୟଯନ୍ତ୍ରୀଙ୍କ ବିରୋଧରେ ଗିରଫ ପରୱାନା ଜାରି

ରାଜ୍ୟ ପ୍ରଶାସନିକ ଟ୍ରିବ୍ୟୁନାଲର ଆଦେଶ କାର୍ଯ୍ୟକାରୀ କରିବାରେ ଅବହେଳା କରିଥିବାରୁ ଜଳ ସମ୍ପଦ ସଚିବ ଓ ମୁଖ୍ୟଯନ୍ତ୍ରୀଙ୍କ ବିରୋଧରେ ଗିରଫ ପରୱାନା ଜାରି କରାଯାଇଛି । ରାଜ୍ୟ ଜଳ ସମ୍ପଦ ବିଭାଗର ପ୍ରମୁଖ ସଚିବ ପ୍ରଦୀପ କୁମାର ଜେନା ଓ କ୍ଷୁଦ୍ର ଜଳ ସେଚନ ମୁଖ୍ୟଯନ୍ତ୍ରୀ ସରୋଜ କୁମାର ପଟ୍ଟନାୟକଙ୍କ ବିରୋଧରେ ଟ୍ରିବ୍ୟୁନାଲ ଜାମିନ ଯୋଗ୍ୟ ଗିରଫ ପରୱାନା ଜାରି କରିଛନ୍ତି । ୫ ହଜାର ଟଙ୍କା ବଣ୍ଡ ବିନିମୟରେ ଜାମିନଯୋଗ୍ୟ ପରୱାନା ଉଭୟଙ୍କ ବିରୋଧରେ ଜାରି ହୋଇଛି । ଏଥିସହ ଫେବୃଆରୀ ୭ ତାରିଖ ଦିନ ସ୍ୟାଟରେ ହାଜର ହେବା ଲାଗି ଉଭୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି ।

କ୍ରିଷ୍ଣା ସେନ୍‌ ବାୟୋପିକ୍‌ରେ ସ୍ଵରା ଭାସ୍କର

ବଲିଉଡ୍‌ ଅଭିନେତ୍ରୀ ସ୍ଵରା ଭାସ୍କର ଏବେ କ୍ରିଷ୍ଣା ସେନ୍‌ଙ୍କ ଜୀବନୀକୁ ନେଇ ଫିଲ୍ମ ନିର୍ମାଣ କରୁଛନ୍ତି । ସ୍ଵରାଙ୍କ ନିଜ ପ୍ରଡକ୍ସନ୍‌ ବ୍ୟାନର କହାନୀୱାଲେ ଦ୍ୱାରା ଏହା ନିର୍ମାଣ ହେଉଛି । କ୍ରିଷ୍ଣା ସେନ୍‌ ଓରଫ୍‌ ସୁଇଟି ସେନ୍‌ଙ୍କ ଜୀବନର ବାସ୍ତବ କାହାଣୀକୁ ଭିତ୍ତିକରି ଏହା ନିର୍ମାଣ ହେଉଛି । ଉକ୍ତ ମହିଳା ନିଜକୁ ପୁରୁଷ ସଜେଇ କିପରି ଦୁଇମହିଳାଙ୍କୁ ବିବାହ କରିଛନ୍ତି ତାହାକୁ କେନ୍ଦ୍ର କରି ଫିଲ୍ମର କାହାଣୀ ଗଢ଼ିଉଠିଛି । ସ୍ଵରା ତାଙ୍କ ଭାଇ ଇଶାନ୍‌ଙ୍କ ସହ ନିଜ ପ୍ରଯୋଜନା ସଂସ୍ଥା ଲଞ୍ଚ୍‌ କରିଛନ୍ତି। ‘ତନୁ ୱେଡସ୍‌ ମନୁ’, ‘ରାଞ୍ଝ୍‌ଣା’, ‘ପ୍ରେମ୍ ରତନ୍‌ ଧନ୍ ପାୟୋ’, ‘ଅନାରକଲି ଅଫ୍‌ ଆରା’ ଆଦି ଫିଲ୍ମରେ ସଫଳ ଅଭିନୟ କରିଛନ୍ତି ।