ଜାପାନର ନୂଆ ଶ୍ରମ ନୀତି

ଜାପାନ ଏକ ନୂଆ ଶ୍ରମ ନୀତିକୁ ମଞ୍ଜୁରୀ ଦେଇଛି ।  ଚାଇନା, ଇଣ୍ଡୋନେସିଆ, ମିଆଁମାର, ନେପାଲ, ଥାଇଲାଣ୍ଡ ଏବଂ ଫିଲିପାଇନ୍ସର ଯୋଗ୍ୟ ତଥା ବ୍ଲୁ କଲର ଭିସାଧାରୀଙ୍କ ପାଇଁ ନିଜ ଶ୍ରମ ବଜାର ଉନ୍ମୁକ୍ତ କରିଛି । ଏହି ନୂତନ ଭିସା ପଦ୍ଧତି ଆସନ୍ତା ଏପ୍ରିଲରୁ ଲାଗୁ ହେବ। ଏହି ନୂତନ ବ୍ୟବସ୍ଥା ଅନୁଯାୟୀ ଦେଶକୁ ବହୁ ପରିମାଣରେ ବ୍ଲୁ କଲର ଶ୍ରମିକମାନଙ୍କ ଆଗମନ ହେବ ଏବଂ ଏହା ନୂତନ ଭିସା ନିୟମରୁ ଫାଇଦା ନେବାକୁ ଲକ୍ଷ୍ୟ ରଖିଥିବା ଶ୍ରମିକମାନଙ୍କୁ ସହାୟକ ହେବ । ନିକଟରେ କିଛି ଦେଶର ଲୋକଙ୍କୁ ବ୍ଲୁ କଲର ଜବ ଦେବା ପାଇଁ ପ୍ରଚଳିତ ଇମିଗ୍ରେସନ ଆଇନରେ ଜାପାନ ସଂଶୋଧନ କରିଛି ।

ଚର୍ଚ୍ଚାରେ ଖାନ୍‌ ବ୍ରଦର୍ସଙ୍କ ଡ୍ୟାନ୍‌ସ୍‌

ବି’ ଟାଉ‌ନ୍‌ର ଅଧିକାଂଶ ଅଭିନେତା-ଅଭିନେତ୍ରୀ ପରିବାର ଛାଡ଼ି ଏକା ରହିବାକୁ ଭଲ ପାଉଥିବାବେଳେ ‘ଦବଙ୍ଗ ଖାନ୍‌’ ସଲ୍‌ମାନ୍‌ ଓ ତାଙ୍କ ପରିବାର କିନ୍ତୁ ଏ କ୍ଷେତ୍ରରେ ଅନ୍ୟମାନଙ୍କ ଠାରୁ ନିଆରା। ସଲମାନ୍‌ ଓ ତାଙ୍କ ପୂରା ପରିବାର ଗ୍ୟାଲାକ୍ସି ଆପାର୍ଟ୍‌ମେଣ୍ଟ୍‌ରେ ଏକାଠି ରହୁଛନ୍ତି। ସଲମାନ୍‌ ଓ ତାଙ୍କ ପରିବାର ସହ ପ୍ରତିଟି ଉତ୍ସବ ପାଳନ୍ତି ଓ ପରସ୍ପର ସହ ଖୁବ୍ ମଜା ମସ୍ତି କରନ୍ତି। ଏବେ କ୍ରିସ୍‌ମାସ୍‌ ପାର୍ଟିରେ ତିନି ଭାଇ ଏକାଠି  ଡ୍ୟାନ୍‌ସ୍‌ କରି କ୍ରିସ୍‌ମାସ୍‌ ସେଲିବ୍ରେଟ୍‌ କରୁଥିବା ଏକ ଭିଡିଓ ସାମ୍ନାକୁ ଆସିଛି, ଯାହା ସୋସିଆଲ୍ ମଡିଆରେ ଖୁବ୍ ଭାଇରାଲ୍‌ ହେଉଛି। ଏହି ଡ୍ୟାନ୍‌ସ୍‌ ଭିଡିଓଟି ହେଉଛି ସଲ୍‌ମାନ୍‌ଙ୍କ ଭଉଣୀ ଅର୍ପିତା ଖାନ୍‌ଙ୍କ ଘରେ ହୋଇଥିବା କ୍ରିସ୍‌ମାସ ପାର୍ଟିର।

ଆଉ ଆସିବନି କିମ୍ଭୋ

ବାବା ରାମଦେବଙ୍କ ପତଞ୍ଜଳି କମ୍ୟୁନିକେସନ ପକ୍ଷରୁ ନୂଆ ମେସେଜିଂ ଆପ ’କିମ୍ଭୋ’ ଲଞ୍ଚ୍‌ କରାଯାଇଥିଲା। ବହୁଳ ବ୍ୟବହୃତ ଆପ ହ୍ଵାଟସଆପକୁ କିମ୍ଭୋ ଟକ୍କର ଦେବ ବୋଲି କୁହାଯାଉଥିଲ। କିନ୍ତୁ ମାର୍କେଟକୁ ଆସିବା ପୂର୍ବରୁ ଏହି ପ୍ରକଳ୍ପକୁ ବନ୍ଦ କରାଯିବାକୁ  ନିଷ୍ପତ୍ତି ନିଆଯାଇଛି ବୋଲି ପତଞ୍ଜଳୀ ପକ୍ଷରୁ କୁହାଯାଇଛି। ସମ୍ପୂର୍ଣ୍ଣ ସ୍ଵଦେଶୀ ଜ୍ଞାନକୌଶଳରେ ନିର୍ମିତ ଏହି ଆପ ମେ ୩୦ରେ ଲଞ୍ଚ୍‌ କରାଯାଇଥିଲା। ଏହି ସୋସିଆଲ ମେସେଜ ଆପ୍‌ ‘କିମ୍ଭୋ’ ଗୋପନୀୟତା ଓ ବ୍ୟବହାରକାରୀଙ୍କ ବ୍ୟକ୍ତିଗତ ତଥ୍ୟର ସୁରକ୍ଷା ଦୃଷ୍ଟିରୁ ହ୍ଵାଟସଅପ୍‌ର ସମକକ୍ଷ ହେବ ବୋଲି ପତଞ୍ଜଳି ଦାବି କରିଥିଲା। କିନ୍ତୁ ସେଭଳି ହୋଇପାରି ନଥିବାରୁ ଏହି ଆପ୍‌ର ବଜାର ପ୍ରବେଶରୁ ଓହରି ଯାଇଛି ପତଞ୍ଜଳି।

ଅଭିନବ ଉପାୟରେ ସୁନା ଚାଲାଣ : କେଜିଏ ସୁନା ଜବତ

ସୁରକ୍ଷାକର୍ମୀଙ୍କୁ ଚକମା ଦେଖାଇ ମଳଦ୍ୱାରରେ ସୁନା ନେଇ ଚୋରା ଚାଲାଣ କରୁଥିବା ବେଳେ ଜୟପୁର ଅନ୍ତର୍ଜାତୀୟ ବିମାନ ବନ୍ଦରରୁ ଜଣେ ୩୦ ବର୍ଷିୟ ବ୍ୟକ୍ତିଙ୍କୁ ଗିରଫ କରାଯାଇଛି। ଅଭିଯୁକ୍ତ ଜଣକ ହେଲେ ପଙ୍କଜ ସାଦୁଓ୍ଵାନି। ବ୍ୟାଙ୍କକ୍‌ରୁ ସୁନା ନେଇ ଜୟପୁର ଆସୁଥିବା ବେଳେ ସନ୍ଦେହରେ ସମ୍ପୃକ୍ତ ବ୍ୟକ୍ତିକୁ ଯାଞ୍ଚ କରାଯାଇଥିଲା। ତେବେ ଯାଞ୍ଚ ବେଳେ କେଜିଏ ଓଜନର ସୁନା ଜବତ କରାଯାଇଥିଲା। ଯାହାର ମୂଲ୍ୟ ଅନ୍ତର୍ଜାତୀୟ ବଜାରରେ ୩୦ ଲକ୍ଷ ଟଙ୍କା ହେବ।

ଭିନ୍ନକ୍ଷମ ଯୁବକଙ୍କୁ ମାଡ ମାରି ବିବାଦରେ ଫସିଲେ ବିଜେପି ନେତା

ଉତ୍ତରପ୍ରଦେଶ ଭାରତୀୟ ଜନତା ପାର୍ଟି (ବିଜେପି) ନେତା ମହମ୍ମଦ ମିଆ ଜନୈକ ଭିନ୍ନକ୍ଷମ ଯୁବକଙ୍କୁ ରାଜରାସ୍ତା ଉପରେ ଗୋଟିଏ ବାଉଁଶ ବାଡ଼ିରେ ମାଡ଼ ମାରିବାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଏବେ ବିବାଦରେ ପଡ଼ି ଯାଇଛନ୍ତି ଏହି ବିଜେପି ନେତା ଜଣକ । ସଂପୃକ୍ତ ଭିନ୍ନକ୍ଷମ ଯୁବକ ଜଣକ, ରାଜରାସ୍ତା ଉପରେ ‘ଅଖିଳେଶ ଯାଦବ ଜିନ୍ଦାବାଦ!’ ‘ଭୋଟ ଦେଙ୍ଗେ ଅଖିଲେଶ କୋ!’ କହିବା ସହ ମୋଦୀଙ୍କୁ ବିରୋଧ କରୁଥିଲେ। ତେବେ ଏହି ଘଟଣାରେ ବିଜେପି ନେତାଜଣକ ନିଜ ସପକ୍ଷରେ କହିଛନ୍ତି ଯେ ସେ ଏପରି କରିନାହାନ୍ତି ସେ  ଅପପ୍ରଚାର କରିବାକୁ ଯୁବକଙ୍କୁ ବାରଣ କରୁଥିଲେ।

ନୂଆ ବର୍ଷରେ ନୂଆ ରୂପରେ ମାରୁତି ସୁଜୁକି ୱାଗନ୍ ଆର୍‌

ମାରୁତି ସୁଜୁକି ୱାଗନ୍‌ ଆର୍‌ କମ୍‌ ବଜେଟ୍ ଭିତରେ ୭ଟି ସଂସ୍କରଣ ବଜାରକୁ ଆଣିଥିବାବେଳେ ଏହାର ପରବର୍ତ୍ତୀ ସଂସ୍କରଣ ୨୦୧୯ ଜାନୁୟାରୀ ୨୩ରେ ବଜାର ପ୍ରବେଶ ହେବାକୁ ଯାଉଛି। ଖବର ଅନୁସାରେ ଏହାର ଏକ୍ସ-ଶୋ’ରୁମ୍ ମୂଲ୍ୟ ୪ ରୁ ୫ ଲକ୍ଷ ଟଙ୍କା ମଧ୍ୟରେ ରହିବ। ପୁରୁଣା ସଂସ୍କରଣ ତୁଳନାରେ ନୂଆ ୱାଗନ ଆର୍‌ରେ ଅଧିକ ସେଫ୍ଟି ଫିଚର ରହିବ। ବର୍ତ୍ତମାନ ପାଇଁ ପେଟ୍ରୋଲ ଭାରିଣ୍ଟରେଏହା ଆସିବ। ପୂର୍ବଭଳି ୱାଗନ୍‌ ଆର୍ ଟଲ୍‌ ବଏ ଡିଜାଇନ୍‌କୁ ବଜାୟ ରଖିବା ସହିତ ଇଣ୍ଟେରିୟର ସ୍ପେସ୍‌ ଅଧିକ ରଖିବ ବୋଲି ସୂତ୍ରରୁ ପ୍ରକାଶ।

ଠାକରେ ଟ୍ରେଲର୍ ରିଲିଜ୍

କୌଣସି ହୀରୋ ଠାରୁ କମ୍ ନଥିଲେ ବାଲାସାହେବ ଠାକରେ। ଶିବସେନାର ମୁଖ୍ୟ ବାଲା ସାହେବ କୋଟି କୋଟି ଜନତାଙ୍କ ହୃଦୟରେ ଅଛନ୍ତି। ବାଲାସାହେବ ଠାକରେଙ୍କ ଜୀବନୀକୁ ନେଇ ପ୍ରସ୍ତୁତ ସିନେମା ‘ଠାକରେ’ର ଟ୍ରେଲର୍ ଆଜି ରିଲିଜ୍ ­ହୋଇଛି। ଏଥିରେ ବାଲା ସାହେବଙ୍କ ଚରିତ୍ରରେ ଅଭିନେତା ନୱାଜ୍ଉଦ୍ଦିନ ସିଦ୍ଦିକି ଅଭିନୟ କରିଛନ୍ତି। ଏହି ସିନେମାରେ ନୱାଜଙ୍କ ଦମଦାର ଅଭିନୟ ଦେଖିଲେ ଲାଗିବ ସତେ ଯେମିତି ବାଲାସାହେବଙ୍କ ଅସଲି କିଛି ଭିଡିଓ ଚାଲିଛି। ହିନ୍ଦୀ ଓ ମରାଠୀ ଭାଷାରେ ନିର୍ମିତ ଏହି ଫିଲ୍ମଟିକୁ ଅଭିଜିତ ପାନ୍ସେ ନିର୍ଦ୍ଦେଶନା ଦେଇଛନ୍ତି। ଏହି ଫିଲ୍ମଟି ଜାନୁଆରୀରେ ରିଲିଜ୍ ହେବାକୁ ରହିଛି। ଏହି ଫିଲ୍ମରେ ଅମୃତା ରାଓ ନୱାଜଙ୍କ ବିପକ୍ଷରେ ନଜର ଆସିବେ। ଏଇ ସିନେମାର କିଛି ଦୃଶ୍ୟ ଉପରେ ସେନ୍ସର ବୋର୍ଡ ଆପତ୍ତି ଲଗାଇଛି।

ଚର୍ଚ୍ଚାରେ ରାହୁଲଙ୍କ ଟ୍ଵିଟ

ମୋଦୀ ଫଟୋ ପୋଜରେ ବ୍ୟସ୍ତ, ସେପଟେ ୧୫ ଶ୍ରମିକ ନିଶ୍ଵାସ ପାଇଁ କରୁଛନ୍ତି ସଂଘର୍ଷ । ମେଘାଳୟରେ ଏକ କୋଇଲା ଖଣିରେ ୧୨ରୁ ଊର୍ଦ୍ଧ୍ୱ ଦିନ ହେବ ୧୫ ଶ୍ରମିକ ରହିଛନ୍ତି।  ଉଦ୍ଧାର କାର୍ଯ୍ୟ ଜାରି ରହିଥିଲେ ମଧ୍ୟ ସଫଳ ହୋଇପାରିନାହିଁ। ଏହି ଘଟଣାକୁ ନେଇ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମାଲୋଚନା କରିବା ସହ ଘଟଣାର ହସ୍ତକ୍ଷେପ କରିବାକୁ ଟ୍ୱିଟ୍‌ କରି ଜଣାଇଛନ୍ତି।  ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ଦୀର୍ଘତମ ବୋଗିବୀଲ୍‌ ବ୍ରିଜ ଉଦ୍‌ଘାଟନ କରିବାକୁ ଯାଇ ଫଟୋ ପୋଜ୍‌ ଦେଇଥିଲେ । ସେ ଏହି ଘଟଣାରେ ସମାଲୋଚନା କରିବା ସହିତ ଶ୍ରମିକ ଉଦ୍ଧାର ପାଇଁ ହସ୍ତକ୍ଷେପ କରନ୍ତୁ ବୋଲି ଟ୍ଵିଟ କରିଛନ୍ତି।

ଲାଗୁ ହେବ ଅବଢା ଦର ତାଲିକା, ଅନଲାଇନ ଟିକେଟରେ ଜଗାକୁ ପାଖରୁ କରିହେବ ଦର୍ଶନ

ପୁରୀ ଶ୍ରୀମନ୍ଦିରରେ ନୂଆବର୍ଷରୁ ଲାଗୁ ହେବ ନୂଆ ନିୟମ ।  ଅବଢା ହାଣ୍ଡିର ମୂଲ୍ୟ କେତେ ରହିବ ସେନେଇ ରେଟ ଚାର୍ଟ ଲଗାଇବ ଶ୍ରୀମନ୍ଦିର ପ୍ରଶାସନ । ଆନନ୍ଦବଜାରକୁ ଶୃଙ୍ଖଳିତ କରିବା ଲାଗି ସୁପ୍ରିମକୋର୍ଟ ନିର୍ଦ୍ଦେଶ ଦେବା ପରେ ଅବଢା ଦର ନିର୍ଦ୍ଧାରଣ କରିବାକୁ ଶ୍ରୀମନ୍ଦିର ପ୍ରଶାସନ ନିଷ୍ପତ୍ତି ନେଇଛି । ଏହାଛଡା ଅନଲାଇନ ଟିକେଟ କାଟି ଭକ୍ତ ମାନେ ଭିତରକାଠ ନିକଟରୁ ଜଗାକୁ ଦର୍ଶନ କରିପାରିବେ । ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଏହି ନିଷ୍ପତ୍ତି ନିଆଯାଇଛି । ତେବେ ସାହାଣମେଲା ସମୟରେ ବିନା ଟିକେଟରେ ମଧ୍ୟ ଭକ୍ତ ମାନେ ପାରିମାଣିକ ଦର୍ଶନ କରିପାରିବେ ବୋଲି ସୂଚନା ମିଳିଛି ।

ବୈଷ୍ଣୋ- ଭୈରବ ମନ୍ଦିରରେ ନୂଆ ରୋପ ୱେ

ବୈଷ୍ଣୋ ଦେବୀ ମନ୍ଦିରରରୁ ଭୈରବ ମନ୍ଦିରକୁ ଯିବାକୁ ନୂଆ ରୋପ-ୱେର ଉଦ୍ଘାଟନ କରାଯାଇଛି। ଜମ୍ମୁ କାଶ୍ମୀର ରାଜ୍ୟପାଳ ସତ୍ୟପାଲ ମଲ୍ଲିକଙ୍କ ଦ୍ଵାରା ଏହି ପ୍ରୋଜେକ୍ଟ ଉନ୍ମୋଚନ କରାଯାଇଛି। ପାଖାପାଖି ୮୫ କୋଟିର ଏଇ ପ୍ରୋଜେକ୍ଟରେ ୧ ଘଣ୍ଟାକୁ ୮୦୦ ଯାତ୍ରୀ ଯାଇପାରିବେ। ବୈଷ୍ଣୋ ମନ୍ଦିରଠାରୁ ଭୈରବ ମନ୍ଦିରକୁ ଯାତ୍ରା ୧ ଘଣ୍ଟା ଲାଗୁଥିବା ବେଳେ ଏଥିରେ ୩ ମିନିଟରେ ପହଞ୍ଚି ହେବ। ଏହି ମନ୍ଦିରକୁ ଯାତ୍ରୀମାନେ ଏହି ରୋପ ୱେ ସୁବିଧାରେ ବିନା କଷ୍ଟରେ ୬୬୦୦ ଫୁଟ ଉଚ୍ଚକୁ ଯାଇପାରିବେ। ଏହି ରୋପୱେ ପାଇଁ ୧୦୦ ଟଙ୍କା ଶୁଳ୍କ ସହିତ ନିଶୁଳ୍କ ସୁବିଧା ମଧ୍ୟ ଉପଲବ୍ଧ ହେବ।

ଭକ୍ତଙ୍କୁ ଲୁଟି ତଣ୍ଟି କାଟିଲେ ଦୁର୍ବୃତ୍ତ

ପୁରୀରେ ଆଇନଶୃଙ୍ଖଳା ପରିସ୍ଥିତି ଦିନକୁ ଦିନ ବିଗିଡିବାରେ ଲାଗିଛି । ଭକ୍ତଙ୍କୁ ଲୁଟିବା ପରେ ତଣ୍ଟି କାଟି ଦେଇଛନ୍ତି ଦୁର୍ବୃତ୍ତ । ଭକ୍ତ ଜଣକ ବାଲେଶ୍ୱର ଅଂଚଳର ପ୍ରମୋଦ ଜେନା ଏବଂ ସେ ପରିବାର ସହ ପୁରୀ ବୁଲିବାକୁ ଆସିଥିଲେ । ଏହି ସମୟରେ ଜଗନ୍ନାଥ ବଲ୍ଲଭ ପାର୍କିଂ ଭିତରେ ତାଙ୍କୁ କିଛି ଦୁର୍ବୃତ୍ତ ଲୁଟ କରିବା ପରେ ତଣ୍ଟି କାଟିଦେଇଥିଲେ । ତେବେ ଦୁର୍ବୃତ୍ତମାନେ ଫେରାର ହୋଇଯାଇଛନ୍ତି । ତାଙ୍କୁ ଗୁରୁତର ଅବସ୍ଥାରେ ମେଡିକାଲରେ ଭର୍ତି କରାଯାଇଥିଲା। ଏହି ଘଟଣା ପୁରୀର ଆଇନଶୃଙ୍ଖଳା ଉପରେ ପ୍ରଶ୍ନ ଉଠାଇଛି । ଗତକାଲି ଗୁଳିକାଣ୍ଡରେ ଜଣେ ଅପରାଧୀ ପ୍ରାଣ ହରାଇଥିଲା ।

ପ୍ଲାଣ୍ଟରେ ଦୁର୍ଘଟଣା, ୫ ଶ୍ରମିକ ଆହତ

ଯାଜପୁର କଳିଙ୍ଗ ନଗରସ୍ଥିତ ମୈଥାନ ଷ୍ଟିଲ ପ୍ଲାଣ୍ଟରେ ଏକ ଠିକା ସଂସ୍ଥା କାର୍ଯ୍ୟ କରୁଥିବା ବେଳେ ବିସ୍ଫୋରଣ ଘଟି ୫ ଶ୍ରମିକ ଗୁରୁତର ଭାବେ ଆହତ ହୋଇଛନ୍ତି। ଆହତ ଶ୍ରମିକମାନଙ୍କୁ ଉଦ୍ଧାର କରାଯାଇ କଟକର ଏକ ଘରୋଇ ହସ୍‌ପିଟାଲରେ ଭର୍ତ୍ତି କରାଯାଇଛି। ମିଳିଥିବା ସୂଚନା ଅନୁଯାୟୀ, ଯାଜପୁର କଳିଙ୍ଗନଗରସ୍ଥିତ ମୈଥାନ ଷ୍ଟିଲ ପ୍ଲାଣ୍ଟର ଏସଏମଏସ ସାଇଟ୍‌ରେ ଜେ ଡି କନଷ୍ଟ୍ରକ୍ସନ ନାମକ ଏକ ଠିକାଦାରୀ ସଂସ୍ଥାର ୫ଜଣ ଶ୍ରମିକ କାର୍ଯ୍ୟ କରୁଥିଲେ। ଏହି ସମୟରେ ଲେଡେନ ଗ୍ୟାସ ଫାଟି ବିସ୍ଫୋରଣ ହେବାରୁ ୫ ଜଣ ଶ୍ରମିକଙ୍କ ଦେହରେ ନିଆଁ ଲାଗିଯାଇଥିଲା।

ବଲିଉଡ ଦବଙ୍ଗ ସଲ୍ଲୁ

ନବାଗତଙ୍କୁ ସୁଯୋଗ ଦେବାରେ ବଲିଉଡ ସୁଲତାନ ବେଶ ଆଗରେ। ‘ହୀରୋ’ ଜରିଆରେ ସୁନିଲଙ୍କ କନ୍ୟା ଆଥିୟା ଶେଟ୍ଟୀ ଓ ସୂରଜ ପାଞ୍ଚୋଲିଙ୍କୁ ବଲିଉଡରେ ଏଣ୍ଟ୍ରି କରାଇଥିବାବେଳେ ‘ଲଭଯାତ୍ରୀ’ ଜରିଆରେ ଆୟୁଷ ଶର୍ମା ଓ ୱାରିନା ହୁସେନଙ୍କୁ ଏହି ବର୍ଷ ଏଣ୍ଟ୍ରି କରାଇଛନ୍ତି। ଏହି କ୍ରମରେ ଆଉ ଜଣେ ନବାଗତାଙ୍କ ନାମ ଯୋଡି ହୋଇଯାଇଛି। ବଲିଉଡ ଅଭିନେତା ମହେଶ ମଞ୍ଜରେକରଙ୍କ ସୁପୁତ୍ରୀ ଆଶ୍ଵାମିଙ୍କୁ ବଲିଉଡ ଟିକେଟ ଦେବାକୁ ଯାଉଛନ୍ତି। ‘ଦବଙ୍ଗ ୩’ରେ ସଲ୍ଲୁ ଏହି ନବଗତାଙ୍କୁ ସୁଯୋଗ ଦେବେ ବୋଲି ଶୁଣିବାକୁ ମିଳୁଛି । ବଲିଉଡରେ ନିଉ କମରଙ୍କ ଗଡ ଫାଦର ରୂପେ ପରିଚିତ ସଲ୍ଲୁ କିନ୍ତୁ ନିଜ ବିବାହକୁ ନେଇ ଚର୍ଚ୍ଚାରେ ରହିଛନ୍ତି। ଏହି ଲୋକପ୍ରିୟ ଅଭିନେତା ଜଣକ କାଲି ୫୩ ବର୍ଷରେ ପଦାର୍ପଣ କରିବାକୁ ଯାଉଛନ୍ତି।

ଗର୍ଭବତୀ ମହିଳାଙ୍କୁ ଏଚ୍‌ଆଇଭି ପଜିଟିଭ୍‌ ରକ୍ତ : କର୍ମଚାରୀ ନିଲମ୍ବିତ

ତାମିଲନାଡୁର ବିରୁଧୁନଗର ଜିଲ୍ଲା ଅନ୍ତର୍ଗତ ଏକ ସରକାରୀ ଡାକ୍ତରଖାନାରେ ଜଣେ ୨୪ ବର୍ଷୀୟ ଗର୍ଭବତୀ ମହିଳାଙ୍କୁ ଏଚ୍‌ଆଇଭି ପଜିଟିଭ୍‌ ଆକ୍ରାନ୍ତ ରକ୍ତ ଦିଆଯାଇଛି। ନଭେମ୍ବର ୩୦ ତାରିଖ ଦିନ ସେହି ରକ୍ତ ଜଣେ ଯୁବକ ଦାନ କରିଥିଲେ। ସରକାରୀ ବ୍ଲଡ୍‌ ବ୍ୟାଙ୍କ୍‌ରେ ଥିବା ଲାବରେଟୋରି ଟେକ୍ନିସିଆନ୍‌ମାନେ ଉକ୍ତ ରକ୍ତ ପରୀକ୍ଷା କରି କୌଣସି ଅସୁବିଧା ନ ଥିବା କହିବା ପରେ ଡିସେମ୍ବର ୫ ତାରିଖ ଦିନ ତାହା ଉକ୍ତ ମହିଳାଙ୍କୁ ଦିଆଯାଇଥିଲା। ପରବର୍ତ୍ତୀ ସମୟରେ ଉକ୍ତ ଯୁବକ ଜଣକ ଏଚଆଇଭି ପଜିଟିଭି ବୋଲି ଜଣା ପଡିଥିଲେ। ପରୀକ୍ଷାରେ ତ୍ରୁଟି କରିଥିବାରୁ ତିନି ଜଣ ଲାବ୍ରୋଟରି କର୍ମଚାରୀଙ୍କୁ ନିଲମ୍ବନ କରାଯାଇଛି।

ଟେଷ୍ଟ୍ ଡେବ୍ୟୁରେ ମୟଙ୍କଙ୍କ ରେକର୍ଡ

ଅଷ୍ଟ୍ରେଲିଆରେ ଟେଷ୍ଟ୍ ଡେବ୍ୟୁ କରି ପ୍ରଥମ ପାଳିରେ ୭୬ ରନ୍ ସଂଗ୍ରହ କରି ୭୧ ବର୍ଷର ଏକ ପୁରୁଣା ରେକର୍ଡ ଭାଙ୍ଗିଥିବା ମୟଙ୍କ ଅଗ୍ରୱାଲ୍‌ ଭାରତର ଅନ୍ୟତମ ପ୍ରଖ୍ୟାତ ବ୍ୟାଟ୍ସମ୍ୟାନ୍ ସୁନୀଲ ଗାଭାସ୍କରଙ୍କୁ ବି ପଛରେ ପକାଇ ଦେଇଛନ୍ତି। ପ୍ରାରମ୍ଭିକ ବ୍ୟାଟ୍ସମ୍ୟାନ ଭାବେ ଟେଷ୍ଟ୍ ଡେବ୍ୟୁ ଇନିଂସ୍‌ରେ ସର୍ବାଧିକ ରନ୍ କରିବାରେ ସେ ଭାରତୀୟଙ୍କ ମଧ୍ୟରେ ଚତୁର୍ଥ ସ୍ଥାନରେ ରହିଛନ୍ତି। ପୂର୍ବରୁ ଏହି ସ୍ଥାନରେ ସୁନୀଲ ଗାଭାସ୍କର ଥିଲେ। ୧୯୭୧ ମସିହାରେ ୱେଷ୍ଟଇଣ୍ଡିଜ୍ ବିପକ୍ଷରେ ଗାଭାସ୍କର ଟେଷ୍ଟ୍ ମ୍ୟାଚ୍ ଡେବ୍ୟୁ କରିଥିଲେ। ଏଥିରେ  ସେ ପ୍ରାରମ୍ଭିକ ବ୍ୟାଟ୍ସମ୍ୟାନ୍ ଭାବେ ୬୫ ରନ୍ କରିଥିଲେ। ଏହି ତାଲିକାର ଶୀର୍ଷରେ ରହିଛନ୍ତି ଶିଖର ଧୱନ।

୨୦୧୯ର ପ୍ରଧାନମନ୍ତ୍ରୀ କିଏ ହେବେ, ତାହା କହିବା କଷ୍ଟ : ରାମଦେବ

ରାମେଶ୍ୱରମଠାରେ ଆୟୋଜନ କରାଯାଇଥିବା ଭାରତ ସ୍ୱାଭିମାନ ସଭାର ଜାତୀୟ କାର୍ଯ୍ୟକାରିଣୀ ବୈଠକରେ ଯୋଗ ଦେଇ ଯୋଗଗୁରୁ ବାବା ରାମଦେବ ୨୦୧୯ର ଭାରତର ପ୍ରଧାନମନ୍ତ୍ରୀ କିଏ ହେବେ ସେ ସମ୍ପର୍କରେ ଉତ୍ତର ଦେଇ କହିଛନ୍ତି ଯେ – ତାହା କହିବା ବର୍ତ୍ତମାନ ଅତି କଷ୍ଟକର। ସେ କାହାର ସମର୍ଥନ କରୁନାହାନ୍ତି କି ବିରୋଧ ମଧ୍ୟ କରୁନାହାନ୍ତି। ତାଙ୍କ ମତରେ ଭାରତକୁ ସାଂପ୍ରଦାୟିକ ବା ହିନ୍ଦୁ ରାଷ୍ଟ୍ର ରୂପେ ନ ଗଢି ବରଂ ଆଧ୍ୟାତ୍ମିକ ଭାରତ ତଥା ଆଧ୍ୟାତ୍ମିକ ବିଶ୍ୱ ରୁପେ ଗଢିବା ଲକ୍ଷ୍ୟ ରହିବା ଆବଶ୍ୟକ।

ବିଜେଡିର ୨୧ତମ ପ୍ରତିଷ୍ଠା ଦିବସ

ଆଜି ବିଜେଡିର ପ୍ରତିଷ୍ଠା ଦିବସ । ୨୧ତମ ପ୍ରତିଷ୍ଠା ଦିବସ ପାଳନ କରିଛି ବିଜୁ ଜନତା ଦଳ । ରାଜ୍ୟ ବିଜୁ ଜନତା ଦଳ କାର୍ଯ୍ୟାଳୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟଙ୍କ ଅଧ୍ୟକ୍ଷତାରେ ଜନ୍ମଦିନ ପାଳନ କରାଯାଉଛି । ଏହି ଅବସରରେ ସାଂସଦ, ବିଧାୟକ ମାନେ ଗୋଟିଏ ମାସର ଦରମା ଦଳୀୟ ଫାଣ୍ଠିକୁ ଦେଇଛନ୍ତି। ବିଜେଡ଼ି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଅବସରରେ ରାଜ୍ୟ ସରକାରଙ୍କ ବିଭିନ୍ନ ସଫଳତା ଓ ଯୋଜନାକୁ ଲୋକମାନଙ୍କ ପାଖରେ ପହଞ୍ଚାଇବା ସହିତ ଆଗାମୀ ନିର୍ବାଚନରେ ବିରୋଧୀ ଦଳଗୁଡ଼ିକର ଅପପ୍ରଚାରକୁ ରୋକିବା ପାଇଁ କର୍ମୀମାନଙ୍କ କାନରେ ମନ୍ତ୍ର ଫୁଙ୍କିଛନ୍ତି। କେବଳ ସେତିକି ନୁହେଁ, ଏହି ଅବସରରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ବିଭିନ୍ନ ପ୍ରସଙ୍ଗରେ କେନ୍ଦ୍ର ସରକାରଙ୍କୁ ସମାଲୋଚନା କରିବା ସହ କଂଗ୍ରେସକୁ ମଧ୍ୟ ସମାଲୋଚନା କରିଛନ୍ତି।

ଏନ୍‌ଆଇଏ ଚଢ଼ାଉ: ପାଞ୍ଚ ଗିରଫ

ନେସ୍‌ନାଲ୍‌ ଇନ୍‌ଭେଷ୍ଟିଗେସନ୍‌ ଏଜେନ୍‌ସି (ଏନ୍‌ଆଇଏ) ଏବଂ ଉତ୍ତର ପ୍ରଦେଶର ଆଣ୍ଟି-ଟେରର୍‌ ସ୍କ୍ଵାଡ୍‌ଙ୍କ ମିଳିତ ଅଭିଯାନ ଯୋଗୁଁ ନୂତନ ଆଇଏସ୍‌ଆଇଏସ୍‌ ସଂଗଠନ ସହ ସମ୍ପୃକ୍ତ ଥିବା ପାଞ୍ଚ ଜଣ ବ୍ୟକ୍ତିଙ୍କୁ ବୁଧବାର ଦିନ ଉତ୍ତର ପ୍ରଦେଶର ଆମରୋହାଠାରେ ଗିରଫ କରାଯାଇଛି। ଏହି ମିଳିତ ଦଳ ୧୬ଟି ସ୍ଥାନରେ ଚଢ଼ାଉ କରିଥିଲା। ‘ହର୍‌କଡ୍‌-ଉଲ୍‌-ହରବ-ଏ-ଇସ୍‌ଲାମ୍‌’ ନାମକ ଏକ ନୂତନ ଆଇଏସ୍‌ଆଇଏସ୍‌ ସଂଗଠନ ସଂକ୍ରାନ୍ତରେ ସୂଚନା ପାଇବା ପରେ ଚଢ଼ାଉ କରାଯାଇ ଥିଲା। ସେମାନଙ୍କ ଠାରୁ ବିସ୍ଫୋରକ ଦ୍ରବ୍ୟ ମଧ୍ୟ ଜବତ କରାଯାଇଛି।

ଶିକାର ଅଭିଯୋଗରେ ଗିରଫ ହେଲେ ଗଲ୍‌ଫ୍‌ ଖେଳାଳି ଜ୍ୟୋତି ରାନ୍ଧ୍‌ଓ୍ଵା

ଅନ୍ତର୍ଜାତୀୟ ଗଲ୍‌ଫ ଖେଳାଳି ଜ୍ୟୋତି ରାନ୍ଧୱାଙ୍କୁ ଉତ୍ତର ପ୍ରଦେଶର ବନ ବିଭାଗ ଗିରଫ କରିଛି। ଜଙ୍ଗଲରେ ଶିକାର କରିବା ଅଭିଯୋଗରେ ତାଙ୍କୁ ଗିରଫ କରାଯାଇଛି । ତାଙ୍କ ଠାରୁ ଗୋଟାଏ ଗାଡ଼ି, ଗୋଟାଏ ଏ-୨୨ ରାଇଫଲ୍‌ ଓ ଅନ୍ୟାନ୍ୟ ସମାଗ୍ରୀ ଉଦ୍ଧାର କରାଯାଇଛି। ତା’ଛଡ଼ା ତାଙ୍କ ବାର୍‌ହା ଚମଡ଼ା ଓ ବାଇନୋକୁଲାର୍‌ ମଧ୍ୟ ଜବତ ହୋଇଛି। ମଙ୍ଗଳବାର ରାନ୍ଧୱା ଏକ ଜଙ୍ଗଲୀ କୁକୁଡ଼ାର ମଧ୍ୟ ଶିକାର କରିଥିଲେ। ରାନ୍ଧ୍‌ଓ୍ଵା ହେଉଛନ୍ତି  ବଲିଉଡ୍‌ ଅଭିନେତ୍ରୀ ଚିତ୍ରାଙ୍ଗଦା ସିଂହଙ୍କ ପୂର୍ବତନ ସ୍ୱାମୀ। ଅଫିସିଆଲ୍‌ ଓ୍ଵାର୍ଲଡ୍‌ ଗଲ୍‌ଫ୍‌ ର‍୍ୟାଙ୍କିଙ୍ଗ୍‌ର ଶ୍ରେଷ୍ଠ ୧୦୦ ତାଲିକାରେ ୨୦୦୪ ରୁ ୨୦୦୯ ମଧ୍ୟରେ ରାନ୍ଧ୍‌ଓ୍ଵା ଅନେକ ଥର ରହିଛନ୍ତି।

ଆସୁଛି ସ୍ମାର୍ଟ ମିଟର : ଆଗେ ପଇସା ପରେ ବିଜୁଳି

ଆଗେ ପଇସା ପରେ ବିଜୁଳି।  ଉଦୟ-୨ ଯୋଜନା ଅନୁସାରେ କମ୍ପାନୀ ଗୁଡିକୁ ସରକାର ସ୍ମାର୍ଟ ପ୍ରିପେଡ୍ ମିଟର ଲଗାଇବାକୁ ଅନୁମତି ପ୍ରଦାନ କରିବାକୁ ବିଚାର କରୁଛନ୍ତି। ଏହି ସ୍ମାର୍ଟ ମିଟର ବ୍ୟବହାର ଦ୍ଵାରା ଦିନର ଭିନ୍ନ ଭିନ୍ନ ସମୟରେ ଗ୍ରାହକଙ୍କୁ ଭିନ୍ନ ଭିନ୍ନ ହାରର ଶୁଳ୍କ ଦେବାକୁ ପଡ଼ିବ। ଏତଦବ୍ୟତୀତ ପ୍ରିପେଡ୍ ମୋବାଇଲ ଫୋନ ଭଳି ବିଜୁଳି ଜାଳିବା ପାଇଁ ଆଗୁଆ ପଇସା ଜମା କରିବାକୁ ପଡ଼ିବ। ଫଳରେ ବିଜୁଳି ବ୍ୟବହାର ପରେ ଗ୍ରାହକଙ୍କ ବିଲ୍ ଆଉ ବାକି ରହିବ ନାହିଁ। ଏଥିସହିତ ବଣ୍ଟନ କମ୍ପାନୀ ଗୁଡ଼ିକ ମଧ୍ୟ ଆଗୁଆ ପଇସା ଆଦାୟ କରିବାକୁ ସକ୍ଷମ ହେବେ। ଏହି ଯୋଜନା ଅନୁସାରେ ବିଦ୍ୟୁତ୍ କ୍ଷେତ୍ରର ସଂସ୍କାର ଆଣିବା ପାଇଁ ଉଦ୍ୟମ କରାଯାଉଛି।

କାହାଣୀ ଦେଖି ଫିଲ୍ମ ସାଇନ କରେ : ଆମିର

ବଲିଉଡ ପରଫେକନିଷ୍ଟ ଆମିର ଖାନ ଫିଲ୍ମର କାହାଣୀ ଦେଖି ସାଇନ କରନ୍ତି ବୋଲି କହିଛନ୍ତି। ତାଙ୍କ ମତରେ ଫିଲ୍ମର ସବୁଠୁ ଗୁରୁତ୍ଵପୂର୍ଣ ହେଉଛି କାହାଣୀ। ଫିଲ୍ମର ବଳିଷ୍ଠ କାହାଣୀ ହି ଫିଲ୍ମକୁ ମଜବୁତ କରେ। ଫିଲ୍ମ ପାଇଁ କଳାକାର ଓ ଟେକନିସିଆନ ମଧ୍ୟ ବହୁତ ଜରୁରୀ କିନ୍ତୁ କାହାଣୀ ହେଉଛି ମୂଳଦୁଆ। ୩୦୦ କୋଟି ବ୍ଲକର ଅଭିନେତା ଭାବେ ସେ ବଲିଉଡରେ ବେଶ ଚର୍ଚିତ। ତାଙ୍କ ଅଭିନୀତ ଫିଲ୍ମ ଗୁଡିକ ସବୁଠୁ ଆଧିକ ଆୟ କରି ରେକର୍ଡ କରିଥାଏ।  କିନ୍ତୁ ଏହି  ବର୍ଷର ହାଇ ବଜେଟ ଫିଲ୍ମ ‘ଠଗ୍ସ ଅଫ ହିନ୍ଦୁସ୍ତାନ’ ଦର୍ଶକଙ୍କୁ ନିରାଶ କରିଛି। ଏହି ଫିଲ୍ମରେ ଆମିରଙ୍କ ବ୍ୟତିତ କାଟ୍ରିନ କୈଫ, ଫତିମା ସାନା ଶେଖ, ଅମିତାଭ ବଚ୍ଚନ ପ୍ରମୁଖ ଅଭିନୟ କରିଥିଲେ।

ସଂଖ୍ୟାଲଘୁ ପ୍ରସଙ୍ଗରେ ଇମ୍ରାନ୍‌ଙ୍କୁ ସମାଲୋଚନା କଲେ ମହମ୍ମଦ କୈଫ୍‌

ଦେଶର ସଂଖ୍ୟାଲଘୁ ସଂପ୍ରଦାୟକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟିପ୍ପଣୀ ଦେଇଥିବା ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍‌ଙ୍କୁ ଖୁବ୍‌ ସମାଲୋଚନା କରିଛନ୍ତି ପୂର୍ବତନ ଭାରତୀୟ କ୍ରିକେଟିଅର ମହମ୍ମଦ କୈଫ୍‌। ଭାରତୀୟ ସଂଖ୍ୟାଲଘୁମାନଙ୍କ ସଂପର୍କରେ ଆମେ ତୁମ ଠାରୁ କୌଣସି ଭାଷଣ ଶୁଣିବାକୁ ଚାହୁଁନାହୁ ବୋଲି ପାକ୍‌ ପ୍ରଧାନମନ୍ତ୍ରୀ ଇମ୍ରାନ୍‌ ଖାନ୍‌ଙ୍କୁ ସିଧାସଳଖ ଶୁଣାଇବା ସହ ପାକିସ୍ତାନରେ ସଂଖ୍ୟାଲଘୁମାନଙ୍କର ସଂଖ୍ୟା କିପରି ଭାବେ ୨୦ ପ୍ରତିଶତରୁ ୨ ପ୍ରତିଶତକୁ ହ୍ରାସ ପାଇଲା ବୋଲି ପ୍ରଶ୍ନ କରିଛନ୍ତି ? ଏଥିସହ ପାକିସ୍ତାନ ତୁଳନାରେ ଭାରତରେ ସଂଖ୍ୟାଲଘୁ ସଂପ୍ରଦାୟ ବେଶ୍‌ ନିରାପଦରେ ଓ ଆରାମରେ ଅଛନ୍ତି ଓ ଭାଷଣ ଶୁଣାଇବା ପରିବର୍ତ୍ତେ ଆଗେ ନିଜ ଦେଶରେ ରହିଥିବା ସଂଖ୍ୟାଲଘୁ ମାନଙ୍କର କଥା ବୁଝନ୍ତୁ ବୋଲି ପରାମର୍ଶ ଦେଇଛନ୍ତି  କୈଫ୍ ।

ଛତିଶଗଡ଼ ମନ୍ତ୍ରୀମଣ୍ଡଳ ସମ୍ପ୍ରସାରିତ

ଛତିଶଗଡ଼ ମୁଖ୍ୟମନ୍ତ୍ରୀ ଭୂପେଶ ବଘେଲ ଆଜି ତାଙ୍କ ମନ୍ତ୍ରୀମଣ୍ଡଳର ପ୍ରଥମ ସମ୍ପ୍ରସାରଣ କରିଛନ୍ତି। ମନ୍ତ୍ରୀମଣ୍ଡଳର ଏହି ପ୍ରଥମ ସମ୍ପ୍ରସାରଣରେ ଜଣେ ମହିଳାଙ୍କ ସହିତ ମୋଟ୍‌ ୯ ଜଣ ମନ୍ତ୍ରୀଙ୍କୁ ସାମିଲ କରାଯାଇଛି। ଛତିଶଗଡ଼ ରାଜ୍ୟପାଳ ଆନନ୍ଦିବେନ ପଟେଲ ପୋଲିସ ପ୍ୟାରେଡ୍‌ ପଡ଼ିଆରେ ନୂଆ ମନ୍ତ୍ରୀମାନଙ୍କୁ ପଦ ଓ ଗୋପନୀୟତା ଶପଥପାଠ କରାଇଛନ୍ତି।  ଗତ ୧୭ ତାରିଖରେ ଶ୍ରୀ ବଘେଲ ମୁଖ୍ୟମନ୍ତ୍ରୀ ଭାବେ ଶପଥ ନେବା ସହିତ ଟି ଏସ ସିଂହଦେଓ ଓ ତାମ୍ରଧ୍ୱଜ ସାହୁ ମଧ୍ୟ କ୍ୟାବିନେଟ୍‌ ମନ୍ତ୍ରୀଭାବେ ଶପଥ ଗ୍ରହଣ କରିଥିଲେ। ମନ୍ତ୍ରୀମଣ୍ଡଳର ସମ୍ପ୍ରସାରଣ ସହିତ ବର୍ତ୍ତମାନ ମନ୍ତ୍ରୀଙ୍କ ସଂଖ୍ୟା ୧୨ରେ ପହଞ୍ଚିଛି । ୯୦ ଆସନ ବିଶିଷ୍ଟ ଛତିଶଗଡ଼ ବିଧାନସଭାରେ କଂଗ୍ରେସ ଦଳ ଦୁଇ ତୃତୀୟାଂଶ ଆସନ ଜିଣି କ୍ଷମତାସୀନ ହୋଇଛି।

ଜିରୋକୁ ପଛରେ ପକାଇଲା କେଜିଏଫ୍

କନ୍ନଡ ସୁପଷ୍ଟାର ୟଶଙ୍କ ଚଳଚ୍ଚିତ୍ର କେଜିଏଫ୍ (କୋଲାର ଗୋଲ୍ଡ ଫିଲ୍ଡ)ବକ୍ସ ଅଫିସରେ ଧମାଲ କରିଛି । ଏହି ଫିଲ୍ମରେ ୟଶଙ୍କ ସହ ଶ୍ରୀନିଧି ଶେଟ୍ଟୀ ଅଭିନୟ କରିଛନ୍ତି। ଚଳଚ୍ଚିତ୍ରଟି ପ୍ରଥମ ଦିନରେ ସମୁଦାୟ ୧୮.୧୦ କୋଟି ଆୟ କରି ରେକର୍ଡ ବ୍ରେକ୍ କରିଛି। ସେହି ଭଳି ‘କେଜିଏଫ୍ ଚାପ୍ଟର-୧’ର ହିନ୍ଦୀ ଭର୍ସନର ଆୟ ଲଗାତାର ବଢିବାରେ ଲାଗିଛି । ତେବେ ଚଳଚ୍ଚିତ୍ରଟିର ସମସ୍ତ ଭର୍ସନକୁ ମିଶାଇ ୪ଦିନରେ ସମୁଦାୟ ୬୦ କୋଟିରୁ ଉର୍ଦ୍ଧ ଆୟ କରିଛି । ଏହା ଶାହରୁଖ ଖାନଙ୍କ ଜିରୋ ଚଳଚ୍ଚିତ୍ରକୁ ମଧ୍ୟ ପଛରେ ପକାଇଛି ।

କାବୁଲରେ ଆତ୍ମଘାତୀ ଆକ୍ରମଣ, ୨୯ ମୃତ

କାବୁଲର ସରକାରୀ ପରିସରରେ ଆତଙ୍କବାଦୀଙ୍କ ଦ୍ୱାରା କରାଯାଇଥିବା ଆତ୍ମଘାତୀ ଆକ୍ରମଣରେ ୨୯ଜଣଙ୍କ ମୃତ୍ୟୁ ଘଟିଛି । ପାଖାପାଖି ଏକ ଘଣ୍ଟା ପର୍ଯ୍ୟନ୍ତ ଚାଲିଥିବା ଏହି ଆକ୍ରମଣରେ ୨୦ ଜଣ ଗୁରୁତର ହୋଇଛନ୍ତି । ସେମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ମୃତକଙ୍କ ମଧ୍ୟରେ ଅଧିକାଂଶ ସାଧାରଣ ନାଗରିକ ରହିଛନ୍ତି। ଏ ଘଟଣାରେ କୌଣସି ଆତଙ୍କବାଦୀ ସଂଗଠନ ନିଜକୁ ଦାୟୀ କରି ନାହାନ୍ତି ।

ଆରବିଆଇର ନୂଆ ୨୦ ଟଙ୍କିଆ ନୋଟ

ଭାରତୀୟ ରିଜର୍ଭ ବ୍ୟାଙ୍କ ନୂଆ ୨୦ ଟଙ୍କିଆ ନୋଟ ଜାରି କରୁଛି । ବିମୁଦ୍ରାକରଣ ପରେ ଏହା ୭ମ କରେନ୍ସି । ଏହି ୨୦ ଟଙ୍କିଆ ନୋଟରେ ବହୁ ଅତିରିକ୍ତ ସୁରକ୍ଷା ଫିଚର ରହିଛି । ଏଥିରେ ଐତିହାସିକ କୀର୍ତି ଅଜନ୍ତା ଗୁମ୍ଫାର ଫଟୋ ରହିବ ଏହି ନୂଆ ନୋଟ ପୁରୁଣା ତୁଳନାରେ ୨୦ ପ୍ରତିଶତ ଛୋଟ ରହିବ । ବିମୁଦ୍ରାକରଣ ପରଠାରୁ ଏପର୍ଯ୍ୟନ୍ତ କେନ୍ଦ୍ର ବ୍ୟାଙ୍କ ୧୦, ୫୦, ୧୦୦, ୨୦୦, ୫୦୦ ଏବଂ ୨୦୦୦ ଟଙ୍କାର ନୂଆ ନୋଟ ଜାରି କରିଛନ୍ତି । ଏହି ନୋଟ ଗୁଡିକର ସାଇଜ ପୁରୁଣା ନୋଟ ଅପେକ୍ଷା ଅଲଗା ରହିଛି ।

ଗୁଣି ଗାରେଡି ସନ୍ଦେହରେ ମାଆକୁ ହତ୍ୟା କଲା ପୁଅ

ଗୁଣି ଗାରେଡି ସନ୍ଦେହରେ ଜଣେ ୩୦ ବର୍ଷ ବୟସ୍କ ଲୋକ ନିଜର ମାଆକୁ ହତ୍ୟା କରିଥିବା ଘଟଣା ଚାଞ୍ଚଲ୍ୟ ସୃଷ୍ଟି କରିଛି। ତେଲେଙ୍ଗାନାର ରାଜନ୍ଵାସିରେ ସିଲ୍ଲା ଜିଲ୍ଲାର ବୋଇନପାଲେ ଥାନାର ଅଧିବାସୀ ଶ୍ରୀନିବାସ ନିଜର ୫୨ ବର୍ଷୀୟ ମାଆଙ୍କୁ ନିଜ ବାସଭବନରେ ତଣ୍ଟି ଚିପି ହତ୍ୟା କରିଥିବା ଜଣାଯାଇଛି। ପୁଲିସ ମୃତକଙ୍କର ମୃତ ଶରୀରକୁ ବ୍ୟବଚ୍ଛେଦ ପାଇଁ ପଠାଇଥିବା ବେଳେ ପୁଅ ଶ୍ରୀନିବାସକୁ ଗିରଫ କରିଛି।

ସର୍ବସାଧାରଣ ସ୍ଥାନରେ ନମାଜ ପଢିବା ଉପରେ ଲାଗିଲା ରୋକ

ଏଣିକି ସର୍ବସାଧାରଣ ସ୍ଥାନରେ ନମାଜ ପାଠ କରିପାରିବେ ନାହିଁ। ନମାଜ ପାଠ କେବଳ ମାତ୍ର ମସଜିଦ୍‌, ଦର୍‌ଘା, କର୍ଯ୍ୟାଳୟ ଓ ଘରୋଇ ପରିସର ମଧ୍ୟରେ ହିଁ ସୀମିତ ରହିବ। ଯଦି କେହି ସର୍ବସାଧାରଣ ସ୍ଥାନରେ ନମାଜ ପାଠ କରୁଥିବାର ଦୃଷ୍ଟିକୁ ଆସନ୍ତି, ତେବେ ତାଙ୍କ ବିରୋଧରେ ଏବଂ ସେ କାର୍ଯ୍ୟ କରୁଥିବା ସଂସ୍ଥା ବିରୋଧରେ ଆଇନ୍‌ଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉତ୍ତରପ୍ରଦେଶ ପୁଲିସ୍‌ ପ୍ରଶାସନ ପକ୍ଷରୁ ଏକ ନିର୍ଦ୍ଦେଶନାମା ଜାରି କରାଯାଇଛି। ଉତର ପ୍ରଦେଶର ନୋଏଡା ପୋଲିସ ସେକ୍ଟର ୫୮ ରେ ଥିବା ଶିଳ୍ପାଞ୍ଚଳରେ କମ୍ପାନୀଗୁଡିକୁ ଚିଠି ଲେଖି କର୍ମଚାରୀମାନଙ୍କୁ ଖୋଲାସ୍ଥାନରେ ନମାଜ ପଢିବା ଉପରେ ରୋକ ଲଗାଇଛନ୍ତି ।

ଆଇଏଏସ ସ୍ତରରେ ଅଦଳବଦଳ

ଆଇଏଏସ ସ୍ତରରେ ରାଜ୍ୟ ସରକାର ଅଦଳବଦଳ କରିଛନ୍ତି । ସାଧାରଣ ପ୍ରଶାସନ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁସାରେ ଏହି ଅଦଳବଦଳ କରାଯାଇଛି । ରାଜସ୍ୱ ଓ ବିପର୍ଯ୍ୟୟ ପ୍ରଶମନ ବିଭାଗ ସଚିବ ଆଇଏଏସ ଡଃ ସି.ଏସ. କୁମାରଙ୍କୁ ରାଜ୍ୟ ପଣ୍ୟାଗାର ନିଗମ ଅଧ୍ୟକ୍ଷ ଭାବେ ବଦଳି କରାଯାଇଛି । ଅବକାରୀ ସଚିବ ଆଇଏଏସ୍ ନିକୁଞ୍ଜ ବିହାରୀ ଧଳଙ୍କୁ ରାଜସ୍ୱ ଓ ବିପର୍ଯ୍ୟୟ ପ୍ରଶମନ ବିଭାଗର ସଚିବ ସହିତ ଅତିରିକ୍ତ ଭାବେ ଅବକାରୀ ସଚିବ ଦାୟିତ୍ୱ  ଦିଆଯାଇଛି।  କୃଷି ଓ କୃଷକ ସଶକ୍ତିକରଣ ବିଭାଗ ସ୍ୱତନ୍ତ୍ର ସଚିବ ଆଇଏଏସ୍ ଭାସ୍କରଜ୍ୟୋତି ଶର୍ମାଙ୍କୁ ବିଜ୍ଞାନ ଓ ପ୍ରଯୁକ୍ତିବିଦ୍ୟା ବିଭାଗ ସଚିବ ଭାବେ ବଦଳି କରାଯାଇଛି ।

ଭାରତ ନିୟନ୍ତ୍ରଣରେ ଇରାନର ଚାବାହାର ବନ୍ଦର

ଭାରତ ସହାୟତାରେ ଇରାନରେ ନିର୍ମିତ ଚାବାହାର ବନ୍ଦର ଏବେ କାର୍ଯ୍ୟକ୍ଷମ ହୋଇଛି । କିଛିମାସ ତଳେ ନିର୍ମାଣ କାର୍ଯ୍ୟ ଶେଷ ହେବା ପରେ ନିକଟରେ ଇରାନ ସରକାର ଏହି ବନ୍ଦରର ପରିଚାଳନାଭାର ଭାରତ ସରକାରଙ୍କୁ ହସ୍ତାନ୍ତର କରିଛନ୍ତି । ଭାରତ ସରକାରଙ୍କ ଦ୍ୱାରା ଗଠିତ ଇଣ୍ଡିଆ ପୋର୍ଟ୍ସ ଗ୍ଲୋବାଲ ଲିମିଟେଡ (ଆଇପିଜିଏଲ) ଏହି ପରିଚାଳନା ଦାୟିତ୍ୱ ଗ୍ରହଣ କରିଛି । ଏହି ବନ୍ଦର ଦ୍ୱାରା କେବଳ ଭାରତ, ଇରାନ ନୁହେଁ ଆଫଗାନିସ୍ତାନ ମଧ୍ୟ ବିଶେଷଭାବେ ଉପକୃତ ହେବ । ଏଣୁ ଏହାକୁ ଭାରତ-ଇରାନ-ଆଫଗାନିସ୍ତାନ ମୈତ୍ରୀ ଓ ରଣନୈତିକ ସହଯୋଗିତାର ଏକ ଅଂଶ ବୋଲି କୁହାଯାଉଛି ।

ଓଜନରେ ଠକୁଛନ୍ତି ବ୍ୟବସାୟୀ : ୩ ହଜାରରୁ ଅଧିକ ବ୍ୟବସାୟୀଙ୍କ ବିରୋଧରେ ମାମଲା

ରାଜ୍ୟର ବ୍ୟବସାୟୀମାନେ ବିଭିନ୍ନ ଉପାୟରେ ଉପଭୋକ୍ତାଙ୍କୁ ଠକୁଛନ୍ତି। ଚଳିତବର୍ଷ ୯ମାସ ଭିତରେ ରାଜ୍ୟରେ ୩ହଜାରରୁ ଅଧିକ ବ୍ୟବସାୟୀଙ୍କ ବିରୋଧରେ ମାମଲା ରୁଜୁ ହୋଇଛି। ସରକାରଙ୍କ ପକ୍ଷରୁ ଆବଶ୍ୟକ ସଚେତନତାର ଅଭାବ ଓ ନିୟମିତ ଚଢ଼ଉ ହେଉ ନଥିବାରୁ ବ୍ୟବସାୟୀମାନେ ଉପଭୋକ୍ତାଙ୍କୁ ଠକିବାରେ ଲାଗିଛନ୍ତି। ସୂଚନା ଅନୁସାରେ, ଚଳିତବର୍ଷ ଏପ୍ରିଲ ମାସରୁ ନଭେମ୍ବର ମାସ ମଧ୍ୟରେ ରାଜ୍ୟ‌ରେ ୩୧୧୭ଜଣ ବ୍ୟବସାୟୀଙ୍କ ବିରୋଧରେ ଓଜନରେ ଠକିବା ମାମଲା ରୁଜୁ ହୋଇଛି। ଏହି ସମସ୍ତ ବ୍ୟବସାୟୀଙ୍କଠାରୁ ୬୨ଲକ୍ଷ ୭ହଜାରରୁ ଅଧିକ ଟଙ୍କା ଜରିମାନା ମଧ୍ୟ ଆଦାୟ କରାଯାଇଛି।

ଟାଇଗରଙ୍କ ଉର୍ବଶୀ ଡାନ୍ସ

ବଲିଉଡ ଅଭିନେତା ଟାଇଗର ଶ୍ରଫଙ୍କ ଉର୍ବଶୀ ଡାନ୍ସଟି ଭାଇରାଲ ହୋଇ ବେଶ ଚର୍ଚାକୁ ଆସିଛି। ହନି ସିଂହଙ୍କ ଏଇ ଗୀତରେ ଟାଇଗରଙ୍କ ଆକ୍ସନ ଭରା ଡାନ୍ସ ବେଶ ଭାଇରାଲ ହୋଇଛି। ବିନା ଶର୍ଟରେ ଟାଇଗରଙ୍କ ଡାନ୍ସ ଷ୍ଟେପ ଗୁଡିକ ଦର୍ଶକଙ୍କୁ ବେଶ ପସନ୍ଦ ଆସିଛି। ‘ହିରୋପନ୍ତି’ ଜରିଆରେ ବଲିଉଡକୁ ଏଣ୍ଟ୍ରି କରି ବଲିଉଡର ବାଘି ସାଜିଛନ୍ତି ଟାଇଗର।  ତାଙ୍କୁ କରନଙ୍କ ଆଗାମୀ ଫିଲ୍ମ ‘ଷ୍ଟୁଡେଣ୍ଟ ଅଫ ଦି ଇୟର-2’ରେ ଦେଖିବାକୁ ମିଳିବ।

ପାଣ୍ଠି ମାଗିଲେ ନବୀନ

ସାଂସଦ ଓ ବିଧାୟକଙ୍କ ଗୋଟିଏ ମାସର ଦରମାକୁ ଦଳୀୟ ପାଣ୍ଠିକୁ ଦେବାକୁ ଅନୁରୋଧ କରିଛନ୍ତି ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ । ଏହା ସହିତ ପ୍ରତି ଜିଲ୍ଲାରୁ ଯେଉଁ ଶୁଭେଚ୍ଛୁ ଓ ସମର୍ଥକ ବିଜେଡି ଦଳକୁ ପାଣ୍ଠି ସଂଗ୍ରହ କରିବାରେ ସହଯୋଗ କରିବାକୁ ଚାହୁଁଛନ୍ତି, ସେମାନେ ଚେକ୍ କିମ୍ବା ଅନଲାଇନରେ ଏହାକୁ ଦେବା ପାଇଁ  କୁହାଯାଇଛି । ଆସନ୍ତା କାଲି ବିଜେଡି ୨୧ ବର୍ଷ ପୂରଣ କରି ୨୨ ବର୍ଷରେ ପହଞ୍ଚିବ । ନିର୍ବାଚନ ପୂର୍ବରୁ ତଥା ପ୍ରତିଷ୍ଠା ଦିବସ ଅବସରରେ ଦଳୀୟ ସଙ୍ଗଠନକୁ ଦୃଢ କରିବା ପାଇଁ ନବୀନ ଏହି ପ୍ରୟାସ ଆରମ୍ଭ କରିଛନ୍ତି।

ପାମ୍‌ ସ୍ପ୍ରିଙ୍ଗ୍‌ସ ଉତ୍ସବରେ ‘ଦି ଲାଷ୍ଟ୍‌ କଲର’

ଓଡ଼ିଆ ପୁଅ ଜିତେନ୍ଦ୍ର ମିଶ୍ରଙ୍କ ଚଳଚ୍ଚିତ୍ର ‘ଦି ଲାଷ୍ଟ୍‌ କଲର’ ପାମ୍‌ ସ୍ପ୍ରିଙ୍ଗ୍‌ସ ଅନ୍ତର୍ଜାତୀୟ ଚଳଚ୍ଚିତ୍ର ଉତ୍ସବ‌ରେ ପ୍ରଦର୍ଶିତ ହେବ। ସେଫ୍‌ ବିକାଶ ଖାନ୍ନାଙ୍କ ନିର୍ଦ୍ଦେଶିତ ଏବଂ ନିନା ଗୁପ୍ତାଙ୍କ ଅଭିନୀତ ଏହି ଚଳଚ୍ଚିତ୍ର ଏକ ବିଶ୍ଵସ୍ତରୀୟ ପ୍ରଦର୍ଶନୀରେ ପ୍ରଥମେ ପ୍ରଦର୍ଶିତ ହେବ। ବିନ୍ଦୁ ଖାନ୍ନା, ପୁନମ୍‌ କୌଲ୍‌ଙ୍କ ସମେତ ଜିତେନ୍ଦ୍ର ମିଳିତ ଭାବେ ଏହି ଚଳଚ୍ଚିତ୍ର ପ୍ରସ୍ତୁତ କରିଛନ୍ତି। ଜଣେ ୯ ବର୍ଷର ଫୁଲ ବିକାଳି ଛୋଟି ଏବଂ ୭୦ ବର୍ଷର ବିଧବା ବୃଦ୍ଧା ନୁର୍‌ଙ୍କୁ ନେଇ ଏ ଫିଲ୍ମଟି ଗତିଶୀଳ। ହାଉସ୍‌ ଅଫ୍‌ ଓମ୍‌କାରା ବ୍ୟାନର୍‌ରେ ପ୍ରସ୍ତୁତ ଏହି ସିନେମାରେ ଓଡ଼ିଆ ପୁଅ ଶୁଭ୍ରାଂଶୁ ଦାସ କ୍ୟାମେରା ପରିଚାଳନା କରିଛନ୍ତି। ନୀନା ଗୁପ୍ତାଙ୍କ ବ୍ୟତୀତ ଆକ୍ସା ସିଦ୍ଦିକ୍‌, ରୁଦ୍ରାଣୀ ଛେତ୍ରୀ ପ୍ରମୁଖ ଏହି ସିନେମାରେ ଅଭିନୟ କରୁଛନ୍ତି।

ଭାରତ ଆସିବା ଲାଗି ମନା କଲେ ଚୋକ୍‌ସୀ

ଭାରତ ଆସି ପାରିବି ନାହିଁ ବୋଲି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)କୁ ମନା କରିଛନ୍ତି ପଳାତକ ବ୍ୟବସାୟୀ ମେହୁଲ ଚୋକ୍‌ସୀ। ନିଜ ପୁତୁରା ନିରବ ମୋଦିଙ୍କ ସହ ମିଶି ପଞ୍ଜାବ ନ୍ୟାସନାଲ ବ୍ୟାଙ୍କକୁ ୧୩,୦୦୦ କୋଟି ଟଙ୍କା ଠକିଥିବା ମେହୁଲ ଚୋକ୍‌ସୀଙ୍କୁ ଭାରତ ଆଣିବା ଲାଗି ନୋଟିସ୍‌ କରିଥିଲା ଇଡି। ଏହାର ଜବାବରେ ଚୋକ୍‌ସୀ କହିଛନ୍ତି, ‘ମୋ ଦେହ ଅସୁସ୍ଥ, ତେଣୁ ୪୧ ଘଣ୍ଟା ଯାତ୍ରା କରି ଭାରତ ଯାଇ ପାରବି ନାହିଁ। ୨୦୧୮ ମସିହା ଜାନୁଆରିରେ ଚୋକ୍‌ସୀ ଭାରତରୁ ପଳାୟନ କରି ଆଣ୍ଟିଗୁଆର ନାଗରିକତ୍ୱ ନେଇ ସେଠାରେ ଅଛନ୍ତି।

ଭିଡିଓକୁ ନେଇ ବିବାଦରେ କୁମାରସ୍ୱାମୀ

ଏକ ଭିଡିଓକୁ ନେଇ ବିବାଦୀୟ ହୋଇପଡ଼ିଛନ୍ତି କର୍ଣ୍ଣାଟକ ମୁଖ୍ୟମନ୍ତ୍ରୀ ଏଚ୍‌ଡି କୁମାରସ୍ୱାମୀ।  ସେ ଏହି ଭିଡିଓରେ  ଉତ୍‌କ୍ଷିପ୍ତ ହୋଇ ଅପରାଧୀମାନଙ୍କୁ ଦୟାମାୟା ନ ଦେଖାଇ ଗୁଳି କରି ହତ୍ୟା କରିବାକୁ ଜଣେ ପୁଲିସ ଅଫିସରଙ୍କୁ ଫୋନ୍‌ରେ ନିର୍ଦ୍ଦେଶ ଦେଉଛନ୍ତି। ଏହି ଭିଡିଓ ସାର୍ବଜନୀନ ହେବା ପରେ ବିରୋଧୀ ବିଜେପି ମୁଖ୍ୟମନ୍ତ୍ରୀଙ୍କୁ କଡ଼ା ସମାଲୋଚନା କରିଛନ୍ତି। ଏହାର ଜବାବରେ ମୁଖ୍ୟମନ୍ତ୍ରୀ ଶ୍ରୀ କୁମାରସ୍ୱାମୀ କହିଛନ୍ତି ଯେ ସେ ଏ ପ୍ରକାର ନିର୍ଦ୍ଦେଶ ଦେଇ ନାହାଁନ୍ତି । କର୍ମୀଙ୍କ ହତ୍ୟା ଘଟଣାରେ ଉତ୍ତେଜିତ ଓ ଭାବପ୍ରବଣ ହୋଇ ସେ ଏପରି କହିଦେଇଥିବା କହି ସଫେଇ ଦେଇଛନ୍ତି।

ନେତାଜୀଙ୍କ ସ୍ମୃତିରେ ଆଣ୍ଡାମାନର ୩ଟି ଦ୍ୱୀପର ନୂତନ ନାମକରଣ

ଆଣ୍ଡାମାନ ନିକୋବର ଦ୍ୱୀପପୁଞ୍ଜର ୩ଟି ଦ୍ୱୀପର ନାମ ଭାରତ ସରକାର ଖୁବଶୀଘ୍ର ପରିବର୍ତ୍ତନ କରିବାକୁ ଯାଉଛନ୍ତି ବୋଲି ସୂଚନା ରହିଛି। ମହାନ ସ୍ୱାଧୀନତା ସଂଗ୍ରାମୀ ସୁବାସ ଚନ୍ଦ୍ର ବୋଷଙ୍କ ଆଣ୍ଡାମାନ ନିକୋବର ଦ୍ୱୀପରେ ୧୯୪୩ ମସିହାରେ ପଦାର୍ପଣ କରି ଜାତୀୟ ପତାକା ଉତ୍ତୋଳନ କରିଥିବା ଐତିହାସିକ ଘଟଣାର ୭୫ ବର୍ଷ ପୂର୍ତ୍ତି ଅବସରରେ କେନ୍ଦ୍ର ସରକାର ଆଣ୍ଡାମାନ ନିକୋବରର ୩ଟି ଦ୍ଵୀପକୁ ଯଥାକ୍ରମେ ନେତାଜୀ ସୁବାସ ଚନ୍ଦ୍ର ବୋଷ ଦ୍ୱୀପ, ସହୀଦ ଦ୍ୱୀପ ଓ ସ୍ୱରାଜ ଦ୍ୱୀପ ଭାବେ ନାମିତ କରିବାକୁ ଯାଉଛନ୍ତି।  ଆସନ୍ତା ଡିସେମ୍ବର ମାସ ୩୦ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୋର୍ଟ ବ୍ଲେୟାର ଗସ୍ତ କାଳରେ ଏହି ଘୋଷଣା କରି ପାରନ୍ତି ବୋଲି ଅନୁମାନ କରାଯାଉଛି।

ପ୍ରଶାସନିକ ସେବା ପରୀକ୍ଷାରେ ସର୍ବାଧିକ ବୟସ ସୀମାକୁ କମ୍ କରାଯିବ ନାହିଁ

ପ୍ରଶାସନିକ ସେବା ପରୀକ୍ଷାରେ ସର୍ବାଧିକ ବୟସ ସୀମାକୁ କମ୍ କରାଯିବ ନାହିଁ। ଏନେଇ କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହ କହିଛନ୍ତି କି, ସରକାର ପ୍ରଶାସନିକ ସେବା ପରୀକ୍ଷାରେ ସର୍ବାଧିକ ବୟସ ସୀମାକୁ କମ୍ କରାଯିବା ନେଇ କୌଣସି ପଦକ୍ଷେପ ନେଇ ନାହାନ୍ତି । ଏହି ବିଷୟରେ ଯେଉଁ ଆକଳନ କରାଯାଉଥିଲା, ତା’ ଉପରେ ପୂର୍ଣ୍ଣଚ୍ଛେଦ ପଡିବା ଉଚିତ୍ । କିଛି ଦିନ ପୂର୍ବରୁ ନୀତି ଆୟୋଗ , ସିଭିଲ ସେବା ପରୀକ୍ଷା ପାଇଁ ପରୀକ୍ଷାର୍ଥୀଙ୍କ ସର୍ବାଧିକ ବୟସ ସୀମା କମ୍ କରାଇ ୩୦ ବର୍ଷରୁ କମାଇ ୨୭ ବର୍ଷ କରାଯିବା ଉଚିତ୍ ବୋଲି କେନ୍ଦ୍ର ସରକାରଙ୍କ ନିକଟରେ ସୁପାରିଶ କରିଥିଲା।

 ‘ସଦୈବ ଅଟଳ’ ସ୍ମାରକୀ ଲୋକାର୍ପିତ

ଆଜି ଭାରତର ପୂର୍ବତନ ପ୍ରଧାନମନ୍ତ୍ରୀ, ଭାରତରତ୍ନ ଅଟଳ ବିହାରୀ ବାଜପେୟୀଙ୍କ ୯୪ତମ ଜୟନ୍ତୀ। ଏହି ଅବସରରେ ରାଷ୍ଟ୍ରୀୟ ସ୍ମୃତିସ୍ଥଳରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ‘ସଦୈବ ଅଟଳ’ ସ୍ମାରକୀକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି। ଅଟଳ ବିହାରୀ ବାଜପେୟୀଙ୍କୁ ସ୍ମୃତିରକ୍ଷା ପାଇଁ କେନ୍ଦ୍ର ସରକାରଙ୍କ ପକ୍ଷରୁ ଏହି ସ୍ମାରକୀ ନିର୍ମାଣ କରାଯାଇଛି। ଏହି ଅବସରରେ ରାଷ୍ଟ୍ରପତି ରାମନାଥ କୋବିନ୍ଦ, ଉପରାଷ୍ଟ୍ରପତି ଭେଙ୍କିୟା ନାଇଡୁ, ପୂର୍ବତନ ପ୍ରଧାନମନ୍ତ୍ରୀ ଡ. ମନମୋହନ ସିଂହ, ଭାରତୀୟ ଜନତା ପାର୍ଟି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହଙ୍କ ସହିତ ବହୁ ମାନ୍ୟଗଣ୍ୟ ବ୍ୟକ୍ତି ସ୍ୱର୍ଗତ ବାଜପେୟୀଙ୍କ ରାଷ୍ଟ୍ରୀୟ ସ୍ମୃତିସ୍ଥଳଠାରେ ଥିବା ଏହି ସଦୈବ ଅଟଳ ସ୍ମାରକୀରେ ଶ୍ରଦ୍ଧାସୁମନ ଅର୍ପଣ କରିଛନ୍ତି।

ଦେଶର ଦୀର୍ଘତମ ବ୍ରିଜ : ବୋଗିବିଲ

୨୧ବର୍ଷ ପରେ କାର୍ଯ୍ୟକ୍ଷମ ହେଲା ଦେଶର ସବୁଠୁ ଲମ୍ବା ରେଳ ଓ ସଡକ ପଥ ବୋଗିବିଲ। ଆସାମର ବ୍ରହ୍ମପୁତ୍ର ନଦୀ ଉପରେ ନିର୍ମିତ ଡବଲ ଡେକର ବୋଗିବିଲ ପୋଲ ଆସାମକୁ ଅରୁଣାଚଳ ପ୍ରଦେଶ ସହ ଯୋଡିଛି ।  ଗୌହାଟୀ ଠାରୁ ପ୍ରାୟ ୪ଶହ କିମି ଦୂରରେ ନିର୍ମିତ ହୋଇଛି ଏହି ବ୍ରିଜ । ଦେଶର ଦୀର୍ଘତମ ଏହି ବ୍ରିଜର ଲମ୍ବା ରହିଛି ପାଖାପାଖି ୪.୯୪କିଲୋମିଟର ।  ୧୯୮୫ ମସିହାରେ ପୋଲ ନିର୍ମାଣ ପାଇଁ ଯୋଜନା କରାଯାଇଥିଲା । ଷ୍ଟେନଲେସ ସାମଗ୍ରୀ ବ୍ୟବହାର ହୋଇଛି । ଯାହା ୧୨୦ ବର୍ଷ ପର୍ଯ୍ୟନ୍ତ ବ୍ରିଜକୁ ସମ୍ପୂର୍ଣ୍ଣ ସୁରକ୍ଷିତ ରଖିବ । ଏହି ପୋଲ ନିର୍ମାଣରେ ଖର୍ଚ୍ଚ ହୋଇଛି ପ୍ରାୟ ୬ହଜାର କୋଟି ଟଙ୍କା। ଏହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦଘାଟନ କରିଛନ୍ତି।

 ୟୁଏସ୍ କିଡ୍‌ସ ଜୁନିଅର ଗଲ୍ଫ ବିଶ୍ୱ ଚାମ୍ପିଅନଶିପ୍‌ର ବିଜେତା ହେଲେ ଅର୍ଜୁନ

ୟୁଏସ୍ କିଡ୍‌ସ ଗଲ୍ଫ ଫାଉଣ୍ଡେସନ୍ ପକ୍ଷରୁ ମାଲେସିଆରେ ଅନୁଷ୍ଠିତ ୟୁଏସ୍ କିଡ୍‌ସ ଜୁନିଅର ଗଲ୍ଫ ବିଶ୍ୱ ଚାମ୍ପିଅନଶିପ୍‌ ଗ୍ରେଟର ନୋଏଡାର ଗ୍ରେଟର ୱେଲୀ ସ୍କୁଲ୍‌ର ଛାତ୍ର ଅର୍ଜୁନ ଭାଟୀ ଚାମ୍ପିଅନ ହୋଇଛନ୍ତି। ସେ ଆମେରିକାର ଏଲେକ୍ସ ମୋ’ଙ୍କୁ ୩ଟି ଶଟ୍‌ରେ ହରାଇ ଏହି ଟାଇଟାଲ୍‌କୁ ନିଜ ନାଁରେ କରି ନେଇଛନ୍ତି। ଏହି ପ୍ରତିଯୋଗିତାରେ ୨୯ଟି ଦେଶର ଖେଳାଳି ଭାଗ ନେଇଥିଲେ। ୧୩ରୁ ୧୪ ବର୍ଷ ବର୍ଗରେ ଅର୍ଜୁନଙ୍କୁ ଏହି ସଫଳତା ମିଳିଥିଲା। ଏହି ପ୍ରତିଯୋଗିତାରେ ଆଉ ଦୁଇ ଭାରତୀୟ ଖେଳାଳି ପାବ୍‌ଲୋ ସୁନ୍ଦରମ୍‌ ଓ ପର୍ଣ୍ଣିକା ଶର୍ମା ଭାଗ ନେଇଥିଲେ।

ସରକାରୀ ଓ ବେସରକାରୀ ଉଭୟଙ୍କୁ ମିଳିବ ସର୍ବନିମ୍ନ ମଜୁରୀ

କେନ୍ଦ୍ରୀୟ ଶ୍ରମ ମନ୍ତ୍ରାଳୟ ସହ ଜଡିତ ସଂସଦର ଷ୍ଟାଣ୍ଡିଂ କମିଟି ପକ୍ଷରୁ ସବୁ କ୍ଷେତ୍ରର କର୍ମଚାରୀଙ୍କ ପାଇଁ ଏକ ସର୍ବନିମ୍ନ ପାରିଶ୍ରମିକ ବା ମଜୁରୀ (ମିନିମମ୍ ୱେଜ୍) ଲାଗୁ କରିବାକୁ ସୁପାରିସ୍ ହୋଇଛି । ଏହା ଉଭୟ ସରକାରୀ, ବେସରକାରୀ, ସଂଗଠିତ ଅଥବା ଅସଂଗଠିତ ସବୁ କ୍ଷେତ୍ରରେ କାମ କରୁଥିବା କର୍ମଚାରୀଙ୍କ ପାଇଁ ଏକ ସର୍ବନିମ୍ନ ପାରଶ୍ରମିକ ଲାଗୁ ହେବ । ଖାଲି ଏତିକି ନୁହେଁ ସର୍ବନିମ୍ନ ପାରିଶ୍ରମିକ ଦେବାକୁ ମନା କରିବା ଉପରେ ଉଭୟ ସଂସ୍ଥା ବା କଂପାନୀକୁ ଜରିମାନା ବାବଦକୁ ୧୦ ଲକ୍ଷ ଟଙ୍କା ଦେବାକୁ ପଡିପାରେ । ସେହିପରି ଏହି ନିୟମ ଅନୁସାରେ କୌଣସି ସଂସ୍ଥା କିମ୍ବା କଂପାନୀ କର୍ମଚାରୀଙ୍କୁ ୮ ଘଣ୍ଟାରୁ ଅଧିକ ସମୟ ପର୍ଯ୍ୟନ୍ତ କାମ କରାଇପାରିବେ ନାହିଁ । ଅଭିଜ୍ଞ ଓ ନବାଗତଙ୍କ ସମାନ ପାରିଶ୍ରମିକ ରହିବ ନାହିଁ ବୋଲି ନିୟମ ରହିଛି।

ଲମ୍ବାକେଶ ପାଇଁ  ଗିନିଜ ରେକର୍ଡରେ ସ୍ଥାନ ପାଇଲେ ନିଳାଂଶୀ

ଗୁଜୁରାଟର ନିଳାଂଶୀ ପଟେଲ ଦୁନିଆର ସବୁଠୁ ଅଧିକ ଲମ୍ବା କେଶର ଅଧିକାରିଣୀ ହୋଇ ଗିନିଜ ବୁକ ଅଫ ରେକର୍ଡରେ ସ୍ଥାନ ପାଇଛନ୍ତି।। ନିଳାଂଶୀ ସବୁଠୁ କମ ବୟସରେ ଏହି ରେକର୍ଡର ଧିକାରିଣୀ ହୋଇଛନ୍ତି। ତାଙ୍କର କେଶର ଲମ୍ବ ୫. ୭ଫୁଟ ରହିଛି। ସେ ୬ ବର୍ଷ ବୟସରୁ କେଶ ରଖିବା ଆରମ୍ଭ କରିଥିଲେ। ପୂର୍ବରୁ ଏଇ ରେକର୍ଡ ଆର୍ଜେଣ୍ଟିନାର ୧୭ ବର୍ଷୀୟା ଅବ୍ରିଲଙ୍କ ନାମରେ ରହିଥିଲା ତେବେ ଲମ୍ବା କେଶଧାରୀ ମହିଳାଙ୍କ ଭିତରେ ଚାଈନାର ଜି କୁପିଙ୍ଗଙ୍କ ନାମରେ ରହିଛି। ତାଙ୍କ କେଶର ଲମ୍ବ ୧୮ ଫୁଟ ୫.୫୪ ରହିଛି।

ରଥଯାତ୍ରା ଅନୁମତି ପାଇଁ ସୁପ୍ରିମକୋର୍ଟରେ ପହଞ୍ଚିଲା ବିଜେପି

ପଶ୍ଚିମବଙ୍ଗରେ ଭାରତୀୟ ଜନତା ପାର୍ଟିକୁ ‘ରଥଯାତ୍ରା କରିବା ପାଇଁ ସରକାରଙ୍କ ପକ୍ଷରୁ ରେଡ୍ ସିଗନାଲ୍ ମିଳିବା ପରେ ସୁପ୍ରିମକୋର୍ଟର ଦ୍ୱାରସ୍ଥ ହୋଇଛି ବିଜେପି । ସୂଚନା ଅନୁଯାୟୀ, କୋଲକାତା ହାଇକୋର୍ଟର ଦୁଇ ଜଣିଆ ଖଣ୍ଡପୀଠ ବିଜେପିର ଏହି ଯାତ୍ରା ଉପରେ ରୋକ୍ ଲଗାଇଥିଲେ. କୋଲକାତା ହାଇକୋର୍ଟର ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟର ଦ୍ୱାରସ୍ଥ ହୋଇଛି ବିଜେପି । ଏହି ମାମଲାର ତତ୍କାଳ ଶୁଣାଣୀକୁ ସୁପ୍ରିମକୋର୍ଟ ଅଗ୍ରାହ୍ୟ କରିଥିବାବେଳେ ପଶ୍ଚିମବଙ୍ଗରେ ବିଜେପି ରଥଯାତ୍ରା କରିବା ନେଇ ଏକ ଯାଚିକା ସୁପ୍ରିମକୋର୍ଟରେ ଦାଖଲ କରାଯାଇଛି । କିନ୍ତୁ ଏହି ମାମଲାର ଶୁଣାଣୀ କେବେ ହେବ ସେନେଇ କିଛି ସ୍ପଷ୍ଟ ହୋଇନାହିଁ ।

 ବହୁଚର୍ଚ୍ଚିତ ପିପିଲି ଗଣଦୁଷ୍କର୍ମ ଓ ହତ୍ୟା ମାମଲାର ରାୟ ପ୍ରକାଶ: ପ୍ରମାଣ ଅଭାବରୁ ଅଭିଯୁକ୍ତ ନିର୍ଦ୍ଦୋଷ ଘୋଷଣା

ପିପିଲି ଗଣଦୁଷ୍କର୍ମ ସମଗ୍ର ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିଲା। ସୋମବାର ଭୁବନେଶ୍ୱର ଅତିରିକ୍ତ ଜିଲ୍ଲା ଦୌରାଜଜ ଏହି ଘଟଣାରେ ସମ୍ପୃକ୍ତ ଥିବା ଦୁଇ ଅଭିଯୁକ୍ତ ସୁକାନ୍ତ ପ୍ରଧାନ ଓ ପ୍ରଶାନ୍ତ ପ୍ରଧାନଙ୍କୁ ପ୍ରମାଣ ଅଭାବରୁ ନିର୍ଦ୍ଦୋଷ ଘୋଷଣା କରିଛନ୍ତି। ସୂଚନାଯୋଗ୍ୟ, ୨୦୧୧ ନଭେମ୍ବର ୨୯ ତାରିଖରେ ଅର୍ଥାତ ସାତ ବର୍ଷ ତଳେ ପିପିଲି ଥାନା ଅନ୍ତର୍ଗତ ଅର୍ଜୁନଗୋଦା ଗ୍ରାମର ବବିନା ବେହେରାଙ୍କ ସହିତ ଗଣଦୁଷ୍କର୍ମ ହୋଇଥିଲ।

ଆରବ ସାଗରରେ ନିର୍ମାଣ ହେବ ଶିବାଜୀଙ୍କ ପ୍ରତିମୂର୍ତ୍ତି : ବ୍ୟୟ ହେବ ୩୬୪୩. ୭୮ କୋଟି

ମୁମ୍ବାଇ ଉପକୂଳ ଆରବ ସାଗରରେ ଛତ୍ରପତି ଶିବାଜୀ ମହାରାଜଙ୍କ ପ୍ରତିମୂର୍ତ୍ତି ଗଢ଼ିବା ଲାଗି ୩୬୪୩. ୭୮ କୋଟି ଟଙ୍କା ବ୍ୟୟ କରିବାକୁ ପଡ଼ିବ ବୋଲି ମହାରାଷ୍ଟ୍ର ସରକାର ସୂଚନା ଦେଇଛନ୍ତି ।  ଏହି କାର୍ଯ୍ୟ ୨୦୨୨-୨୩ ସୁଦ୍ଧା ଶେଷ ହେବ ବୋଲି ସରକାର କହିଛନ୍ତି। ୨୦୧୮ ମସିହା ନଭେମ୍ବର ୧ ତାରିଖ ଦିନ ରାଜ୍ୟ କ୍ୟାବିନେଟ୍‌ ଏହି ପ୍ରକଳ୍ପ ରିପୋର୍ଟକୁ ଅନୁମୋଦନ କରିବା ସହ ସମୁଦାୟ ଖର୍ଚ୍ଚ ୩୭୦୦. ୮୪ କୋଟି ଟଙ୍କା ମଞ୍ଜୁର କରିଛନ୍ତି।  ୨୦୧୯-୨୦ ବର୍ଷରେ ମୂର୍ତ୍ତି ଓ ସମୁଦ୍ର ପାଚେରି ତିଆରି କାମ ଆରମ୍ଭ ହେବ ବୋଲି ସୂଚନା ରହିଛି।

ଭ୍ରଷ୍ଟାଚାର ମାମଲାରେ ନୱାଜଙ୍କୁ ୭ ବର୍ଷ ଜେଲ

ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନଓ୍ବାଜ ଶରିଫ ଏନ୍‌ଏବି ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି। ୬୮ ବର୍ଷୀୟ ଶରିଫଙ୍କୁ ଫ୍ଲାଗଶିପ୍‌ ଇନଭେଟେମେଣ୍ଟସ୍‌ ଓ ଅଲ ଅଜୀଜିଆ ଷ୍ଟିଲ ମିଲ୍ ମାମଲାରେ ଅଦାଲତ ଦୋଷୀ ସାବ୍ୟସ୍ତ କରି ୭ ବର୍ଷର ଜେଲଦଣ୍ଡ ଶୁଣାଇଛନ୍ତି। ଶରିଫଙ୍କ ବିରୁଦ୍ଧରେ ୨.୫ମିଲିୟନର ଜୋରିମାନା ମଧ୍ୟ ଲାଗିଛି ।  ସୂଚନାଯୋଗ୍ୟ, ଏହି ଦୁଇ ମାମଲାର ରାୟ ଗତ ସପ୍ତାହରେ ସଂରକ୍ଷିତ ରଖା ଯାଇଥିଲା।  ନୱାଜ ସରିଫଙ୍କ ବିରୁଦ୍ଧରେ ଭ୍ରଷ୍ଟାଚାରର ବହୁ ଅଭିଯୋଗ ମଧ୍ୟ ଆସିଥିଲା । ତାଙ୍କୁ ୧୦ ବର୍ଷ ପର୍ଯ୍ୟନ୍ତ ନିର୍ବାଚନ ଲଢିବା ପାଇଁ ଅଯୋଗ୍ୟ ଘୋଷଣା କରାଯାଇଥିଲା ।

ଥଣ୍ଡାରୁ ରକ୍ଷା ପାଇଁ କଲେଜର ଲାଇବ୍ରେରୀରେ ନିଆଁ ଲଗାଇଲେ ଯୁବକ

ଶୀତରୁ ବଞ୍ଚିବା ପାଇଁ ଜଣେ ଯୁବକ ଇଣ୍ଟର କଲେଜର ଏକ ଲାଇବ୍ରେରୀରେ ନିଆଁ ଲଗାଇ ଦେବାର ଏକ ଘଟଣା ସାମ୍ନାକୁ ଆସିଛି। ଏଭଳି ଏକ ଅଭାବନୀୟ ଘଟଣା ଖେତାଡି ଅଞ୍ଚଳରେ ଘଟିଛି। ଶୀତ କୋପରୁ ରକ୍ଷା ପାଇବା ପାଇଁ ଜଣେ ଯୁବକ ସ୍ଥାନୀୟ ଅଞ୍ଚଳରେ ଥିବା ଏକ ଇଣ୍ଟର କଲେଜର ତାଲା ଭାଙ୍ଗି ଲାଇବ୍ରେରୀରେ ପଶିଥିଲେ। ଏହା ସତ୍ତ୍ୱେ ବି ଶୀତ ନକମିବାରୁ ସେ ଲାଇବ୍ରେରୀରେ ଥିବା ବହିରେ ନିଆଁ ଲଗାଇଦେଇଥିଲେ। ଏହି ନିଆଁରେ ପ୍ରାୟ ୩୦ ହଜାରରୁ ଅଧିକ ଟଙ୍କାର ବହି ଜଳିପୋଡି ପାଉଁଶ ହୋଇଥିବା ସୂଚନା ରହିଛି।

ଲଭ ଆଜ କାଲ-୨ରେ ନଜର ଆସିବେ ସାରା- କାର୍ତିକ

‘ଲଭ ଆଜ କାଲ-୨’ରେ ସାରା ଅଲ୍ଲୀ ଖାନ ଓ କାର୍ତିକ ଆୟାନ ନଜର ଆସିବେ। ଇମିତିଆଜ ଅଲ୍ଲୀଙ୍କ ୨୦୦୯ର ସୁପରହିଟ ଫିଲ୍ମ ‘ଲଭ ଆଜ କାଲ’ରେ ଏହା ସ୍ଵିକେଲ ଅଟେ। ଏହି ଫିଲ୍ମରେ ସୈଫ୍‌ଅଲ୍ଲୀ ଖାନ ଓ ଦୀପିକା ପାଦୁକୋନ ନଜର ଆସିଥିଲେ। ତେବେ ଏହାର ଦ୍ଵିତୀୟ ସଂସ୍କରଣରେ ସୈଫ୍‌ଙ୍କ ସୁପୁତ୍ରୀ ସାରା ଅଭିନୟ କରିବେ ବୋଲି ଜଣାପଡିଛି। ୨୦୦୯ରେ ଏହି ସୁପରହିଟ ଫିଲ୍ମରେ ସୈଫ୍‌ ଓ ଦୀପିକାଙ୍କ ଅଭିନୟ ବେଶ ପ୍ରସଂଶନୀୟ ହୋଇଥିଲା। ତେବେ ଏହାର ସ୍ଵୀକେଲଟିକୁ ଇମ୍‌ତିଆଜ୍‌ ନିର୍ଦେଶନା ଦେଉଥିବାବେଳେ ଏଥିରେ  ସୈଫ୍‌ ନଜର ଆସିବେ କି ନାହି ତାହା ସ୍ପଷ୍ଟ ହୋଇନି।

ଶୀତ ଆଉ ପ୍ରଦୂଷଣରେ ଥରହର ଦିଲ୍ଲୀ

ପ୍ରଥମେ ପ୍ରଦୂଷଣ ଏବଂ ପରେ ଥଣ୍ଡା । ରାଜଧାନୀ ଦିଲ୍ଲୀରେ ହାଡଭଙ୍ଗା ଶୀତ ସାଙ୍ଗକୁ ଅଣନିଶ୍ୱାସୀ କରିଦେଉଥିବା ଭଳି ପ୍ରଦୂଷଣ ରାଜଧାନବାସୀଙ୍କ ପାଇଁ ଏବେ ଚିନ୍ତାର କାରଣ ପାଲଟିଛି । ରବିବାର ଦିନ ଚଳିତ ବର୍ଷରେ ଦ୍ୱିତୀୟ ଥର ପାଇଁ ପ୍ରଦୂଷଣସ୍ତର ସବୁଠାରୁ ଅଧିକ ରହିଥିଲା । ଯାହାକୁ ଦୃଷ୍ଟିରେ ରଖି ବରିଷ୍ଠ ଅଧିକାରୀମାନେ ଲୋକମାନଙ୍କୁ ଘରୁ ଅଧିକାଂଶ ସମୟ ନବାହାରିବା ପାଇଁ ପରାମର୍ଶ ଦେଇଛନ୍ତି । ଅଧିକାରୀମାନଙ୍କ କହିବା ଅନୁଯାୟୀ, ବର୍ତ୍ତମାନ ସମୟରେ ପାଣିପାଗ ପରିସ୍ଥିତି ଅନୁକୂଳ ରହିନଥିବା କାରଣରୁ ଆଗାମୀ କିଛି ଦିନ ପାଇଁ ଦିଲ୍ଲୀର ତାପମାତ୍ରା ଏପରି ଗମ୍ଭୀର ସ୍ଥିତିରେ ରହିବ।