ପ୍ରେମିକା ସହ ଝଗଡ଼ା କରି ନିଜ ଦେହରେ ଲଗାଇଲେ ନିଆଁ ଲଗାଇଲା ଯୁବକ

ଉତ୍ତର-ପୂର୍ବ ଦିଲ୍ଲୀର ଜ୍ୟୋତି ନଗରରେ ଜଣେ ଯୁବକ ମୋବାଇଲ ଫୋନ୍‌ରେ ପ୍ରେମିକା ସହିତ ଝଗଡ଼ା ହେବା ପରେ ଯୁବକଜଣକ ଉତ୍‌କ୍ଷିପ୍ତ ହୋଇ ନିଜ ଉପରେ ପେଟ୍ରୋଲ ଢାଳି ଦେହରେ ନିଆଁ ଲଗାଇ ଦେଲେ । ସେ ନିଜର ଜ୍ୟାକେଟ୍‌ ଭିତରେ ପେଟ୍ରୋଲ ବୋତଲ ନେଇଯାଉଥିଲେ । ପୁଲିସ ସୂତ୍ରରୁ ପ୍ରକାଶ ଯେ ୨୪ ବର୍ଷୀୟ ଯୁବକଜଣଙ୍କ ସହ ତାଙ୍କର ଦାଦା-ପୁଅ ଭାଇ ଓ ଆଉ ଜଣେ ସହଯାତ୍ରୀ ଅଟୋରେ ଯାଉଥିଲେ । ପୀଡିତଙ୍କର ୭୦ ପ୍ରତିଶତ ଅଙ୍ଗ ଜଳିଯାଇଥିବା ବେଳେ ଦାଦା ପୁଅ ଭାଇଙ୍କର ୨୦ ପ୍ରତିଶତ ଅଙ୍ଗ ଜଳିଯାଇଥିଲା । ଅନ୍ୟଯାତ୍ରୀ ଜଣକ ମାମୁଲି ଭାବେ ଆହତ ହୋଇଛନ୍ତି ।

ଏନ୍‌ସିପିସିଆର ରିପୋର୍ଟ: ଓଡ଼ିଶାର ବିଭିନ୍ନ ସେଲଟର ହୋମ୍‌ରେ ଚାଲିଛି ଧର୍ମାନ୍ତରୀକରଣ!

ଓଡ଼ିଶାର ବିଭିନ୍ନ ସେଲଟର ହୋମ୍‌ରେ ଧର୍ମାନ୍ତରୀକରଣ ଚାଲିଥିବା ନେଇ ଏନ୍‌ସିପିସିଆର (ନ୍ୟାସନାଲ କମିସନ୍‌ ଫର୍‌ ପ୍ରୋଟେକସନ୍‌ ଅଫ୍‌ ଚାଇଲ୍ଡ ରାଇଟ୍‌) ସନ୍ଦେହ କରିଛି । ସଂସ୍ଥା ଦ୍ୱାରା ପ୍ରକାଶିତ ଏକ ରିପୋର୍ଟରେ କୁହାଯାଇଛି ଯେ, କିଛି ସେଲ୍‌ଟର ହୋମ୍‌ରେ ଏଭଳି ଗତିବିଧି ଅନୁମାନ କରାଯାଇଛି । ରାଜ୍ୟର ୧୯ଟି ଜିଲ୍ଲାର ୫୦ ସେଲଟର ହୋମକୁ ଏନସିପିସିଆର ଗସ୍ତ କରିବା ପରେ କେନ୍ଦ୍ର ମହିଳା ଓ ବାଳ ବିକାଶ ମନ୍ତ୍ରାଳୟ ସହ ରାଜ୍ୟ ସରକାରଙ୍କୁ ରିପୋର୍ଟ ଦେଇଛି । ସଂସ୍ଥା କିଛି ସେଲଟର ହୋମ୍‌ରେ ନିଦ୍ଦିଷ୍ଟ ଧର୍ମପୁସ୍ତକ ମିଳିଥିବା କହିଛି । ଗାଇଡଲାଇନ୍‌ ଅନୁଯାୟୀ ୨୮ଟି ସେଲଟର ହୋମ୍‌ରେ ସର୍ବନିମ୍ନ ବ୍ୟବସ୍ଥା ନାହିଁ । ରାଜ୍ୟ ସରକାରଙ୍କ ମନିଟରିଂ ସିଷ୍ଟମ୍‌ ଠିକ୍ ଭାବରେ କାମ କରୁ ନଥିବା ଏନସିପିସିଆର କହିଛି ।

ବଲିଉଡ୍‌ ଏଣ୍ଟ୍ରି କରିବେ ସୁହାନା

ଖୁବ୍‌ଶୀଘ୍ର ବଲିଉଡ୍‌ରେ ପ୍ରବେଶ କରିବାକୁ ଯାଉଛନ୍ତି ବଲିଉଡ୍‌ର କିଙ୍ଗ ଖାନ୍‌ ଶାହରୁଖଙ୍କ ଅଲିଅଳି ଝିଅ ସୁହାନା ଖାନ୍‌ । ଏହା ବହୁଦିନ ହେବ ଚର୍ଚ୍ଚା ହୋଇ ଆସୁଥିବାବେଳେ କିଛିଦିନ ତଳେ ଶାହରୁଖ୍‌ ଏକ ସାକ୍ଷାତକାରରେ ସୁହାନାଙ୍କ ଅଭିନୟପ୍ରତି ବହୁତ ଆଗ୍ରହ ଥିବା କଥା କହିଥିଲେ । ଏହା ପୂର୍ବରୁ ଏହା ବିଷୟରେ ଗୌରୀ ଖାନ୍‌ ମଧ୍ୟ ସୂଚନା ଦେଇଥିଲେ । ସୁହାନା ସୋସିଆଲ୍‌ ମିଡ଼ିଆରେ ବେଶ୍‌ ସକ୍ରିୟ । ନିଜର ଗର୍ଜିଅସ୍‌ ଲୁକ୍‌ ପାଇଁ ବେଶ୍‌ ଚର୍ଚ୍ଚାରେ ରହିଛନ୍ତି ୧୭ ବର୍ଷୀୟା ସୁହାନା । ତେବେ ଦେଖାଯାଉ ­ସୁହାନା କେବେ ତାଙ୍କର ବଲିଉଡ୍‌ ଏଣ୍ଟ୍ରି ମାରୁଛନ୍ତି ।

ଆସନ୍ତାକାଲି ଓଡ଼ିଶା ଆସିବେ ରାହୁଲ ଗାନ୍ଧି

ଆସନ୍ତାକାଲି ଓଡ଼ିଶା ଆସିବେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି । ପୂର୍ବାହ୍ନ ୧୧ଟାରେ ଭବାନୀପାଟଣା ଯାଇ ସାଧାରଣ ସଭାରେ ଯୋଗଦେବେ । ଦୀର୍ଘ ୯ ବର୍ଷ ପରେ ରାହୁଲ ଗାନ୍ଧି କେବିକେକୁ ଆସୁଥିବାରୁ କର୍ମୀଙ୍କ ମହଲରେ ବେଶ ଉତ୍ସାହ ଦେଖିବାକୁ ମିଳିଛି । ଏହି ସମାବେଶରେ ୯ଟି ଜିଲ୍ଲାର କଂଗ୍ରେସ କର୍ମୀ ଯୋଗଦେବେ । ଏହି ଅବସରରେ କଂଗ୍ରେସ ଦଳୀୟ ସଂଗଠନକୁ ଆହୁରି ସୁଦୃଢ଼ କରିବାକୁ ନିଷ୍ପତ୍ତି ନିଆଯାଇଛି । ରାହୁଲ ଗାନ୍ଧି ସାଧାରଣ ସଭାରେ ଚାଷ ଏବଂ ଚାଷୀ ସମସ୍ୟାକୁ ନିଜ ମୁଖ୍ୟ ପ୍ରସଙ୍ଗ କରିପାରନ୍ତି । ଜାନୁଆରୀ ୨୫ରେ ରାହୁଲ ଗାନ୍ଧି ଓଡ଼ିଶା ଆସିଥିଲେ ।

ଆର୍ଥିକ ସ୍ଥିତିରେ ସୁଧାର ପାଇଁ ଗଧ ବିକ୍ରି କରିବ ପାକିସ୍ତାନ

ଆର୍ଥିକ ସଙ୍କଟ ଦେଇ ଗତି କରୁଥିବା ପାକିସ୍ତାନ ଗଧ ବିକ୍ରି କରି ଆର୍ଥିକ ସ୍ଥିତିରେ କିଛିଟା ସୁଧାର ଆଣିବା ନେଇ ଲକ୍ଷ୍ୟ ରଖିଛି । ଚୀନ୍‌ରେ ଗଧକୁ ଅଧିକ ଗୁରୁତ୍ୱ ଦିଆଯାଇଥାଏ । ଏଠାରେ ଗଧକୁ ବ୍ୟବହାର କରି ଏକ ପ୍ରକାର ଔଷଧ ତିଆରି କରାଯାଇଥାଏ । ଗଧର ଚର୍ମରେ ପ୍ରସ୍ତୁତ ହେଉଥିବା ଜିଲେଟିନ୍‌ରେ ଔଷଧୀୟ ଗୁଣ ଥିବା କୁହାଯାଉଛି । ଏହି ଔଷଧ ବ୍ୟବହାର ରକ୍ତ ଓ ରୋଗ ପ୍ରତିରୋଧକ ଶକ୍ତି ବଢ଼ାଇଥାଏ । ସାରା ବିଶ୍ୱରେ ଗଧଙ୍କ ସଂଖ୍ୟା ଦୃଷ୍ଟିରୁ ପାକିସ୍ତାନ ତୃତୀୟ ସ୍ଥାନରେ ରହିଛି ।

ହାତ ଧରିଲେ ଶିଳ୍ପା

ନିର୍ବାଚନ ପାଇଁ ଆଉ ହାତରେ ଅଳ୍ପ ସମୟ ବାକି । ଏହି ସମୟରେ ଭୋଟର୍‌ଙ୍କୁ ଆକୃଷ୍ଟ କରିବା ପାଇଁ ଉଭୟ ଦଳ ନିଜ ନିଜ ଦଳରେ ଗ୍ଲାମରସ୍ ଚେହେରାକୁ ସାମିଲ୍‌ କରୁଛନ୍ତି । ନିକଟରେ ଅଭିନେତ୍ରୀ ଈଶା କୋପିକର୍‌ ବିଜେପିରେ ସାମିଲ୍‌ ହୋଇଥିବାବେଳେ ଲୋକପ୍ରିୟ ଟେଲି ଅଭିନେତ୍ରୀ ଶିଳ୍ପା ସିନ୍ଧେ ଆଜି କଂଗ୍ରେସରେ ଯୋଗ ଦେଇଛନ୍ତି । ମୁମ୍ବାଇ କଂଗ୍ରେସ କମିଟିର ଅଧ୍ୟକ୍ଷ ସଞ୍ଜୟ ନିରୁପମ ଓ ଦଳ ମୁଖ୍ୟ ଚରଣ ସିଂ ସାପ୍ରାଙ୍କ ଉପସ୍ଥିତିରେ ଶିଳ୍ପା କଂଗ୍ରେସର ହାତ ଧରିଛନ୍ତି । ଅଙ୍ଗୁରୀ ଭାବି ଭାବରେ ଶିଳ୍ପା ବେଶ୍‌ ଲୋକପ୍ରିୟ ହୋଇଥିଲେ । ‘ବିଗବସ୍‌’ ସିଜିନ୍‌ ୧୧ର ବିଜୟିନୀ ମଧ୍ୟ ହୋଇଛନ୍ତି ଶିଳ୍ପା ।

ଦାମୀ ନମ୍ବର ପାଇଁ ଚର୍ଚ୍ଚାରେ ବାଲାଗୋପାଳ

ଗାଡ଼ିର ଦାମୀ ନମ୍ବର ଆଣି ଦେଇଛି ଚର୍ଚ୍ଚା । ଏହି ଚର୍ଚ୍ଚିତ ବ୍ୟକ୍ତି ହେଉଛନ୍ତି କେରଳର କେ.ଏସ୍‌. ବାଲାଗୋପାଲ । ସେ ତାଙ୍କ Porsche 718 Boxster ଗାଡ଼ି ପାଇଁ ୩୧ ଲକ୍ଷ ଟଙ୍କା ଖର୍ଚ୍ଚ କରି ନମ୍ବର ଆଣିଛନ୍ତି ।  ତାଙ୍କ ଗାଡ଼ିର ରେଜିଷ୍ଟ୍ରେସନ୍‌ ନମ୍ବର ହେଉଛି KJ-01CK-1 । ଏହା କେବଳ କେରଳର ଦାମୀ ନମ୍ବର ନୁହେଁ ଭାରତର ଦାମୀ ନମ୍ବର ବୋଲି କୁହାଯାଉଛି ।

ସପ୍ତମ ଦିନରେ ଆନ୍ନା ହଜାରେଙ୍କ ଆମରଣ ଅନଶନ; ବିଗୁଡୁଛି ସ୍ୱାସ୍ଥ୍ୟାବସ୍ଥା

ବିଶିଷ୍ଟ ସମାଜସେବୀ ଆନ୍ନା ହଜାରେଙ୍କ ଆମରଣ ଅନଶନ ସପ୍ତମ ଦିନରେ ପହଞ୍ଚିଛି । ଇତି ମଧ୍ୟରେ ତାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ଭାବେ ବିଗିଡ଼ି ଯିବା ପରେ ସେ ଏବେ ଚିକିତ୍ସିତ ଅଛନ୍ତି । ୭ ଦିନ ଧରି ଅଖିଆ ଅପିଆ ରହିବା ପରେ ଆନ୍ନାଙ୍କ ଓଜନ ୫.୫ କିଲୋ ହ୍ରାସ ଘଟିଛି । ଉଲ୍ଳେଖଯୋଗ୍ୟ, କେନ୍ଦ୍ରରେ ଲୋକପାଳ ଓ ରାଜ୍ୟରେ ଲୋକାୟୁକ୍ତ ନିଯୁକ୍ତିରେ ଅହେତୁକ ବିଳମ୍ବ ଘଟୁଥିବା ହେତୁ ଏହାକୁ ତୀବ୍ର ବିରୋଧ କରି ଜାନୁଆରୀ ୩୦ ତାରିଖରୁ ଅନଶନରେ ବସିଛନ୍ତି ଆନ୍ନା ହଜାରେ ।

କଂଗ୍ରେସ ମୁଖ୍ୟାଳୟରେ ଲାଗିଲା ପ୍ରିୟଙ୍କା ଗାନ୍ଧୀଙ୍କ ନାମଫଳକ

କଂଗ୍ରେସ ମହାସଚିବ ନିଯୁକ୍ତ ହେବା ପରେ ବିଦେଶ ଗସ୍ତରେ ଯାଇଥିବା ପ୍ରିୟଙ୍କା ଗାନ୍ଧୀ ଗତକାଲି ଫେରିଛନ୍ତି । ବିଦେଶରୁ ଫେରିବା ପରେ ଦଳର ଅଧ୍ୟକ୍ଷ ରାହୁଲ ଗାନ୍ଧୀ ତାଙ୍କୁ ତୁଗଲକ ରୋଡ଼ସ୍ଥିତ ବାସଭବନରେ ସାକ୍ଷାତ କରିଛନ୍ତି । ଆଜି ପ୍ରିୟଙ୍କା ଗାନ୍ଧୀ ବିଧିବଦ୍ଧ ଭାବେ କଂଗ୍ରେସ ମହାସଚିବ ଭାବେ କାର୍ଯ୍ୟଭାର ସମ୍ଭାଳିଛନ୍ତି । ଏହାବ୍ୟତୀତ କଂଗ୍ରେସ ମୁଖ୍ୟାଳୟରେ ତାଙ୍କର ନାମଫଳକ ଲଗାଯାଇଛି । ନାମଫଳକରେ ଲେଖାଯାଇଛି ‘ପ୍ରିୟଙ୍କା ଗାନ୍ଧୀ ଭଦ୍ରା, ମହାସଚିବ’ । ସୋମବାର ବିଦେଶ ଗସ୍ତରୁ ଫେରିବା ପରେ ଆଜି ପ୍ରଥମ ଥର ପାଇଁ ରାଜନୈତିକ ବୈଠକରେ ଭାଗ ନେବେ ପ୍ରିୟଙ୍କା ।

ବାହୁବଳୀ-୨ର ରେକର୍ଡ଼ ଭାଙ୍ଗିଲା ‘ଉରି-ଦି ସର୍ଜିକାଲ ଷ୍ଟ୍ରାଇକ୍’

ଗୋଟିଏ ପରେ ଗୋଟିଏ ସଫଳତା ହାସଲ କରି ଚାଲିଛି ‘ଉରି- ଦି ସର୍ଜିକାଲ ଷ୍ଟ୍ରାଇକ’। ବକ୍ସ ଅଫିସ୍‌ରେ ବ୍ଲକ ବଷ୍ଟର ସାବ୍ୟସ୍ତ ହୋଇଥିବା ଏହି ଫିଲ୍ମ ଏବେ ‘ବାହୁବଳୀ-୨’କୁ ମାତ୍‌ ଦେଇଛି। ଫିଲ୍ମ ରିଲିଜର ୨୩ ଓ ୨୪ ନମ୍ବର ଦିନରେ ବାହୁବଳୀ-୨ ଠାରୁ ଅଧିକ ଆୟ କରି ଚଳିତ ବର୍ଷ ରେକର୍ଡ ହାସଲ କରିଛି ‘ଉରି’। ଜାନୁଆରୀ ୧୧ରେ ପରଦାକୁ ଆସିଥିବା‘ଉରି- ଦି ସର୍ଜିକାଲ ଷ୍ଟ୍ରାଇକ’ ବକ୍ସ ଅଫିସ୍‌ରେ ପୂର୍ବରୁ ୨ ଶହ କୋଟି କ୍ଲବରେ ସାମିଲ ହୋଇଥିଲା। ଏହି ଫିଲ୍ମରେ ଭିକି କୌଶଲ୍‌, ୟାମି ଗୌତମ, କ୍ରିତି କୁଲହାରୀ, ପରେଶ ରାୱଲ୍‌ ପ୍ରମୁଖ ଅଭିନୟ କରିଛନ୍ତି ।

୨୨ରେ ପୁରୀ ଆସିବେ ଆମିକସ କ୍ୟୁରି

ଶ୍ରୀମନ୍ଦିର ସଂସ୍କାର ନେଇ ସୁପ୍ରିମ କୋର୍ଟଙ୍କ ଦ୍ୱାରା ନିଯୁକ୍ତ ଆମିକସ କ୍ୟୁରି ରଞ୍ଜିତ କୁମାର ଚଳିତ ମାସ ୨୨ ଓ ୨୩ ତାରିଖରେ ପୁରୀ ଆସିବେ। ସୁପ୍ରିମକୋର୍ଟ ଆମିକସ୍‌ କ୍ୟୁରି ଶ୍ରୀ କୁମାରଙ୍କୁ ଚଳିତ ମାସ ୨୨ ଓ ୨୩ ତାରିଖରେ ପୁରୀ ଯାଇ ବିଭିନ୍ନ ବର୍ଗର ବ୍ୟକ୍ତି, ଶ୍ରୀମନ୍ଦିର ପରିଚାଳନା କମିଟି, ପୁରୀ ଗଜପତି ମହାରାଜ, ଶ୍ରୀମନ୍ଦିରର ସେବକ, ସେବାୟତ ଓ ଅନୁଷ୍ଠାନକୁ ଭେଟିବାକୁ ନିର୍ଦ୍ଦେଶ ଦେଇଛନ୍ତି। ପରେ ଏ ନେଇ ଏକ ରିପୋର୍ଟ ସୁପ୍ରିମକୋର୍ଟରେ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି ।

ଯୁବ ସମାବେଶର ଉଦ୍‌ଘାଟନ ସହ ୧୨ଟି ପ୍ରକଳ୍ପ ଲୋକାର୍ପିତ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ

ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିନିକିଆ ନବରଙ୍ଗପୁର ଜିଲ୍ଲା ଗସ୍ତ କରି ଉମରକୋଟର ବିଜୁ ପଟ୍ଟନାୟକ ପଡ଼ିଆ ଠାରେ କୋରାପୁଟ, ମାଲକାନଗିରି, ନବରରଙ୍ଗପୁର ଓ ରାୟଗଡ଼ାର ବିଜୁ ଯୁବବାହିନୀର ସ୍ୱେଚ୍ଛାସେବାର ଉତ୍ସବ ଯୁବ ସମାବେଶକୁ ଉଦ୍‌ଘାଟନ କରିଛନ୍ତି । ଏହି ଅବସରରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ନବରଙ୍ଗପୁର ଜିଲ୍ଲା ପାଇଁ ୧ ହଜାର ୯୭ କୋଟି ଟଙ୍କା ବ୍ୟୟ ଅଟକଳରେ ୧୬ଟି ପ୍ରକଳ୍ପର  ଶିଳାନ୍ୟାସ କରିବା ସହିତ ୧୯ କୋଟି ଟଙ୍କା ବ୍ୟୟରେ ନିର୍ମିତ ୧୨ଟି ପ୍ରକଳ୍ପକୁ  ଶ୍ରୀ ପଟ୍ଟନାୟକ ଲୋକାର୍ପିତ କରିଛନ୍ତି ।

ପ୍ରଧାନମନ୍ତ୍ରୀ କିଷାନ ଯୋଜନା ପାଇଁ ଆଧାର ବାଧ୍ୟତାମୂଳକ ନୁହେଁ

ପ୍ରଧାନମନ୍ତ୍ରୀ କିଷାନ ଯୋଜନାରେ କେନ୍ଦ୍ର ସରକାର ଦେବାକୁ ଥିବା ସହାୟତା ରାଶି ପାଇଁ ଆଧାର କାର୍ଡ ବାଧ୍ୟତାମୂଳକ ନୁହେଁ । ପ୍ରଥମ ପର୍ଯ୍ୟାୟ କିସ୍ତି ପାଇଁ ଆଧାରକୁ ବାଧ୍ୟତାମୂଳକ କରାଯାଇନାହିଁ । ପ୍ରଥମ ପର୍ଯ୍ୟାୟରେ ସରକାର କ୍ଷୁଦ୍ର ଓ ନାମମାତ୍ର ଚାଷୀଙ୍କୁ ୨ହଜାର ଟଙ୍କା ଦିଆଯିବ । ତେବେ ପରବର୍ତ୍ତୀ କିସ୍ତି ପାଇଁ ଆଧାର କାର୍ଡ ବାଧ୍ୟତାମୂଳକ କରାଯିବ । କେନ୍ଦ୍ର ସରକାରଙ୍କ ବଜେଟ୍‌ ଘୋଷଣା ଅନୁଯାୟୀ ଦେଶର କ୍ଷୁଦ୍ର ଓ ନାମମାତ୍ର ଚାଷୀଙ୍କୁ ବାର୍ଷିକ ୬୦୦୦ଟଙ୍କା ଲେଖାଏଁ ଦିଆଯିବ ।

କାର୍‌ରେ ଯିବେ ଯୋଗୀ : ହେଲିକପ୍ଟର ଲ୍ୟାଣ୍ଡିଂ ମିଳିଲାନି ଅନୁମତି

ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ପଶ୍ଚିମବଙ୍ଗରେ ନିର୍ବାଚନୀ ରାଲି ପାଇଁ ହେଲିକପ୍ଟର ଲ୍ୟାଣ୍ଡିଂ  ଲାଗି ଅନୁମତି ନ ମିଳିବା ଫଳରେ ପଶ୍ଚିମବଙ୍ଗରେ ରାଲି ପାଇଁ ଯୋଗୀ କାର୍‌ରେ କୋଲକତାରେ ପ୍ରବେଶ ପାଇଁ କରିଛନ୍ତି ଯୋଜନା। ଆଜି ଯୋଗଦେବାକୁ ଥିବା ପୁରୁଲିଆରେ ଏକ ନିର୍ବାଚନୀ ସଭାରେ ସେ ଅପରାହ୍ନ ୩ଟା ୩୦ରେ ସଭାସ୍ଥଳରେ ପହଞ୍ଚିବେ ବୋଲି କୁହାଯାଉଛି।  ଏହି ରାଲି ପାଇଁ ଆବଶ୍ୟକ ଆଇନଗତ କାର୍ଯ୍ୟାନୁଷ୍ଠାନ ପୂରଣ ହୋଇ ନ ଥିବା ଦର୍ଶାଇ ଯୋଗୀଙ୍କୁ  ଅନୁମତି ପାଇଁ ମଙ୍ଗଳବାର ମନା କରାଯାଇଛି। ମମତା ଏନେଇ ଗାଡି ଯାଞ୍ଚ୍‌ କରିବାକୁ ଦେଇଛନ୍ତି କଡ଼ା ନିର୍ଦ୍ଦେଶ।

କାର୍ତ୍ତିକଙ୍କ ସୁରି ଲୁକ୍‌

କାର୍ତ୍ତିକ ଆର୍ଯ୍ୟାନ୍‌ଙ୍କ ଅପ୍‌କମିଙ୍ଗ ଫିଲ୍ମ ‘ପତି ପତ୍ନୀ ଔର ୱ’ର ଲୁକ୍‌ ନିଜ ଇନ୍‌ଷ୍ଟାଗ୍ରାମ୍‌ରେ ସେୟାର୍‌ କରିଛନ୍ତି । ତାଙ୍କର ଏହି ଲୁକ୍‌ ‘ରବ୍‌ନେ ବନାଦି ଯୋଡ଼ି’ ଫିଲ୍ମର ଶାହରୁଖ୍‌ ସୁରିନ୍ଦର୍‌ (ସୁରି) ଚରିତ୍ର ସହ ବେଶ୍‌ ମେଳ ଖାଉଥିବାର ଦେଖାଯାଇଛି । ଏହି ଫିଲ୍ମରେ କାର୍ତ୍ତିକ ଚିଣ୍ଟୁ ତ୍ୟାଗୀ ଜୀ ଭୂମିକାରେ ନଜର ଆସିବେ । ଏହି ଫିଲ୍ମରେ କାର୍ତ୍ତିକଙ୍କ ସହ ଅନନ୍ୟା ପାଣ୍ଡେ, ଭୂମି ପେଡେନ୍‌କର ପ୍ରମୁଖ ନଜର ଆସିବେ । କାର୍ତ୍ତିକ ଓ କ୍ରିତିଙ୍କର ‘ଲୁକାଛପି’ ଆଗାମୀ ମାସରେ ପରଦାକୁ ଆସିବାର ରହିଛି ।

ସୁପ୍ରିମକୋର୍ଟଙ୍କ ରାୟକୁ ସ୍ଵାଗତ କରିବା ସହିତ ନୈତିକ ବିଜୟ କହିଲେ ମମତା

ସୁପ୍ରିମକୋର୍ଟ ରାୟକୁ ମମତା ବାନାର୍ଜୀ ସ୍ୱାଗତ କରିଛନ୍ତି । ଏହା ନୈତିକ ବିଜୟ ବୋଲି  କହିବା ସହିତ କେନ୍ଦ୍ର ଉପରେ ବର୍ଷିଛନ୍ତି ମମତା । ସେ ଅଭିଯୋଗ କରିଛନ୍ତି, କେନ୍ଦ୍ର ରାଜ୍ୟର କାମରେ ଅଯଥା ହସ୍ତକ୍ଷେପ କରୁଛି । ସମ୍ବିଧାନର ଉଲ୍ଲଙ୍ଘନ କରୁଛି କେନ୍ଦ୍ର । ଏହି ଆନ୍ଦୋଳନ ସମସ୍ତଙ୍କ ଆନ୍ଦୋଳନ । ଏହାଦ୍ୱାରା ଦେଶବାସୀଙ୍କ ବିଜୟ ହୋଇଛି । ନିର୍ବାଚନ ପୂର୍ବରୁ ସିବିଆଇ ଯାଂଚକୁ କେନ୍ଦ୍ରକୁ ପ୍ରଶ୍ନ କରିଛନ୍ତି ମମତା  । ଆଜିର ବିଜୟ ଦେଶର ବିଜୟ ବୋଲି ମମତା କହିଛନ୍ତି ।

ସିବିଆଇ – ପୋଲିସ୍‌ ବିବାଦ : ରାଜୀବ କୁମାରଙ୍କୁ ଗିରଫ କରାଯାଇପାରିବ ନାହିଁ – ସୁପ୍ରିମ୍‌କୋର୍ଟ

କଲିକାତାର ସିବିଆଇ – ପୁଲିସ ବିବାଦ ନେଇ ସୁପ୍ରିମ୍‌କୋର୍ଟ ଆଜି ନିଜ ରାୟ ଶୁଣାଇଛନ୍ତି । କଲିକତାର ପୁଲିସ କମିଶନର ରାଜୀବ କୁମାରଙ୍କୁ ଗିରଫ କରାଯାଇପାରିବ ନାହିଁ ବୋଲି ସୁପ୍ରିମ୍‌କୋର୍ଟ ନିର୍ଦ୍ଦେଶ ଦେଇଥିବାବେଳେ ସିବିଆଇରେ ହାଜର ହେବାକୁ କୁହାଯାଇଛି । ସିବିଆଇ ତଦନ୍ତରେ ସହଯୋଗ କରିବାକୁ ପୁଲିସ୍‌ କମିଶନରଙ୍କୁ ସୁପ୍ରିମ୍‌କୋର୍ଟ ନିର୍ଦ୍ଦେଶ ଦେଇଛନ୍ତି । ସିବିଆଇ ଏହି ଘଟଣାରେ ପଶ୍ଚିମବଙ୍ଗ ମୁଖ୍ୟଶାସନ ସଚିବ, ପୁଲିସ ମହାନିର୍ଦ୍ଦେଶକ ଓ ପୁଲିସ କମିସନର ଶ୍ରୀ କୁମାରଙ୍କୁ ଅଦାଲତ ଅବମାନନା ନୋଟିସ ଜାରି କରିଛନ୍ତି। ଆସନ୍ତା ୨୦ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ପାଇଁ ଦିନ ଧାର୍ଯ୍ୟ କରାଯାଇଛି ।

୪୩ ବର୍ଷରେ ଜୁନିଅର ବି

ବଲିଉଡ୍‌ ଷ୍ଟାର ଅଭିଷେକ ବଚ୍ଚନ ମଙ୍ଗଳବାର ୪୩ ବର୍ଷରେ ପଦାର୍ପଣ କରିଛନ୍ତି। ସେ ୧୯୭୬ ଫେବୃୟାରୀ ୫ରେ ମୁମ୍ବାଇଠାରେ ଜନ୍ମଗ୍ରହଣ କରିଥିଲେ। ସୁପରଷ୍ଟାର ଅମିତାଭ ବଚ୍ଚନଙ୍କ ପୁଅ ହେଲେ ମଧ୍ୟ କିଛି ହାତଗଣତି ଫିଲ୍ମକୁ ଛାଡ଼ିଦେଲେ ବଲିଉଡ୍‌ରେ ଏତେ ସଫଳ ହୋଇନାହାନ୍ତି ଜୁନିଅର୍‌ ବି ଓରଫ୍‌ ଅଭିଷେକ ।  ୨୦୦୦ରେ ଜେପି ଦତ୍ତାଙ୍କ ‘ରିଫ୍ୟୁଜି’ ଫିଲ୍ମ ଜରିଆରେ ବଲିଉଡ୍‌ ଏଣ୍ଟ୍ରି କରିଥିଲେ ଏହି ଅଭିନେତା ଜଣକ । ‘ୟୁବା’, ‘ସରକାର୍‌’, ‘କଭି ଅଲ୍‌ବିଦା ନା କହ୍‌ନା’, ‘ଗୁରୁ’, ‘ବଣ୍ଟି ଔର୍‌ ବବ୍‌ଲି’, ‘ବ୍ଲଫ୍‌ ମାଷ୍ଟର୍‌’, ‘ପ୍ଲେୟର୍ସ’, ’ଧୁମ୍‌’ ଆଦି ଫିଲ୍ମରେ କାମ କରିଛନ୍ତି । ୨୦୦୭ରେ ନୀଳ ନୟନା ଐଶ୍ବର୍ଯ୍ୟା ରାୟଙ୍କୁ ବିବାହ କରିଛନ୍ତି ।

ବିଜୟ ମାଲ୍ୟାଙ୍କ ପ୍ରତ୍ୟର୍ପଣକୁ ବ୍ରିଟେନ୍‌ ଗୃହ ମନ୍ତ୍ରାଳୟ ମଞ୍ଜୁରୀ

ଲିର୍କ‌ ବାରୋନ୍‌ ବିଜୟ ମାଲ୍ୟାଙ୍କୁ ଶକ୍ତ ଝଟ୍‌କା। ବ୍ୟାଙ୍କ ଋଣ ଜାଲିଆତି ମାମଲାରେ ଭାରତ ପ୍ରତ୍ୟର୍ପଣ ଆଦେଶ ଉପରେ ମୋହର ମାରିଛି ବ୍ରିଟେନ୍‌ ଗୃହ ମନ୍ତ୍ରାଳୟ। ଏବେ ପ୍ରତ୍ୟର୍ପଣ ବିରୋଧରେ ବିଜୟ ମାଲ୍ୟା ୧୪ ଦିନ ଭିତରେ ସେଠାକାର ହାଇକୋର୍ଟରେ  ଆବେଦନ କରିପାରିବେ। ଗତବର୍ଷ ଡିସେମ୍ବର ମାସରେ ଏ ସମ୍ପର୍କୀତ ମାମଲାର ଶୁଣାଣି କରି ସ୍ୱଦେଶ ପ୍ରତ୍ୟର୍ପଣ ନେଇ ଅନୁମତି ଦେଇଥିଲେ ଲଣ୍ଡନର ୱେଷ୍ଟ ମିନିଷ୍ଟର ମାଜିଷେ୍ଟ୍ରଟ କୋର୍ଟ। ଭାରତର ବିଭିନ୍ନ ବ୍ୟାଙ୍କରୁ ୯ ହଜାର କୋଟି ଟଙ୍କା ବ୍ୟାଙ୍କ ଠକେଇ ମାମଲାରେ ବିଜୟ ମାଲ୍ୟା ଏବେ ଲଣ୍ଡନରେ  ଆତ୍ମଗୋପନ କରିଛନ୍ତି ।

ଷ୍ଟ୍ରିଟ୍‌ ଡ୍ୟାନ୍ସର ହେବେ ବରୁଣ ଧୱନ

ABCD 2 ପରେ ପୁଣି ଥରେ ଏକାଠି କାମ କରିବା ରେମୋ ଡିସୁଜା ଓ ବରୁଣ ଧୱନ ଯୋଡ଼ି। ରେମୋଙ୍କ ନିର୍ଦ୍ଦେଶନାରେ ଆସିବ ଅପକମିଂ ଫିଲ୍ମ ଷ୍ଟ୍ରିଟ୍‌ ଡ୍ୟାନ୍ସର 3D। ଏହାର ଲିଡ ରୋଲରେ ନଜର ଆସିବେ ବରୁଣ ଧୱନ। ଏବେ ରିଲିଜ ହୋଇଛି ଏହାର ଲୋଗୋ ଓ ପୋଷ୍ଟର। ନିଜେ ବରୁଣ ଧୱନ ନିଜ ଟ୍ଵିଟର ପେଜରେ ଏହାକୁ ପୋଷ୍ଟ କରିଛନ୍ତି। ତାଙ୍କ ଅପୋଜିଟରେ ନଜର ଆସିପାରନ୍ତି ଶ୍ରଦ୍ଧା କପୁର। ପୂର୍ବରୁ କୁହାଯାଉଥିଲା ABCD 2 ରିମେକର ନାଁ ABCD 3 ହେବ। କିନ୍ତୁ ଏଥର ନୂଆ ଟାଇଟଲ୍‌ ରଖାଯାଇଛି। ୨୦୧୫ରେ ରିଲିଜ ABCD 2 ରେ ଅଭିନୟ କରିଥିଲେ ବରୁଣ ଧୱନ।

ବିମାନ କକପିଟରୁ ଉଦ୍ଧାର ହେଲା ପେଚା

ମୁମ୍ବାଇ ଏୟାରପୋର୍ଟରେ ଏଭଳି ଘଟଣା ଦେଖିବାକୁ ମିଳିଥିଲା। ଜେଟ୍‌ ଏୟାରେୱଜ୍‌ ବିମାନ କକପିଟରେ ଥିଲା ପେଚା। ଏହାପରେ ତାକୁ ଉଦ୍ଧାର କରି ମୁମ୍ବାଇ ଅନ୍ତର୍ଜାତୀୟ ବିମାନବନ୍ଦରରେ ଥିବା ଅଗ୍ନିଶମ ବିଭାଗକୁ ହସ୍ତାନ୍ତର କରାଯାଇଥିଲା। ତେବେ ବିମାନ କକପିଟକୁ ପେଚା କେମିତି ଆସିଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ କରୁଛି।

ବାଲଟରେ ଭୋଟ୍‌ ଦାବି, ଇସିଙ୍କୁ ଭେଟିଲେ ୨୩ଟି ଦଳ

ସାଧାରଣ ନିର୍ବାଚନ ଆଗରୁ ଜୋର ଧରିଛି ବାଲାଟ ପେପରରେ ଭୋଟ୍‌ ଦାବି। ଏ ନେଇ ୨୩ଟି ରାଜନୈତିକ ଦଳର ପ୍ରତିନିଧି ନିର୍ବାଚନ କମିଶନଙ୍କୁ ଭେଟି ଦାବି ଜମାଇଛନ୍ତି। ନିର୍ବାଚନରେ ସ୍ୱଚ୍ଛତା, ଇଭିଏମର ବିଶ୍ୱସନୀୟତା ଓ ୫୦ ପ୍ରତିଶତ ଆସନରେ ଇଭିଏମରେ ଭିଭିପାଟ ବ୍ୟବହାର ଆଦି ପ୍ରସଙ୍ଗରେ ଦାବି ଉପସ୍ଥାପନ କରିଛନ୍ତି । ୨୦୧୪ ସାଧାରଣ ନିର୍ବାଚନରେ ଇଭିଏମ ହ୍ୟାକିଂ ନେଇ ନିକଟରେ ଲଣ୍ଡନରେ ଡେମୋ ପ୍ରଦର୍ଶିତ ହୋଇଥିଲାା ଇଭିଏମ ହ୍ୟାକିଂ କରି ଫଳାଫଳ ପରିବର୍ତ୍ତନ କରାଯାଇଥିବା ସୟଦ ସୁଜା ନାମକ ଜଣେ ହ୍ୟାକର ଅଭିଯୋଗ ଆଣିଥିଲେ। ଏହାପରେ ଇଭିଏମ୍‌ ବଦଳରେ ବାଲଟରେ ଭୋଟିଂ ପାଇଁ ଦାବି ହେଉଛି।

ଦିଦିଙ୍କ ସତ୍ୟାଗ୍ରହ ଜାରି, ବଢୁଛି ବିରୋଧୀ ଦଳର ସମର୍ଥନ

ପଶ୍ଚିମବଙ୍ଗରେ ସିବିଆଇ ଝାମ୍ପ ମାରିବା ପରେ କେନ୍ଦ୍ର ବିରୋଧରେ ସତ୍ୟାଗ୍ରହ ଜାରି ରଖିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ। ଦିଦି କହିଛନ୍ତି, ଜୀବନ ଦେବେ କିନ୍ତୁ ପଛକୁ ଫେରିବେ ନାହିଁ। ପଶ୍ଚିମବଙ୍ଗ ହାଇଡ୍ରାମା ଭିତରେ ମମତାଙ୍କୁ କଂଗ୍ରେସ ସମେତ ବିଜେପି ବିରୋଧୀ ଦଳଗୁଡ଼ିକ ମମତାଙ୍କ ପ୍ରତି ସମର୍ଥନର ହାତ ବଢ଼ାଇଛନ୍ତି। ଗତକାଲି କୋଲକାତାରେ ପହଞ୍ଚିଛନ୍ତି ଡିଏମ୍‌କେ ସାଂସଦ କାନିମୋଈ ଓ ଆରଜେଡି ନେତା ତେଜସ୍ୱୀ ଯାଦବ।

ସିବିଆଇ ଆବେଦନ ଉପରେ ଶୁଣାଣି କରିବେ ସୁପ୍ରିମକୋର୍ଟ

ପଶ୍ଚିମବଙ୍ଗରେ ସିବିଆଇ ଝାମ୍ପ ମାରିବା ମାମଲାରେ ଆଜି ଶୁଣାଣି କରିବେ ସୁପ୍ରିମକୋର୍ଟ। ପ୍ରଧାନ ବିଚରାପତି ରଞ୍ଜନ ଗୋଗୋଇଙ୍କ ଅଧ୍ୟକ୍ଷତାରେ ଗଠିତ ତିନି ଜଣିଆ ଖଣ୍ଡପୀଠ ଏହାର ଶୁଣାଣି କରିବେ। ଚିଟ୍‌ଫଣ୍ଡ୍‌ ତଦନ୍ତ ମାମଲାରେ କୋଲକାତା ପୋଲିସ କମିଶନର ରାଜୀବ କୁମାର ଅସହଯୋଗ କରିବା ନେଇ କୋର୍ଟଙ୍କ ଦ୍ୱାରସ୍ଥ ହୋଇଥିଲା ସିବିଆଇ। ପଶ୍ଚିମବଙ୍ଗ ମୁଖ୍ୟ ଶାସନ ସଚିବ, ପୋଲିସ ଡିଜି, ପୋଲିସ କମିଶନରଙ୍କ ବିରୋଧରେ ମାମଲା ରୁଜୁ ଅଦାଲତ ଅବମାନନା। ସିବିଆଇ ଆବେଦନରେ ଦର୍ଶାଇଛି, କୋଲକାତା ପୋଲିସ କମିଶନର ରାଜୀବ କୁମାର ତଦନ୍ତରେ ସାହାଯ୍ୟ କରୁ ନାହାନ୍ତି। କୋର୍ଟ ସିବିଆଇକୁ କହିଥିଲେ, ପ୍ରମାଣ ଦେଖାଅ।

ସାନଭାଇକୁ ଚାକିରି ମିଳିବା ନେଇ ବଡ଼ ଭାଇ ଲଗାଇଲା ନିଆଁ : ୪ ମୃତ

ପଶ୍ଚିମ ବଙ୍ଗଳାର ମାଲଦା ଜିଲ୍ଲାରେ ସାନ ଭାଇକୁ ଅନୁକମ୍ପାମୂଳକ ଚାକିରି ମିଳିବାରୁ ୩୦ ବର୍ଷୀୟ ବଡ ଭାଇ ଘରେ ନିଆଁ ଲଗାଇ ଦେଇଛନ୍ତି । ଏହି ଅଗ୍ନିକାଣ୍ଡରେ ପରିବାରର ଚାରିଜଣ ସଦସ୍ୟଙ୍କ ମୃତ୍ୟୁ ଘଟିଥିବାବେଳେ ଆଉ ଦୁଇଜଣଙ୍କ ଅବସ୍ଥା ସଂକଟାପନ୍ନ ରହିଛି । ଆହତଙ୍କୁ ମାଲନ୍ଦା ମେଡ଼ିକାଲ କଲେଜ ଆଣ୍ଡ ହସ୍‌ପିଟାଲ୍‌ରେ ଭର୍ତ୍ତି କରାଯାଇଛି । ପରିବାରର ସମସ୍ତ ସଦସ୍ୟ ଶୋଇଥିବାବେଳେ ଆରୋପୀ ଜଣକ ଏଭଳି କାଣ୍ଡ ଘଟାଇଛନ୍ତି ।

ସୋମାଲିଆରେ କାର ବୋମା ବିସ୍ଫୋରଣ, ୯ ମୃତ

ଉତ୍ତର-ପୂର୍ବ ଆଫ୍ରିକୀୟ ଦେଶ ସୋମାଲିଆରେ ଆଜି ଏକ ଭୟଙ୍କର କାର ବୋମା ବିସ୍ଫୋରଣ ହୋଇ ପ୍ରାୟ ୯ ଜଣ ବ୍ୟକ୍ତି ପ୍ରାଣ ହରାଇଛନ୍ତି । ସୋମାଲିଆ ରାଜଧାନୀ ମୋଗାଦିସୁ ସହରରେ ଥିବା ଏକ ସପିଂ ମଲ ଆଗରେ ରଖାଯାଇଥିବା ଏକ କାରରେ ଏହି ବୋମା ରଖାଯାଇଥିଲା ବୋଲି ପୁଲିସ ମୁଖ୍ୟ କ୍ୟାପଟେନ ମହମ୍ମଦ ହୁସେନ କହିଛନ୍ତି । ତେବେ ବର୍ତ୍ତମାନ ସୁଦ୍ଧା କୌଣସି ଆତଙ୍କବାଦୀ ସଂଗଠନ ଏହି ଘଟଣା ପାଇଁ ନିଜକୁ ଦାୟୀ କରିନାହାନ୍ତି ।

କାଲିଫର୍ନିଆ ବିମାନ ଦୁର୍ଘଟଣା : ୫ ମୃତ

ଦକ୍ଷିଣ କାର୍ଲିଫର୍ନିଆରେ ସ୍ଥାନୀୟ ୟୋରବା ଲିଣ୍ଡା ସହରରେ ଏକ ଛୋଟ ୪୧୪-ଏ ବିମାନ ଯାନ୍ତ୍ରିକ ତ୍ରୁଟି ଯୋଗୁ ଦୁର୍ଘଟଣାଗ୍ରସ୍ତ ହୋଇ ଏକ କଲୋନୀ ଉପରେ ଖସିପଡ଼ିଥିଲା। ଏହା ଦ୍ୱାରା ଏଠାରେ ଥିବା ୨ ବାସଗୃହ ଜଳିପୋଡ଼ି ପାଉଁଶ ହୋଇଯାଇଥିବାବେଳେ ପାଇଲଟଙ୍କ ସମେତ ଆଉ ୪ଜଣଙ୍କର ମୃତ୍ୟୁ ଘଟିଛି ।  ଏହି ଘଟଣାରେ ଦୁଇଜଣ ଆହତଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ଉଦ୍ଧାର କାର୍ଯ୍ୟ ଜାରି ରହିବା ସହିତ ସ୍ଥାନୀୟ ଅଞ୍ଚଳରୁ ଜନସାଧାରଣଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଥିବା ପ୍ରଶାସନ କହିଛି।

ପଶ୍ଚିମବଙ୍ଗ ସିବିଆଇ ଝଡ଼ : ଉଭୟ ଗୃହ ମୁଲତବୀ

ପଶ୍ଚିମ ବଙ୍ଗରେ ସିବିଆଇର କାର୍ଯ୍ୟାନୁଷ୍ଠାନକୁ ନେଇ ହଟ୍ଟଗୋଳ ହେବାରୁ ସଂସଦର ଉଭୟ ଗୃହ ଆଜି ମୁଲତବୀ ହୋଇଛି । ରାଜ୍ୟସଭାରେ ସଭାକାର୍ଯ୍ୟ ଆରମ୍ଭ ହେବାମାତ୍ରେ ତୃଣମୂଳ କଂଗ୍ରେସ ନେତୃତ୍ୱରେ ବିରୋଧୀ ଦଳର ସଦସ୍ୟମାନେ ପଶ୍ଚିମବଙ୍ଗ ପୁଲିସ୍‌ କମିଶନର୍‌ ବିରୁଦ୍ଧରେ ସିବିଆଇ କାର୍ଯ୍ୟାନୁଷ୍ଠାନ ନେଇ ହଟ୍ଟଗୋଳ କରିଥିଲେ । ରାଜନୈତିକ ଉଦ୍ଦେଶ୍ୟ ରଖି କେନ୍ଦ୍ର ସରକାର ସିବିଆଇର ଅପବ୍ୟବହାର କରୁଥିବା ଅଭିଯୋଗ କରିଥିଲେ । କଂଗ୍ରେସ ଦଳ ସମେତ ଅନ୍ୟାନ୍ୟ ବିରୋଧୀ ଦଳଗୁଡ଼ିକ ସମର୍ଥନ କରିଥିଲେ । ସେହିପରି ଲୋକସଭାରେ ତୃଣମୂଳ କଂଗ୍ରେସ ଓ ଅନ୍ୟ ଦଳଗୁଡ଼ିକର ସାଂସଦମାନେ ଏଇ ପ୍ରସଙ୍ଗରେ ସରକାରୀ ବିରୋଧୀ ସ୍ଲୋଗାନମାନ ଦେଇଥିଲେ । ଫଳରେ ଗୃହ କାର୍ଯ୍ୟରେ ବାଧା ସୃଷ୍ଟି ହୋଇଥିଲା ।

ବିଶ୍ୱର ଧନୀ କ୍ରିକେଟରଙ୍କ ତାଲିକାରେ ଟପ୍‌ ଟେନରେ ୫ ଭାରତୀୟ

  1. ଟପ୍‌ ୧୦ ମଧ୍ୟରେ ମୋଟ ୫ ଭାରତୀୟ କ୍ରିକେଟର ରହିଛନ୍ତି। ଭାରତୀୟ ଅଧିନାୟକ ବିରାଟ କୋହଲି ତାଲିକାର ଶୀର୍ଷରେ ରହିଛନ୍ତି। ବର୍ତ୍ତମାନ ତାଙ୍କ ସମ୍ପତ୍ତିର ମୂଲ୍ୟ ୬୫୯.୪୧କୋଟି । ତାଙ୍କ ପଛକୁ ୨ୟ ସ୍ଥାନରେ ରହିଛନ୍ତି ପୂର୍ବତନ ଅଧିନାୟକ ବ୍ୟାଟ୍ସମ୍ୟାନ ମହେନ୍ଦ୍ର ସିଂ ଧୋନୀ। ଧୋନୀଙ୍କ ବର୍ତ୍ତମାନ ସମ୍ପତ୍ତିର ମୂଲ୍ୟ ୫୦୧.୬୫ କୋଟି। ଏହି ତାଲିକାରେ ପୂର୍ବତନ ଓପ୍‌ନର ବୀରେନ୍ଦ୍ର ସେହ୍ବାଗ ଓ ବିସ୍ଫୋରକ ବ୍ୟାଟ୍ସମ୍ୟାନ ଯୁବରାଜ ସିଂ ୪୦ ନିୟୁତ ଡଲାର ସହ ୩ୟ ଓ ୪ର୍ଥ ସ୍ଥାନରେ ରହିଛନ୍ତି। ଅବସରପ୍ରାପ୍ତ ଗୌତମ ଗମ୍ଭୀର ୨୦ ନିୟୁତ ତାଲିକାର ୭ମ ସ୍ଥାନରେ ରହିଛନ୍ତି।

‘ଫୋର୍ବସ୍ ଇଣ୍ଡିଆ ୩୦ ଅଣ୍ଡର୍‌ ୩୦’ରେ ହିମା, ସ୍ମୃତି ଓ ଆୟୁଷ

ଆଥଲେଟ୍‌ ହିମା ଦାସ୍‌, କ୍ରିକେଟିୟର୍‌ ସ୍ମୃତି ମାନ୍ଧାନା ଏବଂ ଆୟୁଷ ଅଗ୍ରୱାଲ୍‌ ନିଜର କାର୍ଯ୍ୟ ପାଇଁ ଫୋର୍ବସ୍‌ର ଷଷ୍ଠ ବାର୍ଷିକ ‘ଫୋର୍ବସ୍‌ ଇଣ୍ଡିଆ ୩୦ ଅଣ୍ଡର୍‌ ୩୦’ରେ ସ୍ଥାନ ପାଇଛନ୍ତି । ଫୋର୍ବସ୍‌ ୧୬ଟି ଶ୍ରେଣୀରେ ୪ଟି ବ୍ୟାପକ ମାନଦଣ୍ଡ ଆଧାରରେ ଅସାଧାରଣ ଉପଲବ୍ଧି ହାସଲ କରିଥିବା ବ୍ୟକ୍ତିତ୍ୱଙ୍କୁ ଚୟନ କରିଥାଏ ।  ଭାରତର କମ୍‌ ବୟସର ନବ ପ୍ରତିଭା ତଥା ଦୁଃସାହସିକ ଉଦ୍ୟମକୁ ଫୋର୍ବସ୍‌ରେ ସ୍ଥାନିତ କରାଯାଇଛି ।

ସେସନ୍ସ କୋର୍ଟକୁ ଗଲା ବହୁ ଚର୍ଚ୍ଚିତ ସୁନନ୍ଦା ପୁଷ୍କର ମୃତ୍ୟୁ ମାମଲା

କଂଗ୍ରେସ ସାଂସଦ ଶଶି ଥରୁରଙ୍କ ପତ୍ନୀ ସୁନନ୍ଦା ପୁଷ୍କର ମୃତ୍ୟୁ ମାମଲାରେ ଏବେ ନୂଆ ମୋଡ଼ ଆସିଛି । ଦିଲ୍ଲୀର ପଟିଆଲା ହାଉସ କୋର୍ଟ ଏହି ମାମଲାର ଶୁଣାଣି ସେସନ୍ସ କୋର୍ଟରେ କରିବାକୁ ଆଜି ନିର୍ଦ୍ଦେଶ ଦେଇଛନ୍ତି । ସେସନ୍ସ କୋର୍ଟ ଆଇପିସିର ଧାରା ୩୦୬ (ଆତ୍ମହତ୍ୟା ପାଇଁ ଉସ୍‌କାଇବା) ଅନୁଯାୟୀ ମାମଲାର ଶୁଣାଣି କରିବେ । ଶଶି ଥରୁରଙ୍କ ନାଁରେ ପୁଲିସ୍‌ ଏହି ଧାରାରେ ମାମଲା ରୁଜୁ କରିଛି । ଆସନ୍ତା ୨୧ ତାରିଖରୁ ସେସନ୍ସ କୋର୍ଟ ଏହାର ଶୁଣାଣି ଆରମ୍ଭ କରିବେ ।  ଶଶି ଥରୁରଙ୍କ ନାଁରେ ୩୦୬ ବ୍ୟତୀତ ୪୯୮-ଏରେ ମଧ୍ୟ ମାମଲା ରୁଜୁ ହୋଇଛି ।

ପି.ଭି.ଭାରତୀ ହେଲେ କର୍ପୋରେସନ ବ୍ୟାଙ୍କ ସିଇଓ

କାନାରା ବ୍ୟାଙ୍କର ଏକ୍‌ଜିକ୍ୟୁଟିଭ ଡାଇରେକ୍ଟର ପି.ଭି.ଭାରତୀ କର୍ପୋରେସନ ବ୍ୟାଙ୍କର ଏମ୍‌ଡି ତଥା ସିଇଓ ଭାବେ ଦାୟିତ୍ୱ ନେଇଛନ୍ତି । ୨୦୧୬ ସେପ୍ଟେମ୍ବର ୧୫ରୁ ସେ କାନାରା ବ୍ୟାଙ୍କରେ ଏକ୍‌ଜିକ୍ୟୁଟିଭ ଡାଇରେକ୍ଟର ଭାବେ କାର୍ଯ୍ୟ କରି ଆସୁଥିଲେ । ବ୍ୟାଙ୍କିଙ୍ଗ ଶିଳ୍ପରେ ତାଙ୍କର ୩୭ ବର୍ଷର ଅଭିଜ୍ଞତା ରହିଛି । ସେ ରାଷ୍ଟ୍ରୀୟ ରାଜଧାନୀ କ୍ଷେତ୍ର ତଥା ତାମିଲନାଡୁରେ ବିଭିନ୍ନ ଶାଖାରେ କାମ କରିଛନ୍ତି । ତାଙ୍କ ନିକଟରେ ଗ୍ରାମୀଣ, ଅର୍ଦ୍ଧସହରାଞ୍ଚଳ, ସହରାଞ୍ଚଳ ଏବଂ ମେଟ୍ରୋ ଶାଖାରେ କାର୍ଯ୍ୟ କରିବାର ଅଭିଜ୍ଞତା ରହିଛି ।

ମଧୁରଙ୍କ ଫିଲ୍ମରେ ଶାହରୁଖ୍

‘ପେଜ୍‌-୩’, ‘ଚାନ୍ଦିନୀ ବାର୍‌’, ‘ଫ୍ୟାଶନ୍‌’, ‘ହିରୋଇନ୍‌’ ଭଳି ଭିନ୍ନ ସ୍ଵାଦର ଫିଲ୍ମ ନିର୍ମାଣ କରିଥିବା ବଲିଉଡ୍‌ର ଜଣାଶୁଣା ନିର୍ମାତା ନିର୍ଦ୍ଦେଶକ ମଧୁର ଭଣ୍ଡାର୍‌କର ବାଲି ମାଫିଆଙ୍କ ଉପରେ ଏକ ଫିଲ୍ମ ନିର୍ମାଣ କରିବାକୁ ଯାଉଛନ୍ତି । ତେବେ ମିଳିଥିବା ଖବର ଅନୁସାରେ ମଧୁରଙ୍କ ଏହି ଫିଲ୍ମରେ ବଲିଉଡ୍‌ କିଙ୍ଗ୍‌ ଖାନ୍‌ ଶାହରୁଖ୍‌ ମୁଖ୍ୟ ଭୂମିକାରେ ନଜର ଆସିବେ । ଗତ ବର୍ଷ ଡିସେମ୍ବରରେ ଶାହରୁଖ୍‌ଙ୍କ ‘ଜିରୋ’ ଫିଲ୍ମ ରିଲିଜ୍‌ ହୋଇ ବେଶ୍‌ ଅସଫଳ ରହିଥିଲା । ଏହାପରଠାରୁ କିଙ୍ଗ୍‌ ଖାନ୍‌ ଫିଲ୍ମ ପ୍ରତି ବିଶେଷ ଚୁଜି ହୋଇଯାଇଛନ୍ତି । ଶାହରୁଖ୍‌ ଫରହାନ୍‌ ଅଖତର୍‌ଙ୍କ ‘ଡନ୍‌-୩‘ରେ ମଧ୍ୟ ନଜର ଆସିବେ ।

୭ରେ ବିଧାନସଭା ଘେରିବ ଓଡ଼ିଶା ପ୍ରାଥମିକ ଶିକ୍ଷକ ସଂଘ

ବିଭିନ୍ନ ଦାବିରେ ଆସନ୍ତା ୭ ତାରିଖରେ ଓଡ଼ିଶା ପ୍ରାଥମିକ ଶିକ୍ଷକ ସଂଘ ବିଧାନସଭା ଘେରାଉ କରିବ। ୫୦ ହଜାରରୁ ଅଧିକ ଶିକ୍ଷକ ଏହି ଆନ୍ଦୋଳନରେ ଯୋଗ ଦେବେ। ୨୮ ଶହ ଗ୍ରେଡ୍‌ ପେ’ ଦେଇ ସପ୍ତମ ବେତନ କମିଶନର ସଂଶୋଧନ, କନିଷ୍ଠ ଶିକ୍ଷକଙ୍କ ମୂଳ ଦରମାର ୨୫ ପ୍ରତିଶତ ବୃଦ୍ଧି, ପେନସନ୍‌ ବ୍ୟବସ୍ଥା ଲାଗୁ, କନିଷ୍ଠ ଶିକ୍ଷକଙ୍କ ବଦଳି ନୀତିକୁ ବଳବତ୍ତର ଏବଂ ଠିକା କାର୍ଯ୍ୟକାଳକୁ ମୂଳ ଚାକିରିରେ ଗଣନା କରିବା ଦାବିରେ ସଂଘ ଏହି ଚେତାବନୀ ଦେଇଛି।

ବିଶ୍ୱ କର୍କଟ ଦିବସ

ଫେବୃୟାରୀ ୪ ତାରିଖକୁ ବିଶ୍ୱ କର୍କଟ ଦିବସ ଭାବେ ପାଳନ କରାଯାଉଛି । ଏବେ ଏହି ସମସ୍ୟା ବିଶ୍ୱବାସୀଙ୍କ ପାଇଁ ଚିନ୍ତାର କାରଣ ପାଲଟିଛି । କାରଣ ପ୍ରତିବର୍ଷ ବିଶ୍ୱରେ କ୍ୟାନସର ଜନିତ ମୃତ୍ୟୁସଂଖ୍ୟା ପ୍ରାୟ ୮୦ଲକ୍ଷ ଛୁଇଁଲାଣି । ଏଥିମଧ୍ୟରୁ ସମୟ ପୂର୍ବରୁ ପ୍ରାୟ ୪୦ ଲକ୍ଷ ଲୋକଙ୍କର ମୃତ୍ୟୁ ହୋଇଥିବା ଏକ ଅଧ୍ୟୟନରୁ ଜଣାପଡିଛି । ଏମାନଙ୍କ ମଧ୍ୟରେ ରହିଛନ୍ତି ୩୦ରୁ ୬୯ ବର୍ଷର ବ୍ୟକ୍ତି ।  ୨୦୦୦ ମସିହାରେ ପ୍ରଥମେ ବିଶ୍ୱ କର୍କଟ ଦିବସ ପାଳନ କରାଯାଇଥିଲା । କ୍ୟାନସର ସମ୍ପର୍କରେ ଲୋକଙ୍କୁ ସଚେତନ କରାଇବା ଏହାର ମୁଖ୍ୟ ଉଦ୍ଦେଶ୍ୟ ।

ପୂର୍ବତନ ବିଧାୟକ ହରିହର କରଣଙ୍କ ପରଲୋକ

ପୂର୍ବତନ ବିଧାୟକ ତଥା ବରିଷ୍ଠ କଂଗ୍ରେସ ନେତା ହରିହର କରଣଙ୍କ ଆଜି ଚିକିତ୍ସିତ ଅବସ୍ଥାରେ ଭୁବନେଶ୍ୱରର ଏକ ଘରୋଇ ହସ୍‌ପିଟାଲରେ ପରଲୋକ ଘଟିଛି । ଶ୍ରୀ କରଣ ସେପ୍ଟଟିସେମିଆରେ ପୀଡ଼ିତ ହୋଇ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । ମୃତ୍ୟୁ ବେଳକୁ ତାଙ୍କୁ ୭୨ ବର୍ଷ ବୟସ ହୋଇଥିଲା । ୧୯୪୭ ମସିହାରେ ଜନ୍ମିତ ଶ୍ରୀ କରଣ ଛାତ୍ର ଜୀବନରୁ ରାଜନୀତି ସହିତ ସମ୍ପୃକ୍ତ ଥିଲେ । ଶ୍ରୀ କରଣ ପ୍ରଥମେ ସ୍ୱାଧୀନ ଭାବେ ନିର୍ବାଚନ ଲଢ଼ି ୧୯୭୪ ମସିହାରେ ୬ଷ୍ଠ ବିଧାନସଭାକୁ ନିର୍ବାଚିତ ହୋଇଥିଲେ । ରାଜ୍ୟ କଂଗ୍ରେସ କମିଟିର ସାଧାରଣ ସଂପାଦକ ଓ ଏଆଇସିସି ସଦସ୍ୟ ଓ ଓଡ଼ିଶା ସରକାରରେ ରାଷ୍ଟ୍ରମନ୍ତ୍ରୀ ଭାବେ ଶ୍ରୀ କରଣ କାର୍ଯ୍ୟ କରିଥିଲେ ।

ଇଦ୍‌ରେ ବିବାହ କରିବେ ସଲମାନ୍‌

ମୋଷ୍ଟ୍‌ ଇଲିଜିବଲ୍‌ ବ୍ୟାଚେଲର୍‌ ଭାବେ ଏହି ୫୩ ବର୍ଷୀୟ ଅଭିନେତା ଜଣକ ନିଜ ବିବାହକୁ ନେଇ ସବୁବେଳେ ଚର୍ଚ୍ଚାରେ । ନିକଟରେ ଏକ ଭିଡ଼ିଓ ଆସିଛି ଯେଉଁଥିରେ ସଲମାନ୍‌ ବଲିଉଡ୍‌ ଅଭିନେତ୍ରୀ କ୍ୟାଟ୍ରିନା କୈଫ୍‌ଙ୍କୁ ବିବାହ କରୁଥିବାର ଦୃଶ୍ୟ ରହିଛି । ତେବେ ଏହା ଅସଲରେ ନୁହେଁ । ଇଦ୍‌ ଅବସରରେ ରିଲିଜ୍‌ ହେବାକୁ ଥିବା ତାଙ୍କର ଅପ୍‌କମିଙ୍ଗ୍‌ ମୁଭି ‘ଭାରତ’  ପାଇଁ ସେ ଏହି ୱେଡିଂର ଶୁଟ୍‌ କରିଛନ୍ତି । ରିୟଲ୍‌ରେ ନ ହେଉ ରିଲ୍‌ରେ ସଲ୍‌ମାନଙ୍କ ବିବାହକୁ ଦେଖି ତାଙ୍କ ପ୍ରଶଂସକମାନେ ଖୁସି ହେବେ ନିଶ୍ଚୟ ।

ଦିଦିଙ୍କୁ ସମର୍ଥନ ଦେଲା ବିଜେଡି

ସିବିଆଇ-ମମତାଙ୍କ ବିବାଦରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ସମର୍ଥନ ଦେଇଛି ବିଜେଡି । ସାଧାରଣ ନିର୍ବାଚନ ପୂର୍ବରୁ ସିବିଆଇର ହଠାତ କାର୍ଯ୍ୟାନୁଷ୍ଠାନ ଅଣପେସାଦାର ମନୋଭାବକୁ ଦର୍ଶାଉଛି ବୋଲି ଲୋକସଭାରେ ନିଜର ବକ୍ତବ୍ୟ ରଖିଛନ୍ତି ବିଜେଡି ସାଂସଦ ଭର୍ତ୍ତୃହରି ମହତାବ । ସିବିଆଇ ଏକ ରାଜନୈତିକ ଅସ୍ତ୍ର ପାଲଟି ଯାଇଛି ବୋଲି ମହତାବ କହିଛନ୍ତି । ଓଡ଼ିଶାରେ ମଧ୍ୟ ସିବିଆଇ ରାଜନୈତିକ ଅସ୍ତ୍ର ପାଲଟି ବିଜୁ ଜନତା ଦଳର ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ କରୁଛି ବୋଲି ସାଂସଦ ଭର୍ତ୍ତୃହରି ମହତାବ ଅଭିଯୋଗ କରିଛନ୍ତି ।

ବିଧାନସଭାର ବଜେଟ ଅଧିବେଶନ ଆରମ୍ଭ : ଅଭିଭାଷଣ ରଖିଲେ ରାଜ୍ୟପାଳ ଗଣେଶୀ ଲାଲ୍

ଆରମ୍ଭ ହୋଇଯାଇଛି ବିଧାନସଭା ବଜେଟ୍ ଅଧିବେଶନ ।  ପଞ୍ଚଦଶ ବିଧାନସଭାର ଶେଷ ଅଧିବେଶନ ଆଜି ଠାରୁ ଆରମ୍ଭ ହୋଇଛି । ଏହା ୧୨ ତାରିଖ ପର୍ଯ୍ୟନ୍ତ ଚାଲିବ । ରାଜ୍ୟପାଳ ପ୍ରଫେସର ଗଣେଶୀ ଲାଲ ବଜେଟ୍‌ ଅଧିବେଶନର ଆରମ୍ଭରେ ଅଭିଭାଷଣ ପ୍ରଦାନ କରିଛନ୍ତି । ନବୀନ ସରକାରଙ୍କ ଚତୁର୍ଦ୍ଦଶ ପାଳିର ଶେଷ ବଜେଟ୍‌ ଅଧିବେଶନ୍‌ରେ ରାଜ୍ୟପାଳ ତାଙ୍କ ଅଭିଭାଷଣରେ ସରକାରଙ୍କ ଲୋକାଭିମୁଖୀ ଯୋଜନା ସହିତ ଓଡ଼ିଶାର ବିକାଶର ଗାଥା ବର୍ଣ୍ଣନା କରିଛନ୍ତି ।

ଚଳିତ ବର୍ଷ ଶେଷ ସୁଦ୍ଧା ଆସିବ ‘ମୁନ୍ନା ଭାଇ’ର ତୃତୀୟ ସିକ୍ୟୁଏଲ୍‌

ପୂର୍ବରୁ ମୁନ୍ନାଭାଇ ଏମ୍‌ବିବିଏସ୍‌ର ଦୁଇଟି ସଂସ୍କରଣ ଦର୍ଶକଙ୍କୁ ବେଶ ପସନ୍ଦ ଆସିଛି । ଏହାକୁ ନେଇ ଆଗାମୀ ଦିନରେ ଏହାର ତୃତୀୟ ସିକ୍ୟୁଏଲ୍‌ ହେବା ନେଇ ଖବର ଆସିଥିଲା । ମାତ୍ର #ମି’ଠୁ ଅଭିଯାନରେ ନିର୍ଦ୍ଦେଶକ ରାଜକୁମାର ହିରାନୀ ଛନ୍ଦି ହେବା ପରେ ଫିଲ୍ମ ନିର୍ମାଣକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଥିଲା । ତେବେ ଏହା ଉପରେ ପୂର୍ଣ୍ଣଚ୍ଛେଦ ପକାଇଛନ୍ତି ଫିଲ୍ମ ନିର୍ମାତା ବିଧୁ ବିନୋଦ ଚୋପ୍ରା ।  ଚଳିତ ବର୍ଷ ଶେଷ ସୁଦ୍ଧା ଏହା ପରଦାକୁ ଆସିବ ବୋଲି ସେ କହିଛନ୍ତି ।

ଦାବି ପୂରଣ ନ ହେଲେ ପଦ୍ମଭୂଷଣ ଫେରାଇବେ ଆନ୍ନା

ଦେଶର ଲୋକପାଳ ନିଯୁକ୍ତିରେ ଅହେତୁକ ବିଳମ୍ବ ଘଟୁଥିବା ଘଟଣାରେ ତୀବ୍ର ଅସନ୍ତୋଷ ପ୍ରକାଶ କରି ନିଜର ରାଷ୍ଟ୍ରୀୟ ସମ୍ମାନ ‘ପଦ୍ମ ଭୂଷଣ’କୁ ଫେରାଇ ଦେବାକୁ ଧମକ ଦେଇଛନ୍ତି ବିଶିଷ୍ଟ ସମାଜସେବୀ ଆନ୍ନା ହଜାରେ। କେନ୍ଦ୍ରରେ ଲୋକପାଳ ଓ ରାଜ୍ୟରେ ଲୋକାୟୁକ୍ତ ନିଯୁକ୍ତିକୁ ନେଇ ଦୀର୍ଘ ଦିନରୁ ଦାବି କରି ଆସୁଥିବା ଭ୍ରଷ୍ଟାଚାର ବିରୋଧୀ ଆନ୍ନା ହଜାରେ ।  ତାଙ୍କ ଦାବି ପ୍ରତି ସରକାରଙ୍କ ଅଣଦେଖାକୁ ନେଇ ଆନ୍ନା ଏଭଳି ନିଷ୍ପତ୍ତି ନେଇଛନ୍ତି ବୋଲି କହିଛନ୍ତି । ଯଦି ସରକାର ଏ ଦିଗରେ କୌଣସି ପଦକ୍ଷେପ ନ ନିଅନ୍ତି ତେବେ ଆନ୍ନା ଆସନ୍ତା ୮ କିମ୍ବା ୯ ତାରିଖରେ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ସେ ପାଇଥିବା ‘ପଦ୍ମ ଭୂଷଣ’କୁ ଫେରାଇ ଦେବେ ବୋଲି ପ୍ରକାଶ କରିଛନ୍ତି।

ପୁଣି ବିବାଦୀୟ ମନ୍ତବ୍ୟ ଦେଲେ ଗଡ଼କରୀ

ଭାଜପାର କେନ୍ଦ୍ରୀୟ ପରିବହନ ମନ୍ତ୍ରୀ ନୀତୀନ ଗଡ଼କରୀ ନିଜ ବିବାଦୀୟ ମନ୍ତବ୍ୟ ନେଇ ସବୁବେଳେ ଚର୍ଚ୍ଚାରେ । ଏବେ ପୁଣି ତାଙ୍କର ଏପରି ଏକ ମନ୍ତବ୍ୟ ନେଇ ଆରମ୍ଭ ହୋଇଛି ଚର୍ଚ୍ଚା । ଗଡ଼କରୀ କହିଛନ୍ତି ଯେ, ଦେଶ ସମ୍ଭାଳିବା ପୂର୍ବରୁ ଜଣେ ନିଜ ଘର ସମ୍ଭାଳିବା ଜରୁରୀ । ନିଜ ଘରକୁ ସମ୍ଭାଳି ପାରୁ ନ ଥିବା ଲୋକ ଦେଶ କିପରି ସମ୍ଭାଳିବ ବୋଲି ପ୍ରଶ୍ନ କରିଛନ୍ତି ଗଡ଼କରୀ । ନାଗପୁରଠାରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି), ବିଜେପିର ଷ୍ଟୁଡେଣ୍ଟ ୱିଙ୍ଗ୍‌ରେ ଯୋଗ ଦେଇ ଗଡକରୀ ଏଭଳି ମନ୍ତବ୍ୟ ଦେଇଛନ୍ତି । ପୂର୍ବରୁ ଗଡ଼କରୀ ମନ୍ତବ୍ୟ ମାଧ୍ୟମରେ ମୋଦିଙ୍କ ପ୍ରତି ଖୋଲାଖୋଲି ଚ୍ୟାଲେଞ୍ଜ୍‌ ମଧ୍ୟ ସୃଷ୍ଟି କରିସାରିଛନ୍ତି ।

ମୋଦି ରାଜନୀତିରୁ ସନ୍ନ୍ୟାସ ନେଲେ ମୁଁ ମଧ୍ୟ ସନ୍ନ୍ୟାସ ନେବି : ସ୍ମୃତି ଇରାନୀ

କେନ୍ଦ୍ରମନ୍ତ୍ରୀ ସ୍ମୃତି ଇରାନୀଙ୍କ ବୟାନକୁ ଏବେ ସାରା ଦେଶରେ ଚର୍ଚ୍ଚା ଜୋର ଧରିଛି । ୱାର୍ଡ୍ସ କାଉଣ୍ଟ ମହୋତ୍ସବରେ ଯୋଗ ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରତି ଆନୁଗତ୍ୟ ପ୍ରଦର୍ଶନ କରିଛନ୍ତି । ମୋଦିଙ୍କୁ ଦେଶର ପ୍ରଧାନ ସେବକ କହିଛନ୍ତି ସ୍ମୃତି । ଏହା ସହିତ ମୋଦି ଯଦି ରାଜନୀତିରୁ ସନ୍ନ୍ୟାସ ନେବେ, ତେବେ ସେ ମଧ୍ୟ ରାଜନୀତି କରିବେ ନାହିଁ ବୋଲି ସ୍ମୃତି କହିଛନ୍ତି । ୨୦୧୯ ଆଗାମୀ ନିର୍ବାଚନକୁ ନେଇ କହିଛନ୍ତି ଯେ ଆଗାମୀ ସମୟରେ କ’ଣ ହେବ ତାହା କହିବା କଷ୍ଟସାପେକ୍ଷ, କିନ୍ତୁ ବିଶ୍ଵାସ ରହିଛି ଯେ ଲୋକମାନେ ଉପଯୁକ୍ତ ଲୋକଙ୍କୁ ନିର୍ବାଚିତ କରାଇବେ ।

୪୫ ବର୍ଷରେ ପାଦ ଦେଲେ ରଙ୍ଗିଲା ଗାର୍ଲ ଉର୍ମିଳା

ବଲିଉଡ୍‌ର ‘ରଙ୍ଗିଲା ଗାର୍ଲ’ ଭାବେ ପରିଚିତି ହାସଲ କରିଥିବା ଉର୍ମିଲା ମାତୋଣ୍ଡକର ୪୫ ବର୍ଷରେ ପାଦଦେଇଛନ୍ତି । ସେ ୧୯୭୪ ଜାନୁୟାରୀ ୪ରେ ମୁମ୍ବାଇଠାରେ ଜନ୍ମଗ୍ରହଣ କରିଥିଲେ। ତାଙ୍କ ମା ରୁକ୍‌ଶାନା ସୁଲତାନା ଜଣେ ମୁସଲମାନ୍‌ ଥିବାବେଳେ ପିତା ଶିବିନ୍ଦର ସିଂ ଜଣ ପଞ୍ଜାବି ହିନ୍ଦୁ। ୧୯୮୩ରେ ଉର୍ମିଳା ଶିଶୁ କଳାକାର ଭାବେ ମାସୁମ୍‌ ଫିଲ୍ମରେ ଅଭିନୟ କରିଥିଲେ। ପରେ ୧୯୯୨ରେ ରାମଗୋପାଳ ବର୍ମାଙ୍କ ଫିଲ୍ମ ରଙ୍ଗିଲାରେ ଉର୍ମିଳାଙ୍କୁ ମିଳିଥିଲା ଷ୍ଟାର ଡମ୍‌। ‘ସତ୍ୟା’, ‘ଖୁବ୍‌ସୁରତ୍‌’, ‘ଜୁଦାଇ’, ‘ଜଙ୍ଗଲ୍‌’, ‘ଭୂତ୍‌’ ‘ନୈନା’, ‘ପିଞ୍ଜର୍‌’, ‘ମେନେ ଗାନ୍ଧି କୋ ନହିଁ ମାରା’, ‘ବସ୍‌ ଏକ ପଲ୍‌’ ଆଦି ସିନେମାରେ ଅଭିନୟ କରିଛନ୍ତି । ନିଜଠାରୁ ୧୦ ବର୍ଷ ସାନ ବିଜିନେସ୍‌ମ୍ୟାନ୍‌ ମୋହସିନ୍‌ ଅଖତର୍‌ଙ୍କୁ ୨୦୧୬ରେ ବିବାହ କରିଛନ୍ତି ।

ବିଧାନସଭାର ବଜେଟ ଅଧିବେଶନ, ପୁଣି ସରଗରମ ହେବ ଗୃହ

ଆଜିଠୁ ଆରମ୍ଭ ହେଉଛି ବିଧାନସଭାର ବଜେଟ ଅଧିବେଶନ। ଆସନ୍ତା ୭ ତାରିଖରେ ୨୦୧୯-୨୦ ଆର୍ଥିକ ବର୍ଷ ପାଇଁ ଅର୍ଥମନ୍ତ୍ରୀ ଶଶିଭୂଷଣ ବେହେରା ଆଗତ କରିବେ କାମଚଳା ବଜେଟ୍। ୪ ମାସ ପାଇଁ ଏହି ବଜେଟ ଆସିବ। ଆସନ୍ତା ୧୨ ତାରିଖ ପର୍ଯ୍ୟନ୍ତ ଚାଲିବ ଏହି ସ୍ୱଳ୍ପକାଳୀନ ଅଧିବଶେନ। ଏଥିପାଇଁ ତିନି ପ୍ରମୁଖ ରାଜନୈତିକ ଦଳ ବିଜେଡି, କଂଗ୍ରେସ ଓ ବିଜେପି ରଣନୀତି ପ୍ରସ୍ତୁତ କରିଛନ୍ତି। ବିଶେଷ କରି କୃଷି ଓ କୃଷକ ସମ୍ୟାକୁ ନେଇ ଗୃହ ସରଗରମ ରହିବା ସମ୍ଭାବନା ରହିଛି। ସେହିପରି ମହିଳା ସୁରକ୍ଷା ପ୍ରସଙ୍ଗ ବି ଉଠିପାରେ।

ରାଜୀବ କୁମାରଙ୍କ ବିରୋଧରେ ପ୍ରମାଣ ରହିଛି: ନାଗେଶ୍ୱର ରାଓ

ସିବିଆଇର ଅନ୍ତରୀଣ ନିର୍ଦ୍ଦେଶକ ଏମ୍. ନାଗେଶ୍ୱର ରାଓ କହିଛନ୍ତି, କୋଲକାତା ପୋଲିସ କମିଶନର ରାଜୀବ କୁମାରଙ୍କ ବିରୋଧରେ ପ୍ରମାଣ ରହିଛି। ପ୍ରତିକ୍ରିୟାରେ ସେ କହିଛନ୍ତି, ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ଚିଟଫଣ୍ଡ ଦୁର୍ନୀତିର ତଦନ୍ତ କରୁଛି ସିବିଆଇ। ପୂର୍ବରୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ପଶ୍ଚିମବଙ୍ଗ ସରକାର ରାଜୀବ କୁମାରଙ୍କ ଅଧ୍ୟକ୍ଷତାରେ ଏସଆଇଟି ଗଠନ କରିଥିଲେ। ସେହିପରି ଏହି ମାମଲାରେ ପଶ୍ଚିମବଙ୍ଗ ରାଜ୍ୟପାଳ କେଶରୀନାଥ ତ୍ରିପାଠୀଙ୍କୁ ଭେଟିବାକୁ ସମୟ ମାଗିଛି ସିବିଆଇ। ଏହି ମାମଲାରେ ରାଜ୍ୟପାଳଙ୍କ ସହ ଆଲୋଚନା କରିବେ ସିବିଆଇ କର୍ତ୍ତୃପକ୍ଷ।

ମମତାଙ୍କୁ ରାହୁଲ, କେଜରିୱାଲ, ଅଖିଳେଶଙ୍କ ସମେତ ବହୁ ନେତାଙ୍କ ସମର୍ଥନ

ମମତା ବାନାର୍ଜୀଙ୍କ ସମର୍ଥନରେ ବାହାରିଛନ୍ତି ବିଜେପି ବିରୋଧୀ ଦଳ। ସମର୍ଥନ କରିଛନ୍ତି କଂଗ୍ରେସ ଅଧ୍ୟକ୍ଷ ରାହୁଲଗାନ୍ଧି। ଫୋନ ଯୋଗେ ସେ ମମତାଙ୍କ ସହ କଥା ହୋଇଛନ୍ତି। ସେହିପରି ଆମ୍ ଆଦମୀ ପାର୍ଟି ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଆଜି ମମତାଙ୍କୁ ଭେଟିବା ପାଇଁ କୋଲକାତା ଆସି ପାରନ୍ତି। କେଜରିୱାଲ ଟ୍ୱିଟ୍ କରି ଲେଖିଛନ୍ତି, ମୋଦି-ଶାହ ଯୋଡ଼ି ଦେଶର ଗଣତନ୍ତ୍ର ଓ ସଂଘୀୟ ବ୍ୟବସ୍ଥା ପ୍ରତି ବିପଦ। ସେହିପରି ସମାଜବାଦୀ ପାର୍ଟି ସୁପ୍ରିମୋ ତଥା ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ ଓ ଲାଲୁ ପ୍ରସାଦ ଯାଦବ ବି ମମତାଙ୍କ ସମର୍ଥନରେ ବାହାରିଛନ୍ତି।

ମୋଦି ଓ ଶାହଙ୍କ ଉପରେ ବର୍ଷିଲେ ଦିଦି, ଧାରଣାରେ ବସିଲେ

ସିବିଆଇ-ପୋଲିସ ମୁହାଁମୁହିଁ ଘଟଣା ପରେ କେନ୍ଦ୍ର ସରକାର ବିରୋଧରେ ଧାରଣା ଦେଇଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ମେଟ୍ରୋ ଚ୍ୟାନେଲ ଆଗରେ ଧାରଣା ଦେଇଛନ୍ତି ଦିଦି। ମମତା କହିଛନ୍ତି, ବିଜେପି ପଶ୍ଚିମବଙ୍ଗ ଉପରେ ଅତ୍ୟାଚାର କରୁଛି। ଦେଶରେ ବର୍ତ୍ତମାନ ଅବସ୍ଥା ଜରୁରିକାଳୀନଠୁ ମଧ୍ୟ ଖରାପ ରହିଛି। ସିବିଆଇ ଉପରେ ଚାପ ପକାଉଛନ୍ତି କେନ୍ଦ୍ର ସରକାର। ମୋଦି ଓ ଅମିତ ଶାହଙ୍କୁ ଟାର୍ଗେଟ୍ କରି ମମତା କହିଛନ୍ତି, ବିଜେପି ରାଲିକୁ ଅନୁମତି ନଦେବାରୁ ଜାଣିଶୁଣି ପଶ୍ଚିମବଙ୍ଗରେ ଅରାଜକତା ସୃଷ୍ଟି ପାଇଁ ଉଦ୍ୟମ କରାଯାଉଛି। ଗଣତନ୍ତ୍ର ଓ ସମ୍ବିଧାନକୁ ବଞ୍ଚାଇବା ପାଇଁ ସେ ଧାରଣା ଦେଉଛନ୍ତି ବୋଲି କହିଛନ୍ତି ମମତା।

ପଶ୍ଚିମବଙ୍ଗରେ ପୋଲିସ ବନାମ ସିବିଆଇର ହାଇଡ୍ରାମା

କୋଲକାତା ପୋଲିସ କମିଶନର ରାଜୀବ କୁମାରଙ୍କୁଚିଟଫଣ୍ଡ ଦୁର୍ନୀତି ମାମଲାରେ ପଚରାଉଚରା କରିବାକୁ ଯାଇଥିବା ବେଳେ ସିବିଆଇ ଟିମକୁ ଅଟକ ରଖିଥିଲା ପଶ୍ଚିମବଙ୍ଗ ପୋଲିସ। କିଛି ସମୟ ପାଇଁ ୫ ଜଣିଆ ସିବିଆଇ ଟିମକୁ ଅଟକ ରଖାଯାଇଥିଲା। ଭାରତ ଇତିହାସରେ ବୋଧେ ଏହା ପ୍ରଥମ ଘଟଣା, ସିବିଆଇ ଅଧିକାରୀଙ୍କୁ କୌଣସି ରାଜ୍ୟ ପୋଲିସ ଅଟକ ରଖିବା। ଶାରଦା ଚିଟଫଣ୍ଡ ମାମଲାରେ କୋଲକାତା ପୋଲିସ କମିଶନରଙ୍କ ନାଁରେ ଅଭିଯୋଗ ରହିଛି। ସିବିଆଇ ନୋଟିସର ସେ ଉତ୍ତର ଦେଉ ନାହାନ୍ତି। ପଚରାଉଚରା ପାଇଁ ଗତକାଲି ରାଜୀବ କୁମାରଙ୍କ ବାସଭବନକୁ ସିବିଆଇ ଯାଇଥିବା ବେଳେ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା। ଅଭିଯୋଗ ହୋଇଛି, ଶାରଦା ଚିଟଫଣ୍ଡ ମାମଲାର କିଛି ଫାଇଲ୍ ଗାଏବ କରି ଦେଇଛନ୍ତି ରାଜୀବ କୁମାର।

ଚର୍ଚ୍ଚାରେ କ୍ୟାଟ୍‌ଙ୍କ  ଭିଡ଼ିଓ

ବଲିଉଡ୍‌ ଅଭିନେତ୍ରୀ କ୍ୟାଟ୍ରିନା କୈଫ୍‌ ନିକଟରେ ନିଜ ଇନ୍‌ଷ୍ଟାଗ୍ରାମ୍‌ରେ ଏକ ଭିଡ଼ଓ ଅପଲୋଡ କରିଛନ୍ତି। ଯେଉଁଥିରେ ସେ ରେଡ୍‌ ଆଉଟ୍‌ଫିଟ୍‌ରେ ବହୁତ ଆକର୍ଷଣୀୟ ଲାଗୁଛନ୍ତି । ସେ ଏହି ଭିଡ଼ିଓରେ କିଛି ସ୍ପେଶିଆଲ୍‌ ମୁଭ୍‌ କରିବା ସହିତ ୱିକେଣ୍ଡ୍‌ରେ ଏମିତି କିଛି କହି ପୋଷ୍ଟ କରିଛନ୍ତି । ଏହି ଆର୍କଷଣୀୟ ଭିଡ଼ିଓଟି ସୋସିଆଲ୍‌ ମିଡ଼ିଆରେ ଚର୍ଚ୍ଚା ହୋଇଛି । ଏହି ଭିଡ଼ିଓରେ ଅଭିନେତ୍ରୀ ଦୀପିକା ପାଦୁକୋନ୍‌ ଷ୍ଟପ୍‌ ଇଟ୍‌ କହି ଲଭ୍‌ ସାଇନ୍‌ର କମେଣ୍ଟ ଦେଇଛନ୍ତି । କେବଳ ଦୀପିକା ନୁହଁନ୍ତି ଦୀୟା ମିର୍ଜା, ବରୁଣ ଧାୱନ୍‌ ମଧ୍ୟ ହଟ୍‌ ଇମେଜ୍‌ ଦେଇଛନ୍ତି ।  ସମ୍ପ୍ରତି କ୍ୟାଟ୍ରିନା ସଲ୍‌ମନ୍‌ଙ୍କ ସହିତ ’ଭାରତ’ ଫିଲ୍ମରେ ବ୍ୟସ୍ତ ଅଛନ୍ତି ।