ଟି 20 ବିଶ୍ବକପ୍‌ ବର୍ଜନ ନେଇ ପାକିସ୍ତାନର ଧମକ

ପାକିସ୍ତାନରେ ଆୟୋଜିତ ହେବାକୁ ଥିବା ଏସିଆ କପ୍‌ ପୂର୍ବରୁ ପିସିବି ପକ୍ଷରୁ ଏକ ବଡ ବୟାନ ପ୍ରଦାନ କରାଯାଇଛି । ଯଦି ଭାରତ ପାକିସ୍ତାନରେ ଆୟୋଜିତ ଏସିଆ କପ୍‌ରେ ଅଂଶ ଗ୍ରହଣ ନକରେ ତେବେ 2021ରେ ଭାରତରେ ଅନୁଷ୍ଠିତ ହେବାକୁ ଥିବା ଟି 20 ବିଶ୍ବକପ୍‌କୁ ପ୍ରତ୍ୟାଖ୍ୟାନର ଧମକ ଦେଇଛି ପାକିସ୍ତାନ । ବାଂଲାଦେଶ ପକ୍ଷରୁ ପାକିସ୍ତାନ ଗସ୍ତ କରାଯିବା ପରେ ପାକିସ୍ତାନ ଅନ୍ତର୍ଜାତୀୟ ମ୍ୟାଚ୍‌ ଆୟୋଜନ କରିବାର କ୍ଷମତା ହାସଲ କରିଛି । ମାତ୍ର ସୁରକ୍ଷାଗତ କାରଣ ଦର୍ଶାଇ ବିସିସିଆଇ ଖେଳାଳିଙ୍କୁ ପାକିସ୍ତାନ ପଠାଇବାକୁ ଚାହୁଁନାହିଁ । ଯଦି ବିସିସିଆଇ ଭାରତୀୟ ଟିମ୍‌କୁ ନପଠାଏ ତେବେ ପିସିବି ମଧ୍ୟ ଟି 20 ବିଶ୍ବକପ୍‌ ବର୍ଜନ କରିବ ବୋଲି ପିସିବି ମୁଖ୍ୟ ଓ୍ବାସିମ୍‌ ଖାନ୍‌ ପ୍ରକାଶ କରିଛନ୍ତି ।

ବିଗ୍‌ ବିଙ୍କ ସହିତ ଫଟୋ ସେୟାର କଲେ ମଞ୍ଜୁ ଓ୍ବାରିୟର

ବଲିଉଡ୍‌ ଅଭିନେତା ବିଗ୍‌ ବି ଅମିତାଭ ବଚ୍ଚନଙ୍କ ସହିତ ଫଟୋ ସେୟାର କରିଛନ୍ତି ଦକ୍ଷିଣୀ ଅଭିନେତ୍ରୀ ମଞ୍ଜୁ ଓ୍ବାରିୟର । ନିଜର ଅପ୍‌କମିଙ୍ଗ ମାଲାୟଲମ୍‌ ଫିଲ୍ମ ‘ପ୍ରତି ପୁଭାଙ୍କୋଝି’ର ପ୍ରମୋଶନ ପାଇଁ ମୁମ୍ବାଇରେ ରହିଥିବା ମଞ୍ଜୁ ବିଗ୍‌ ବି ଏବଂ ଜୟା ବଚ୍ଚନଙ୍କୁ ଭେଟିଥିଲେ । ମେଗାଷ୍ଟାର ଅମିତାଭଙ୍କୁ ଭେଟିବା ପରେ ଏକ ଫଟୋ ଟ୍ବିଟ୍ କରିଛନ୍ତି ମଞ୍ଜୁ । ଏହି ଫଟୋରେ ଉଭୟ ଅମିତାଭ୍, ଜୟା ଏବଂ ମଞ୍ଜୁ ଭାରତୀୟ ପରିପାଟୀରେ ନଜର ଆସିଛନ୍ତି । ‘ପ୍ରତି ପୁଭାଙ୍କୋଝି’ ଏକ ମହିଳା କୈନ୍ଦ୍ରିକ ଫିଲ୍ମ ହୋଇଥିବା ବେଳେ ମଞ୍ଜୁ ମୁଖ୍ୟ ଚରିତ୍ର ମାଧୁରୀ ଭୂମିକାରେ ନଜର ଆସିଛନ୍ତି ।

କପିଲ ମିଶ୍ରାଙ୍କ ପ୍ରଚାର ଉପରେ 48 ଘଣ୍ଟାର ରୋକ୍‌

ବିବାଦୀୟ ଟ୍ବିଟ୍‌ କାରଣରୁ ବିଜେପିର ମଡେଲ ଟାଉନ୍‌ ବିଧାୟକ ପ୍ରାର୍ଥୀ କପିଲ ମିଶ୍ରାଙ୍କ ଉପରେ 48 ଘଣ୍ଟାର ରୋକ୍‌ ଲଗାଯାଇଛି । ଆସନ୍ତା 48 ଘଣ୍ଟା ପର୍ଯ୍ୟନ୍ତ କପିଲ୍‌ ପ୍ରଚାର କରିପାରିବେ ନାହିଁ ବୋଲି ନିର୍ବାଚନ କମିଶନରଙ୍କ ପକ୍ଷରୁ କୁହାଯାଇଛି । ଶନିବାର ଅପରାହ୍ନ 5ଟା ପରଠାରୁ ଏହି ରୋକ୍‌ କାର୍ଯ୍ୟକାରୀ ହେବ ବୋଲି ଜଣାପଡିଛି । ଏହି ରୋକ୍‌ ଆଦେଶ ଉପରେ ମୁଖ୍ୟ ନିର୍ବାଚନ କମିଶନରଙ୍କ ସହିତ ଦୁଇ ନିର୍ବାଚନ ଅଧିକାରୀଙ୍କ ଦସ୍ତଖତ ରହିଛି । ପୂର୍ବରୁ ଟ୍ବିଟ୍ଟର ପକ୍ଷରୁ ମିଶ୍ରାଙ୍କ ଟ୍ବିଟ୍‌କୁ ପ୍ରତ୍ୟାହାର କରି ନିଆଯାଇଥିବା ବେଳେ ଧାରା 125 ଅନୁଯାୟୀ ଏକ ମାମଲା ରୁଜୁ କରାଯାଇଥିଲା ।

ନୃତ୍ୟ ଅଭ୍ୟାସ ସମୟରେ ପ୍ରାଣ ହରାଇଲେ ଛାତ୍ରୀ

କର୍ଣ୍ଣାଟକରେ ଜଣେ ଛାତ୍ରୀ ନୃତ୍ୟ ଅଭ୍ୟାସ କରୁଥିବା ସମୟରେ ହୃଦ୍‌ଘାତର ଶିକାର ହୋଇ ପ୍ରାଣ ହରାଇଛନ୍ତି । କର୍ଣ୍ଣାଟକର କୋଲାର ଗୋଲ୍ଡ ଫିଲ୍ଡ (କେଜିଏଫ୍‌)ରେ ଏହି ଘଟଣା ଘଟିଛି । ଶନିବାର ପୋଲିସ୍‌ ପକ୍ଷରୁ ପ୍ରକାଶିତ ସୂଚନା ଅନୁଯାୟୀ ନବମ ଶ୍ରେଣୀର ଛାତ୍ରୀ ପୂଜିତା ନୃତ୍ୟ ଅଭ୍ୟାସ କରୁଥିବା ସମୟରେ ପ୍ରାଣ ହରାଇଥିଲେ । ଗୁରୁବାର ନୃତ୍ୟ ଅଭ୍ୟାସ କରୁଥିବା ସମୟରେ ଅଚେତ ହେବାରୁ  ତାଙ୍କୁ ତୁରନ୍ତ ବଙ୍ଗାରପେଟର ଏକ ଘରୋଇ ହସ୍ପିଟାଲକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

ଛାତ୍ରୀଙ୍କ ବିକ୍ଷୋଭ ପରେ ବୁର୍ଖା ଉପରୁ ହଟିଲା କଟକଣା

ଛାତ୍ରୀଙ୍କ ଆନ୍ଦୋଳନ ପରେ ବୁର୍ଖା ଉପରେ ଲଗାଯାଇଥିବା କଟକଣାକୁ ପ୍ରତ୍ୟହାର କରିଛନ୍ତି କଲେଜ କର୍ତ୍ତୃପକ୍ଷ । ଶୁକ୍ରବାର କଲେଜ କର୍ତ୍ତୃପକ୍ଷଙ୍କ ପକ୍ଷରୁ ଏକ ଅଜବ ନିୟମ ପ୍ରଣୟନ କରାଯାଇଥିଲା । ଏହି ନିୟମ ଅନୁଯାୟୀ ଶନିବାର ବ୍ୟତିତ ଅନ୍ୟ କୌଣସି ଦିନ ଛାତ୍ରୀ ମାନେ ବୁର୍ଖା ପିନ୍ଧି ଶ୍ରେଣୀଗୃହରେ ପ୍ରବେଶ କରିପାରିବେ ନାହିଁ । ଏହି ନିୟମକୁ ଛାତ୍ରୀଙ୍କ ପକ୍ଷରୁ ବିରୋଧ କରାଯିବା ପରେ କଲେଜ କର୍ତ୍ତୃପକ୍ଷଙ୍କ ପକ୍ଷରୁ ଏହି ନିୟମ ହଟାଯାଇଛି । ଜବରଦସ୍ତି ଭାବରେ ଛାତ୍ରୀଙ୍କ ଉପରେ ଲଦି ଦିଆଯାଉଥିବା ଅଭିଯୋଗ କରି ବିରୋଧ ପ୍ରଦର୍ଶନ କରାଯାଇଥିଲା ।

ତୃତୀୟ ରାଜ୍ୟ ଭାବରେ ସିଏଏ ବିରୋଧୀ ବିଲ୍‌କୁ ମଞ୍ଜୁରୀ ଦେଲା ରାଜସ୍ଥାନ

ସିଏଏକୁ ନେଇ ସମଗ୍ର ଦେଶରେ ବିରୋଧ ପ୍ରଦର୍ଶନ କରାଯାଇଥିବା ବେଳେ ତୃତୀୟ ରାଜ୍ୟ ଭାବରେ ଏହା ବିରୋଧରେ ବିଲ୍‌ ପାଶ୍‌ କରାଇଛି ରାଜସ୍ଥାନ । କେରଳ ଏବଂ ପଞ୍ଜାବ ପରେ ତୃତୀୟ ରାଜ୍ୟ ଭାବରେ ଏହି ବିଲ୍‌କୁ ମଞ୍ଜୁରୀ ପ୍ରଦାନ କରିଛି । କଂଗ୍ରେସ ଶାସିତ ରାଜ୍ୟ ରାଜସ୍ଥାନରେ ସିଏଏ ବିରୋଧୀ ବିଲ୍‌କୁ ମଞ୍ଜୁରୀ ପ୍ରଦାନ କରାଯାଇଥିବାରୁ ବିଜେପି କର୍ମୀଙ୍କ ପକ୍ଷରୁ ରାଜ୍ୟରେ ଏହାର ବିରୋଧାଭାସ ପ୍ରଦର୍ଶନ କରାଯାଇଛି । ଶନିବାର ବିଧାନସଭାରେ ଏହି ବିଲ୍‌କୁ ମଞ୍ଜୁରୀ ପ୍ରଦାନ କରାଯାଇଛି ।

ବିଜେପିର ଜାତି ଓ ଧର୍ମର ରାଜନୀତି ଦିଲ୍ଲୀରେ ବିଫଳ ହେବ : କେଜ୍ରିଓ୍ବାଲ

ଦିଲ୍ଲୀରେ ବିଜେପିର ଜାତି ଓ ଧର୍ମର ରାଜନୀତି ବିଫଳ ହେବ ବୋଲି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ମତ ଦେଇଛନ୍ତି । ବିଜେପି ପକ୍ଷରୁ ସର୍ବଦା ଜାତିବାଦ ରାଜନୀତି କରାଯାଇଥାଏ ମାତ୍ର ଦିଲ୍ଲୀରେ ଜାତି ଓ ଧର୍ମ ଆଧାରରେ ଭୋଟ ହାସଲ ଅସମ୍ଭବ ବୋଲି କେଜ୍ରିଓ୍ବାଲ ମତ ଦେଇଛନ୍ତି । ମହାରାଷ୍ଟ୍ରରେ ମରାଠା-ଅଣ ମରାଠା ରାଜନୀତି କରି ବିଜେପି ଭୋଟ ହାସଲ ସମ୍ଭବ ମାତ୍ର ଦିଲ୍ଲୀରେ ଜାଟ-ଅଣଜାଟ ରାଜନୀତିରେ ଭୋଟ ହାସଲ ଅସମ୍ଭବ । ଆପ୍‌ ସରକାର ବିକାଶ ଆଧାରରେ ନିର୍ବାଚନ ଲଢୁଥିବା କାରଣରୁ ନିଶ୍ଚିତ ଭାବରେ ସଫଳ ହେବ ବୋଲି ଜନକପୁରୀରେ ରୋଡ ଶୋ ସମୟରେ କେଜ୍ରିଓ୍ବାଲ ମତ ଦେଇଛନ୍ତି ।

ଜାତୀୟ ମତଦାତା ଦିବସ ପାଳନ ଅବସରରେ ସାଇକେଲ ଶୋଭାଯାତ୍ରା

ଜାତୀୟ ମତଦାତା ଦିବସ ପାଳନ ଅବସରରେ କେନ୍ଦ୍ରାପଡା ଜିଲ୍ଲା ପ୍ରଶାସନ ତରଫରୁ ଏକ ସଚେତନତା ଶୋଭାଯାତ୍ରା ଅନୁଷ୍ଠିତ ହୋଇଯାଇଛି । 10ମ ମତଦାତା ଦିବସ ଅବସରରେ ଶତାଧିକ ଛାତ୍ରଛାତ୍ରୀ ସାଇକେଲ ଶୋଭାଯାତ୍ରାରେ ବାହାରି ସହର ପରିକ୍ରମା କରିଥିଲେ । ଅତିରିକ୍ତ ଜିଲ୍ଲାପାଳ ବସନ୍ତ କୁମାର ରାଉତ ମୂଖ୍ୟ ଅତିଥି ଭାବେ ଯୋଗ ଦେଇଥିଲେ । ଅନ୍ୟମାନଙ୍କ ମଧ୍ୟରେ ସୂଚନା ଓ ପ୍ରସାରଣ ବିଭାଗର ଉପ ନିର୍ଦ୍ଦେଶକ ଚନ୍ଦ୍ରକାନ୍ତ ନାୟକ, ଜିଲ୍ଲା କ୍ରୀଡା ଅଧିକାରୀ ଲୋକନାଥ ପାଣିଗ୍ରାହୀ, ଜିଲ୍ଲା ସମାଜ ମଙ୍ଗଳ ଓ ଭିନ୍ନକ୍ଷମ ଅଧିକାରୀ ପ୍ରଭାସ ଦାସ , ଜିଲ୍ଲା ନିର୍ବାଚନ ଅଫିସର ସମ୍ବିତ ଶତପଥି ପ୍ରମୁଖ ଯୋଗ ଦେଇଥିଲେ ।

ନିର୍ଭୟା ଅଭିଯୁକ୍ତଙ୍କ ପିଟିସନ୍‌ ଖାରଜ : ଫେବୃୟାରୀ 1ରେ ଫାଶୀ

ନିର୍ଭୟା ଗଣଦୁଷ୍କର୍ମ ମାମଲାରେ ଓକିଲଙ୍କ ପକ୍ଷରୁ ଦାଖଲ କରାଯାଇଥିବା ଯାଚିକାକୁ ଖାରଜ କରି ଦେଇଛନ୍ତି ପଟିଆଲା ହାଉସ୍‌ କୋର୍ଟ । ରାଜକ୍ଷମା ଆବେଦନ ପାଇଁ ନିର୍ଭୟା ଅଭିଯୁକ୍ତଙ୍କ ଓକିଲ ଏ ପି ସିଂଙ୍କ ପକ୍ଷରୁ ତିନି ଅଭିଯୁକ୍ତଙ୍କ ସମସ୍ତ ତଥ୍ୟ (ସ୍ବାସ୍ଥ୍ୟ ପରୀକ୍ଷା, ବ୍ୟବହାର ସମ୍ପର୍କିତ ରିପୋର୍ଟ) ଦାବି କରିଥିଲେ । ତିହାର ଜେଲ୍‌ କର୍ତ୍ତୃପକ୍ଷଙ୍କ ନିକଟରୁ ଏହି ସମସ୍ତ ତଥ୍ୟ ହାସଲ କରିବା ପାଇଁ ଏପି ସିଂଙ୍କ ପକ୍ଷରୁ ପଟିଆଲା ହାଉସ କୋର୍ଟରେ ଆବେଦନ କରାଯାଇଥିଲା ।

4 ଆତଙ୍କୀ ଗିରଫ : ବିପୁଳ ବିସ୍ଫୋରକ ଏବଂ ଅସ୍ତ୍ରଶସ୍ତ୍ର ଜବତ

ଜମ୍ମୁ କାଶ୍ମୀରରେ ସୁରକ୍ଷା ବଳଙ୍କୁ ବଡ ସଫଳତା ମିଳିଛ । ଜମ୍ମୁ କାଶ୍ମୀରର ବନ୍ଦିପୋରାରେ ଶନିବାର 4 ଆତଙ୍କୀଙ୍କୁ ଗିରଫ କରାଯାଇଛି । 4 ଲସ୍କର ଏ ତୋଏବା ଆତଙ୍କବାଦୀଙ୍କୁ ଗିରଫ କରାଯିବା ସହିତ ବିପୁଳ ପରିମାଣର ବିସ୍ଫୋରକ ଏବଂ ଅସ୍ତ୍ରଶସ୍ତ୍ର ଜବତ କରାଯାଇଛି । ଉତ୍ତର କାଶ୍ମୀରର ବନ୍ଦିପୋରାରେ ଚାରି ଆତଙ୍କବାଦଙ୍କୁ ଗିରଫ କରାଯାଇଥିବା ବେଳେ 2ଟି ପିସ୍ତଲ, 2ଟି ଗ୍ରେନେଡ୍‌ ଲଞ୍ଚର, 6ଟି ଗ୍ରେନେଡ୍, 10ଟି ଏକେ 47 ମାଗ୍‌ଜିନ୍‌ ଏବଂ 512 ରାଉଣ୍ଡ ଏକେ -47 ଗୁଳି ଜବତ କରାଯାଇଛି । ଆତଙ୍କୀଙ୍କ ସମ୍ପର୍କକୁ ନେଇ ତଦନ୍ତ ଜାରି ରହିଛି ।

ବିମାନବନ୍ଦର ଦୁର୍ଘଟଣା ମାମଲାରେ ବିଜେଡିର ସମବେଦନା

ଭୁବନେଶ୍ବର ବିଜୁ ପଟ୍ଟନାୟକ ବିମାନବନ୍ଦର ଦୁର୍ଘଟଣା ନେଇ ବିଜେଡି ପକ୍ଷରୁ ସମବେଦନା ପ୍ରକାଶ ପାଇଛି । ବିଜେଡି ମୁଖପାତ୍ର ସସ୍ମିତ ପାତ୍ର ମୃତକଙ୍କ ପରିବାରକୁ କ୍ଷତିପୂରଣ ଦାବି କରିଛନ୍ତି । ବିଜେପି ଏହି ଘଟଣା ପାଇଁ ସରକାରଙ୍କୁ ଦାୟୀ କରୁଥିବାରୁ ସରକାରଙ୍କ ପକ୍ଷରୁ ବିଜେପିକୁ ସମାଲୋଚନା କରାଯାଇଛି । ଏଭଳି ଦୁଃଖଦ ଘଟଣାକୁ ନେଇ ବିଜେପି ଭଳି ବିଜେଡି ରାଜନୀତି କରେ ନାହିଁ ବୋଲି ସସ୍ମିତ କହିଛନ୍ତି । ମୃତକଙ୍କ ପରିବାରକୁ କ୍ଷତିପୂରଣ ଓ ଆହତଙ୍କୁ ମାଗଣା ଚିକିତ୍ସା ଦାବି କରିଛି ବିଜେଡି ।

ଚୀନ୍‌ରେ କୋରୋନା ଭାଇରସ୍‌ ଆକ୍ରାନ୍ତଙ୍କ ସଂଖ୍ୟା 1287କୁ ବୃଦ୍ଧି

ଚୀନ୍‌ରେ କୋରୋନା ଭାଇରସ୍‌ର ପ୍ରଭାବ ଦିନକୁ ଦିନ ବଢିବାରେ ଲାଗିଛି । ଚୀନ୍‌ରେ ଦେଖାଦେଇଥିବା ନୋଭେଲ୍‌ କୋରୋନା ଭାଇରସ୍‌ ପ୍ରଭାବରେ ବର୍ତ୍ତମାନ ସୁଦ୍ଧା 41 ଜଣଙ୍କର ମୃତ୍ୟୁ ହୋଇଥିବା ବେଳେ 1287 ଜଣ ସଙ୍କ୍ରମିତ ହୋଇଛନ୍ତି । ଶନିବାର ଚୀନ୍‌ର ଜାତୀୟ ସ୍ବାସ୍ଥ୍ୟ କମିଶନ ପକ୍ଷରୁ ଏହି ତଥ୍ୟ ପ୍ରକାଶ ପାଇଛି । ଶୁକ୍ରବାର 444 ଜଣ ନୂତନ ସଂକ୍ରମିତ ବ୍ୟକ୍ତି ଭର୍ତ୍ତି ହୋଇଥିବା ଜଣାପଡିଛି । ସଂକ୍ରମିତ ବ୍ୟକ୍ତିଙ୍କ ମଧ୍ୟରୁ 237 ଜଣଙ୍କ ଅବସ୍ଥା ଗୁରୁତର ହୋଇଥିବା ବେଳେ 38 ଜଣ ସୁସ୍ଥ ହୋଇ ଡିସଚାର୍ଜ ହୋଇଛନ୍ତି ।

ହିନ୍ଦୁତ୍ବ ପ୍ରସଙ୍ଗକୁ ଫେରିଲା ଶିବସେନାର : ମୁସ୍‌ଲିମ୍‌ ଅନୁପ୍ରବେଶକାରୀଙ୍କ ପ୍ରତ୍ୟର୍ପଣକୁ ସମର୍ଥନ

ପୁଣି ହିନ୍ଦୁତ୍ବକୁ ପ୍ରସଙ୍ଗ କଲା ଶିବସେନା । ଗୋଟିଏ ପଟରେ ଦଳ ପକ୍ଷରୁ ସିଏଏ ଏବଂ ଏନ୍‌ଆରସିକୁ ନେଇ ବିରୋଧାଭାସ ଦେଖାଉଥିବା ବେଳେ ଅନ୍ୟ ପକ୍ଷରେ ବାଂଲାଦେଶୀ ଏବଂ ପାକିସ୍ତାନୀ ମୁସଲିମ ଅନୁପ୍ରବେଶକାରୀଙ୍କୁ ଦେଶରୁ ବିତାଡିତ କରିବା ପାଇଁ ଦଳର ମୁଖପତ୍ର ସାମ୍‌ନାରେ ଉଲ୍ଲେଖ କରାଯାଇଛି । ରାଜ୍‌ ଠାକ୍‌ରେଙ୍କ ଦଳ ମହାରାଷ୍ଟ୍ର ନବନିର୍ମାଣ ସେନା ପକ୍ଷରୁ ହିନ୍ଦୁତ୍ବକୁ ପ୍ରସଙ୍ଗ କରାଯାଉଥିବାରୁ ଶିବସେନା ପୁନର୍ବାର ହିନ୍ଦୁତ୍ବକୁ ପ୍ରସଙ୍ଗ କରିଛି । ଏହା ସହିତ ସାମ୍‌ନାରେ ଏମ୍‌ଏନ୍‌ଏସ୍‌ ମୁଖ୍ୟ ରାଜ୍‌ ଠାକ୍‌ରେଙ୍କୁ ମଧ୍ୟ ସାମ୍‌ନାରେ ସମାଲୋଚନା କରାଯାଇଛି ।

ସାଧାରଣତନ୍ତ୍ର ଦିବସ ପୂର୍ବରୁ ଜମ୍ମୁ କାଶ୍ମୀରରେ ଏନ୍‌କାଉଣ୍ଟର

ସାଧାରଣତନ୍ତ୍ର ଦିବସ ପୂର୍ବରୁ ଜମ୍ମୁ କାଶ୍ମୀରର ପୁଲଓ୍ବାମାରେ ସେନା ଏବଂ ଆତଙ୍କୀଙ୍କ ମଧ୍ୟରେ ଏନକାଉଣ୍ଟର ଜାରି ରହିଛି । ପୁଲଓ୍ବାମାର ତ୍ରାଲ ଅଞ୍ଚଳରେ ଏହି ଏନ୍‌କାଉଣ୍ଟର ଜାରି ରହିଛି । ସେନା ପକ୍ଷରୁ ଆତଙ୍କୀଙ୍କୁ ଘେରି ରଖାଯାଇଛି । ଉଭୟ ପକ୍ଷଙ୍କ ତରଫରୁ ଗୁଳିଚାଳନା ଜାରି ରହିଛି । : ସାଧାରଣତନ୍ତ୍ର ଦିବସ ପାଇଁ ସୁରକ୍ଷା ଘେରା କରାଯାଇଥିବାରୁ ଏହି ଆତଙ୍କୀ ମାନେ ଫସିଥିବା ଜଣାପଡିଛି । ଏନକାଉଣ୍ଟରର ନିକଟବର୍ତ୍ତୀ ଅଞ୍ଚଳକୁ ଚାରିପଟୁ ଘେରାବନ୍ଦୀ କରାଯାଇ ଗୁଳିଚାଳନା ଜାରି ରହିଛି ।

ତୁର୍କୀରେ 6.8 ତୀବ୍ରତାର ଭୂମିକମ୍ପ : 18 ମୃତ

ତୁର୍କୀରେ ଏକ ଭୟାବହ ଭୂକମ୍ପ ପ୍ରଭାବରେ 18 ଜଣଙ୍କର ପ୍ରାଣହାନି ଘଟିଛି । ଶୁକ୍ରବାର ରାତିରେ ତୁର୍କୀରେ ହୋଇଥିବା ଏହି ଭୂମିକମ୍ପରେ 18 ଜଣଙ୍କର ପ୍ରାଣ ହାନି ଘଟିଥିବା ବେଳେ 30ରୁ ଅଧିକ ଲୋକ ନିଖୋଜ ଅଛନ୍ତି । ତୁର୍କୀର ପୂର୍ବ ଭାବରେ ରହିଥିବା ସହର ଏଲାଜିଗ୍‌ର ସିଭ୍ରାଇସ୍‌ ଅଞ୍ଚଳରେ ହୋଇଥିବା ଏହି ଭୂକମ୍ପର ତୀବ୍ରତା ରିକ୍ଟର ସ୍କେଲରେ 6.8 ରହିଥିଲା । ଏଲାଜିଗ୍‌ର ସିଭ୍ରାଇସ୍‌ ଭୂକମ୍ପର କେନ୍ଦ୍ରସ୍ଥଳ ହୋଇଥିବା ବେଳେ ପ୍ରାୟ 70 କିମି ପର୍ଯ୍ୟନ୍ତ ଏହାର ପ୍ରଭାବ ଅନୁଭୂତ ହୋଇଥିଲା । ଶୁକ୍ରବାର ସ୍ଥାନୀୟ ସମୟ ରାତି ପ୍ରାୟ 8.55 ମିନିଟରେ ଏହି ଭୂକମ୍ପ ଅନୁଷ୍ଠିତ ହୋଇଥିଲା ।

ମୋଦିଙ୍କ ହିନ୍ଦୁତ୍ବବାଦୀ ଚିନ୍ତାଧାରାକୁ ଆମେରିକୀୟ ଶିଳ୍ପପତିଙ୍କ ସମାଲୋଚନା

ସ୍ବିଜରଲ୍ୟାଣ୍ଡର ଡାଭୋସ୍‌ରେ ଅନୁଷ୍ଠିତ ବିଶ୍ବ ଅର୍ଥନୈତିକ ସମ୍ମିଳନୀରେ ଆମେରିକୀୟ ଶିଳ୍ପପତି ଜର୍ଜ ସୋରୋସ୍‌ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମାଲୋଚନା କରିଛନ୍ତି । ମୋଦିଙ୍କ ଉଗ୍ର ହିନ୍ଦୁତ୍ବବାଦୀ ଚିନ୍ତାଧାରାକୁ ସୋରୋସ୍‌ ସମାଲୋଚନା କରିଛନ୍ତି । ସେହିପରି ସମଗ୍ର ବିଶ୍ବରେ ଦକ୍ଷିଣପନ୍ଥୀ ରାଜନୈତିକ ଦଳ ମାନଙ୍କର ବର୍ଦ୍ଧିତ ପ୍ରଭାବ ନେଇ ମଧ୍ୟ ସୋରୋସ୍‌ ଚିନ୍ତା ବ୍ୟକ୍ତ କରିଥିଲେ । ସେହିପରି ବିଭିନ୍ନ ରାଜନୈତିକ ଦଳ ମାନଙ୍କ ପକ୍ଷରୁ ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମର ଅପବ୍ୟବହାର ନେଇ ସୋରୋସ୍‌ ମତ ରଖିଥିଲେ । ଭାରତରେ ରାଜନୈତିକ ଫାଇଦା ପାଇଁ ଫେସ୍‌ବୁକ୍‌ର ବ୍ୟବହାର କରାଯାଉଛି ବୋଲି ସୋରସ୍‌ କହିଥିଲେ ।

ଜର୍ମାନୀରେ ଗୁଳିମାଡ : 6 ମୃତ, ଏକାଧିକ ଆହତ

ଜର୍ମାନୀରେ ଏକ ଗୁଳିମାଡ ଘଟଣାରେ 6 ଜଣଙ୍କର ମୃତ୍ୟୁ ଘଟିଥିବା ବେଳେ ଏକାଧିକ ଆହତ ହୋଇଛନ୍ତି । ଦକ୍ଷଣ ପଶ୍ଚିମ ଜର୍ମାନୀର ଆଲାଏନ୍‌ ସହରରେ ଏହି ମର୍ମନ୍ତୁଦ ଘଟଣା ଘଟିଛି । ଶୁକ୍ରବାର ଅପରାହ୍ନରେ ଆଲାଏନ୍‌ରେ କିଛି ମୁଖାପିନ୍ଧା ଆତତାୟୀ ଗୁଳିମାଡ କରିବାରୁ ଏହି ମୃତ୍ୟୁ ଘଟିଥିବା ଜଣାପଡିଛି । ଘଟଣା ପରେ ଆଲାଏନ୍‌ ପୋଲି ଜଣେ ସନ୍ଦିଗ୍ଧ ଅପରାଧୀଙ୍କୁ ଗିରଫ କରିଥିବା ବେଳେ ଅନ୍ୟ ଅପରାଧୀଙ୍କ ସନ୍ଧାନ ଜାରି ରହିଛି । ଘଟଣାରେ ମୃତ୍ୟୁ ସଂଖ୍ୟା ସରକାରୀ ଭାବରେ ପ୍ରକାଶ ପାଇନଥିବା ବେଳେ ଆହତ ମାନଙ୍କ ଡାକ୍ତରଖାନାରେ ଭର୍ତ୍ତି କରାଯାଇଛି ।

ବିଭାଗୀୟ ସ୍ଥାୟୀ କମିଟି-7ଙ୍କ ଏକାଦଶ ବୈଠକ

ବିଧାୟକ ପ୍ରଦୀପ କୁମାର ଅମାତଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି ବିଭାଗୀୟ ସ୍ଥାୟୀ କମିଟି-7ଙ୍କ ଏକାଦଶ ବୈଠକ । ବିଧାନସଭାର 55 ନମ୍ବର ପ୍ରକୋଷ୍ଠରେ ଏହି ବୈଠକ ଅନୁଷ୍ଠିତ ହୋଇଛି । ପ୍ରାଥମିକ ଆଲୋଚନା ପରେ ଯୋଜନା ଓ ସଂଯୋଜନ ବିଭାଗ ସମ୍ପର୍କରେ ପୁଙ୍ଖାନୁପୁଙ୍ଖ ଆଲୋଚନା ହୋଇଥିଲା । ଏହି ବୈଠକରେ ଯୋଜନା ଓ ସଂଯୋଜନ ବିଭାଗର ବରିଷ୍ଠ ପଦାଧିକାରୀଙ୍କ ସହିତ ବିଧାନସଭା ସଚିବ ଦାଶରଥୀ ଶତପଥୀ ଉପସ୍ଥିତ ଥିଲେ ।

ବାଂଲା-ପାକ୍‌ ଟି20 ମୁକାବିଲା : 1-0ରେ ଆଗୁଆ ପାକିସ୍ତାନ

ପାକିସ୍ତାନ ଏବଂ ବାଂଲାଦେଶ ମଧ୍ୟରେ ଅନୁଷ୍ଠିତ ପ୍ରଥମ ଟି20 ମୁକାବିଲାରେ ପାକିସ୍ତାନ ବିଜୟୀ ହୋଇଛି । ପ୍ରଥମ ମୁକାବିଲାରେ ବିଜୟୀ ହେବା ସହିତ ତିନିଟିକିଆ ସିରିଜ୍‌ରେ 1-0ର ଅଗ୍ରଣୀ ହାସଲ କରିଛି । ପ୍ରଥମେ ବ୍ୟାଟିଂ କରି ବାଂଲାଦେଶ 141 ରନ୍‌ ସଂଗ୍ରହ କରିଥିବା ବେଳେ ତିନୋଟି ବଲ୍‌ ପୂର୍ବରୁ ପାକିସ୍ତାନ 5 ଓ୍ବିକେଟ୍‌ ହରାଇ ବିଜୟ ହାସଲ କରିଥିଲା । ପାକିସ୍ତାନ ପକ୍ଷରୁ ସୋଏବ୍‌ ମଲିକ୍‌ ଅପରାଜିତ 58 ରନ୍‌ ସଂଗ୍ରହ କରିଥିବା ବେଳେ ମ୍ୟାନ୍‌ ଅଫ ଦ ମ୍ୟାଚ୍‌ ବିବେଚିତ ହୋଇଛନ୍ତି । ମଲିକ୍‌ଙ୍କୁ ମ୍ୟାଚ୍‌ର ଶ୍ରେଷ୍ଠ ଖେଳାଳି ଘୋଷଣା କରାଯାଇଥିଲା ।

ସିଏଏକୁ ନେଇ ରାଷ୍ଟ୍ରପତିଙ୍କୁ ଚିଠି ଲେଖିଲେ 154 ପୂର୍ବତନ ସେନା ଓ ନୌସେନା ଅଧିକାରୀ

ଭାରତରେ ନାଗରିକତ୍ବ ସଂଶୋଧନ ଆଇନକୁ ନେଇ ଦେଶରେ ସୃଷ୍ଟି ହୋଇଥିବା ଆନ୍ଦୋଳନକୁ ନେଇ 154 ଜଣ ବ୍ୟକ୍ତି ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଚିଠି ଲେଖିଛନ୍ତି । ଚିଠି ଲେଖିଥିବା ବ୍ୟକ୍ତିଙ୍କ ମଧ୍ୟରେ ପୂର୍ବତନ ସେନା ଓ ନୌସେନା ଅଧିକାରୀଙ୍କ ସମେତ ପୂର୍ବତନ ବିଚାରପତି ମଧ୍ୟ ସାମିଲ ଅଛନ୍ତି । ପୂର୍ବତନ ବିଚାରପତି ନ୍ୟାୟିକ ପ୍ରାଧିକରଣ ଚେୟାରମ୍ୟାନ୍‌ ପ୍ରମୋଦ କୋହଲି ରାଷ୍ଟ୍ରପତିଙ୍କୁ ଭେଟି ଏହି ଚିଠି ପ୍ରଦାନ କରିଛନ୍ତି । ଏହା ସହିତ ବିକ୍ଷୋଭ ନାମରେ ସର୍ବସାଧାରଣ ସମ୍ପତ୍ତି ନଷ୍ଟ କରୁଥିବା ବ୍ୟକ୍ତିବିଶେଷଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଦାବି କରାଯାଇଛି ।

ଭାରତୀୟ ଅର୍ଥନୈତିକ ମାନ୍ଦାବସ୍ଥା ସାମୟିକ : ଆଇଏମ୍‌ଏଫ୍‌

ଭାରତରେ ଦେଖାଦେଇଥିବା ଅର୍ଥନୈତିକ ମାନ୍ଦାବସ୍ଥାକୁ ନେଇ ପ୍ରତିକ୍ରିୟା ରଖିଛନ୍ତି ଆଇଏମ୍‌ଏଫ୍‌ ମୁଖ୍ୟ କ୍ରିଷ୍ଟାଲିନା ଜର୍ଜିଭିଆ । ଡାଭୋସ୍‌ରେ ଅନୁଷ୍ଠିତ ଅର୍ଥନୈତିକ ସମ୍ମିଳନୀରେ କ୍ରିଷ୍ଟାଲିନା କହିଛନ୍ତି, ଭାରତୀୟ ଅର୍ଥନୀତିରେ ଦେଖାଦେଇଥିବା ସଙ୍କଟ ସାମୟିକ । ଖୁବ୍‌ ଶୀଘ୍ର ଏହି ପରସ୍ଥିତିରେ ପରିବର୍ତ୍ତନ ହେବାକୁ ଯାଉଛି । ବର୍ତ୍ତମାନ ସମଗ୍ର ବିଶ୍ବରେ ଅର୍ଥନୈତିକ ସଙ୍କଟ ଦେଖାଦେଇଛି, ମାତ୍ର ଭାରତ ସରକାରଙ୍କ ପକ୍ଷରୁ ନିଆଯାଇଥିବା ପ୍ରତିଷେଧକ ମୂଳକ ପଦକ୍ଷେପ କାରଣରୁ ଖୁବ୍‌ ଶୀଘ୍ର ଭାରତୀୟ ଅର୍ଥନୀତିରେ ଦେଖାଦେଇଥିବା ଶୀଥିଳତା ଦୂର ହେବ ବୋଲି କ୍ରିଷ୍ଟାଲିନା ପ୍ରକାଶ କରିଛନ୍ତି ।

ଆଇସିସି ଟେଷ୍ଟ ରାଙ୍କିଙ୍ଗ : ଏକ ନମ୍ବର ସ୍ଥାନ ବଜାୟ ରଖିଲେ କୋହଲି

ଆଇସିସି ପକ୍ଷରୁ ନୂତନ ଟେଷ୍ଟ ରାଙ୍କିଙ୍ଗ ଶୁକ୍ରବାର ପ୍ରକାଶ ପାଇଛି । ସଦ୍ୟ ପ୍ରକାଶିତ ରାଙ୍କିଙ୍ଗରେ ଭାରତୀୟ ଅଧିନାୟକ ବିରାଟ କୋହଲି ଏକ ନମ୍ବର ସ୍ଥାନ ବଜାୟ ରଖିଛନ୍ତି । ପୂର୍ବତନ ଅଷ୍ଟ୍ରେଲିଆ ଅଧିନାୟକ ଷ୍ଟିଭ୍‌ ସ୍ମିଥ୍‌ ଦ୍ବିତୀୟ ସ୍ଥାନରେ ରହିଥିବା ବେଳେ ମାର୍ନସ ଲାବୁଶ୍ଚାଞ୍ଜେ ତୃତୀୟ ସ୍ଥାନରେ ରହିଛନ୍ତି । ନିକଟରେ ଦକ୍ଷିଣ ଆଫ୍ରିକା ବିପକ୍ଷରେ ଉନ୍ନତ ପ୍ରଦର୍ଶନ କରିଥିବା ବେନ୍‌ ଷ୍ଟୋକ୍‌ସ ଅଲରାଉଣ୍ଡରଙ୍କ ତାଲିକାରେ ତୃତୀୟ ସ୍ଥାନକୁ ଉନ୍ନୀତ ହୋଇଛି । କୋହଲିଙ୍କ ବ୍ୟତିତ ଚେତେଶ୍ବର ପୂଜାରା ଏବଂ ଆଜିଙ୍କ୍ୟ ରାହାଣେ ଟପ୍‌ଟେନ୍‌ରେ ରହିଛନ୍ତି ।

ଗର୍ଭବତୀ ମହିଳାଙ୍କ ଆମେରିକା ପ୍ରବେଶ ଉପରେ ରୋକ୍‌!

ଆମେରିକା ସରକାରଙ୍କ ପକ୍ଷରୁ ଏକ ନୂତନ ନିୟମ ଲାଗୁ କରାଯାଇଛି । ଏହି ନିୟମ ଅନୁଯାୟୀ ଏଣିକି ଅଣ ଆମେରିକୀୟ ଗର୍ଭବତୀ ମହିଳା ମାନେ ଆମେରିକାରେ ପ୍ରବେଶ କରିପାରିବେ ନାହିଁ । ଆମେରିକା ମାଟିରେ ଜନ୍ମିତ ଶିଶୁଙ୍କୁ ଆମେରିକାର ନାଗରିକତ୍ବ ପ୍ରଦାନ କରାଯାଇଥାଏ । ଏହି କାରଣରୁ ଏକାଧିକ ରାଷ୍ଟ୍ରର ମହିଳା ମାନେ ଗର୍ଭଧାରଣ ସମୟରେ ଆମେରିକା ଯାଇ ପ୍ରସବ କରାଉଛନ୍ତି । ଗୁରୁବାର ଆମେରିକା ବୈଦେଶିକ ମନ୍ତ୍ରାଳୟ ପକ୍ଷରୁ ଏହି ନିର୍ଦ୍ଦେଶନାମା ଜାରି କରାଯାଇଛି ।

ସୁରକ୍ଷିତ ଯୌନ ସମ୍ପର୍କ ଦାବି ପଡିଲା ମହଙ୍ଗା : ମହିଳାଙ୍କୁ ଗଳାକାଟି ହତ୍ୟା

ସୁରକ୍ଷିତ ଯୌନ ସମ୍ପର୍କ ଦାବି କରିବାରୁ ବେଙ୍ଗାଲୁରୁରେ ଜଣେ ମହିଳାଙ୍କୁ ହତ୍ୟା କରାଯାଇଛି । ମହିଳାଙ୍କୁ ହତ୍ୟା ଅଭିଯୋଗରେ ପୋଲିସ୍‌ 48 ବର୍ଷୀୟ ମୁକୁନ୍ଦ ଏଚ୍‌ ଏଚ୍‌ଙ୍କୁ ଗିରଫ କରାଯାଇଛି । ମହିଳାଙ୍କୁ ହତ୍ୟା କରିଥିବା ନେଇ ପଚରା ଉଚୁରା ସମୟରେ ମୁକୁନ୍ଦ ସ୍ବୀକାର କରିଛନ୍ତି । ଉଲ୍ଲେଖଯୋଗ୍ୟ ଯେ, ମହିଳା ଜଣକ ବେଶ୍ୟାବୃତ୍ତି କରନ୍ତି । ମହିଳା ଜଣକ ନିରୋଧ (କଣ୍ଡୋମ) ପିନ୍ଧିବା ପାଇଁ ଦାବି କରିଥିବା ବେଳେ ମୁକୁନ୍ଦ ଗଳାକାଟି ମହିଳାଙ୍କୁ ହତ୍ୟା କରିଥିଲେ । ପୋଲିସ୍‌ ମହିଳାଙ୍କ ଫୋନ୍‌ ମାଜେଷ୍ଟିକ୍‌ ବସଷ୍ଟାଣ୍ଡର ସିସିଟିଭି ଫୁଟେଜ୍‌ରୁ ଅଭିଯୁକ୍ତଙ୍କୁ ଗିରଫ କରିଥିଲା ।

ଜେଏନ୍‌ୟୁ ଛାତ୍ରଙ୍କୁ ଆଶ୍ବସ୍ତି : ପୁରୁଣା ମାନୁଆଲ ଅନୁଯାୟୀ ପଞ୍ଜୀକରଣ

ଜେଏନ୍‌ୟୁ ଛାତ୍ରଙ୍କୁ ବର୍ଦ୍ଧିତ ଫି ମାମଲାରେ ଆଶ୍ବସ୍ତି ମିଳିଛି । ଶୁକ୍ରବାର ଦିଲ୍ଲୀ ହାଇକୋର୍ଟଙ୍କ ପକ୍ଷରୁ ପ୍ରକାଶିତ ରାୟ ଅନୁଯାୟୀ ଛାତ୍ରଛାତ୍ରୀ ମାନେ ପୁରୁଣା ମାନୁଆଲ ଅନୁଯାୟୀ ପଞ୍ଜୀକରଣ କରିପାରିବେ । ଉଲ୍ଳେଖଯୋଗ୍ୟ ଯେ, ଯେଉଁ ଛାତ୍ର ମାନେ ପଞ୍ଜୀକରଣ କରିନାହାନ୍ତି, ଆସନ୍ତା ଏକ ସପ୍ତାହ ମଧ୍ୟରେ ବିନା କୌଣସି ବର୍ଦ୍ଧିତ ଦେୟରେ ନିଜର ପଞ୍ଜୀକରଣ କରିପାରିବେ । ଜଷ୍ଟିସ୍‌ ରାଜୀବ ସକ୍‌ଦାର ଏହି ମାମଲାର ବିଚାର କରିଥିଲେ । ଫେବୃୟାରୀ 28 ତାରିଖରେ ମାମଲାର ପରବର୍ତ୍ତୀ ଶୁଣାଣି ପାଇଁ କୋର୍ଟ ତାରିଖ ଧାର୍ଯ୍ୟ କରିଛନ୍ତି ।

ସଦର୍ଣ୍ଣ ଆର୍ମି କମାଣ୍ଡର ହେବେ ଲେପ୍ଟନାଣ୍ଟ ଜେନେରାଲ ସିପି ମହାନ୍ତି

ଭାରତୀୟ ସେନାରେ ଓଡ଼ିଆ ଅଫିସରଙ୍କୁ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇଛି । ଲେପ୍ଟନାଣ୍ଟ ଜେନେରାଲ ସିପି ମହାନ୍ତିଙ୍କୁ ଦକ୍ଷିଣାଞ୍ଚଳ କମାଣ୍ଡର ଭାବେ ନିଯୁକ୍ତ କରାଯାଇଛି। ସେ ଲେପ୍ଟନାଣ୍ଟ ଜେନେରାଲ ଏସ.କେ.ସାଇନିଙ୍କ ସ୍ଥାନ ନେବେ । ଲେପ୍ଟନାଣ୍ଟ ଜେନେରାଲ ସାଇନି ଆସନ୍ତା ୨୫ ତାରିଖରେ ଭାରତୀୟ ସେନାରେ ନୂଆ ଉପମୁଖ୍ୟ ଭାବେ ଦାୟିତ୍ୱ ଗ୍ରହଣ କରିବେ । ପାକିସ୍ତାନ ଓ ଚୀନ ସୀମାରେ ଅପରେସନ୍ ସହିତ ଆସାମ୍‌ରେ ଅନୁପ୍ରବେଶ ବିରୋଧୀ ମୁକାବିଲାରେ ଲେଫ୍ଟନାଣ୍ଟ ଜେନେରାଲ୍ ସି.ପି. ମହାନ୍ତିଙ୍କ ଅଭିଜ୍ଞତା ରହିଛି ।

ସିଏଏ ସମ୍ପର୍କରେ 10 ଧାଡି କହିବା ପାଇଁ ରାହୁଲଙ୍କୁ ନାଡ୍ଡାଙ୍କ ଚ୍ୟାଲେଞ୍ଜ

ନବ ନିର୍ବାଚିତ ବିଜେପି ସଭାପତି ଜେପି ନଡ୍ଡା ପୂର୍ବତନ କଂଗ୍ରେସ ସଭାପତି ରାହୁଲ ଗାନ୍ଧୀଙ୍କୁ ଚ୍ୟାଲେଞ୍ଜ କରିଛନ୍ତି । ଗୁରୁବାର ଆଗ୍ରାରେ ଅନୁଷ୍ଠିତ ଏକ କାର୍ଯ୍ୟକ୍ରମରେ ରାହୁଲ ନାଗରିକତ୍ବ ସଂଶୋଧନ ଆଇନ ସମ୍ପର୍କରେ 10 ଧାଡି କହିବା ପାଇଁ ଆହ୍ବାନ ଦେଇଛନ୍ତି । ଯଦି ରାହୁଲ ସିଏଏ ସମ୍ବନ୍ଧରେ 10 ଧାଡି କହିବାରେ ସକ୍ଷମ ହୁଅନ୍ତି ତେବେ ବିଜେପି ପକ୍ଷରୁ ତାଙ୍କୁ ସମର୍ଥନ କରାଯିବ ବୋଲି ନାଡ୍ଡା କହିଛନ୍ତି । କଂଗ୍ରେସ ନେତୃତ୍ବ ବର୍ତ୍ତମାନ ମାନସିକ ଦେବାଳିଆପଣର ଶିକାର ହୋଇଛି ବୋଲି ନଡ୍ଡା ପ୍ରକାଶ କରିଛନ୍ତି ।

ସମସ୍ତ ଭାରତୀୟ ହିନ୍ଦୁ ମନ୍ତବ୍ୟ ନେଇ ଆରଏସଏସ୍‌କୁ ଦିଗ୍‌ବିଜୟଙ୍କ ସମାଲୋଚନା

ପୂର୍ବତନ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଦିଗ୍‌ବିଜୟ ସିଂ ଆରଏସ୍ଏସ୍‌କୁ ସମାଲୋଚନା କରିଛନ୍ତି । ସମସ୍ତ ଭାରତୀୟ ହିନ୍ଦୁ ବୋଲି ଆରଏସ୍‌ଏସ୍‌ ପକ୍ଷରୁ ଦିଆଯାଇଥିବା ମନ୍ତବ୍ୟକୁ କଂଗ୍ରେସ ନେତା ଦିଗ୍‌ବିଜୟ ସିଂଙ୍କ ପକ୍ଷରୁ ସମାଲୋଚନା କରାଯାଇଛି । ଏହି ମନ୍ତବ୍ୟକୁ ସିମାଲୋଚନା କରିବାକୁ ଯାଇ ଦିଗ୍‌ବିଜୟ କହିଛନ୍ତି, ସେ କୌଣସି ଧର୍ମ ଆଡକୁ ଢଳିକରି ନାହାନ୍ତି, ବରଂ ପ୍ରଥମେ ସେ ଜଣେ ଭାରତୀୟ । ଭାରତୀୟ ହେବା ପାଇଁ ହିନ୍ଦୁ ହେବା ଆଦୌ ଜରୁରୀ ନୁହେଁ । ଆରଏସ୍‌ଏସ୍‌ ପକ୍ଷରୁ ଏଭଳି ମନ୍ତବ୍ୟ ଦିଆଯାଇ ହିନ୍ଦୁ ତୁଷ୍ଟୀକରଣର ପ୍ରୟାସ କରାଯାଉଛି ବୋଲି ଦିଗ୍‌ବିଜୟ କହିଛନ୍ତି ।

2022ରେ ରିଲିଜ୍‌ ହେବ କ୍ୟାପ୍‌ଟେନ୍‌ ମାର୍ଭେଲ୍‌ର ସିକ୍ବେଲ୍‌

ହଲିଉଡର ଅନ୍ୟତମ ସୁପରହିଟ୍‌ ଏବଂ ହାଇଏଷ୍ଟ ଗ୍ରସିଙ୍ଗ ଫିଲ୍ମ କ୍ୟାପ୍‌ଟେନ୍‌ ମାର୍ଭେଲ୍‌ର ସିକ୍ବେଲ ରିଲିଜ୍‌ ନେଇ ଘୋଷଣା କରାଯାଇଛି । ଏହି ଫିଲ୍ମ ପାଇଁ ପ୍ରଥମ ଥର ଡିଜ୍‌ନୀ ଏବଂ ମାର୍ଭେଲ୍‌ ଏକାଠି କାମ କରିବାକୁ ଯାଉଛନ୍ତି । କ୍ୟାପ୍‌ଟେନ୍‌ ମାର୍ଭେଲ୍‌ 2022ରେ ରିଲିଜ୍‌ ନେଇ ଡିଜ୍‌ନୀ ପକ୍ଷରୁ ଘୋଷଣା କରାଯାଇଛି । ବ୍ରିଏ ଲାର୍ସନ୍‌ ମୁଖ୍ୟ ଭୂମିକାରେ ନଜର ଆସିବାକୁ ଯାଉଥିବା ବେଳେ ଓ୍ବାଣ୍ଡା ଭିଜନ୍‌ ସିରିଜ୍‌ର କାହାଣୀ ଲେଖକ ମେଗାନ୍‌ ମ୍ୟାକ୍‌ଡୋନେଲ୍‌ ଏହି ଭାଗର କାହାଣୀ ଲେଖିଛନ୍ତି ।

ଘଜନଭୀ କ୍ଷେପଣାସ୍ତ୍ର ପରୀକ୍ଷଣ କଲା ପାକିସ୍ତାନ

ପାକିସ୍ତାନ ପକ୍ଷରୁ ଭୂପୃଷ୍ଠରୁ ଭୂପୃଷ୍ଠକୁ ଲଞ୍ଚ କରାଯାଉଥିବା କ୍ଷେପଣାସ୍ତ୍ର ଘଜନଭୀର ଲଞ୍ଚ କରାଯାଇଛି । ଗୁରୁବାର ଆଇଏସ୍‌ପିଆର ପକ୍ଷରୁ ଏହି କ୍ଷେପଣାସ୍ତ୍ର ପରୀକ୍ଷଣ କରାଯାଇଛି । ଭୂପୃଷ୍ଠରୁ ଭୂପୃଷ୍ଠକୁ ଉତ୍‌କ୍ଷେପଣ କରାଯାଉଥିବା ଏହି କ୍ଷେପଣାସ୍ତ୍ରର ଲକ୍ଷ୍ୟ ଭେଦ ଦୂରତା 290 କିମି ରହିଛି । ଏହି କ୍ଷେପଣାସ୍ତ୍ର ପରୀକ୍ଷଣ ସଫଳ ହୋଇଥିବା ନେଇ ପାକିସ୍ତାନ ସେନାର ଲ୍ୟୁଟନାଣ୍ଟ ଜେନେରାଲ ନଦୀମ୍‌ ଜାକି ମଞ୍ଜ ସୂଚନା ଦେଇଛନ୍ତି । ଏହି କ୍ଷେପଣାସ୍ତ୍ର ପାକିସ୍ତାନ ସେନାରେ ସାମିଲ ହେଲେ ସେନାର ଶକ୍ତି ବୃଦ୍ଧି ହେବ ବୋଲି ମଞ୍ଜ ସୂଚନା ଦେଇଛନ୍ତି ।

ଶାହିନ୍‌ବାଗ୍‌ ପ୍ରତିବାଦକାରୀଙ୍କୁ ହଟାଇବା ପାଇଁ ସ୍ବାମୀଙ୍କ ନୂତନ ଆଇଡିଆ

ସିଏଏ ଏବଂ ଏନ୍‌ଆରସି ପ୍ରତିବାଦରେ ନୂଆଦିଲ୍ଲୀର ଶାହିନବାଗରେ ସଙ୍ଗଠିତ ଆନ୍ଦୋଳନକୁ ବନ୍ଦ କରିବା ପାଇଁ ଏକ ଆଇଡିଆ ଦେଇଛନ୍ତି ବିଜେପି ସାାଂସଦ ସୁବ୍ରମଣ୍ୟମ ସ୍ବାମୀ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏହି ଆଇଡିଆ ପ୍ରଣୟନ କରିବାକୁ ଅନୁରୋଧ କରିଛନ୍ତି । ଶାହିନବାଗ ପ୍ରତିବାଦକାରୀଙ୍କ କାରଣରୁ ସାଧାରଣ ଲୋକଙ୍କ ଜୀବନଯାତ୍ରା ବ୍ୟାହାତ ହେଉଛି । ରାତି ଅଧିଆ ପ୍ରଦର୍ଶନକାରୀଙ୍କୁ ଏକ ଖୋଲାସ୍ଥାନକୁ ନେଇ ଛାଡି ଦିଆଯାଉ ଏବଂ ସେମାନଙ୍କ ପାଇଁ ଅସ୍ଥାୟୀ ଟେଣ୍ଟ ମଧ୍ୟ ନିର୍ମାଣ କରାଯାଉ ବୋଲି ସ୍ବାମୀ କହିଛନ୍ତି ।

ସିଏଏ ଏବଂ ଏନ୍‌ଆରସିକୁ ବିରୋଧ କଲେ ନନ୍ଦିତା ଦାସ

ସିଏଏ ଏବଂ ଏନ୍‌ଆର୍‌ସିକୁ ବିରୋଧ କରିଛନ୍ତି ନନ୍ଦିତା ଦାସ । ଗୁରୁବାର ଅନୁଷ୍ଠିତ ଜୟପୁର ସାହିତ୍ୟ ଉତ୍ସବରେ ଯୋଗ ଦେବା ଅବସରରେ ନନ୍ଦିତା ଦାସ ଏହି ମତ ଦେଇଛନ୍ତି । ଭାରତ ଏକ ଧର୍ମନିରପେକ୍ଷ ରାଷ୍ଟ୍ର, ମାତ୍ର ବର୍ତ୍ତମାନ ଦେଶରେ ଘଟୁଥିବା ଘଟଣା ଦେଶର ଧର୍ମନିରପେକ୍ଷତା ପ୍ରତି ବିପଦ ସୃଷ୍ଟି କରୁଛି ବୋଲି ନନ୍ଦିତା କହିଛନ୍ତି । ଏହି ଆଇନ ବିପକ୍ଷରେ ଦେଶବାସୀ ଏକତ୍ର ହୋଇ ପ୍ରତିରୋଧ କରିବା ପାଇଁ ନନ୍ଦିତା ଆହ୍ବାନ ଦେଇଛନ୍ତି ।

ପତ୍ନୀ ଓ ଦୁଇ ପିଲାଙ୍କୁ ହତ୍ୟା ପରେ ଯୁବକଙ୍କ ଆତ୍ମହତ୍ୟା ଉଦ୍ୟମ

ନିଜର ପତ୍ନୀ ଏବଂ ଦୁଇ ପିଲାଙ୍କୁ ହତ୍ୟା କରିବା ପରେ ଦିଲ୍ଲୀର ଜଣେ ଯୁବକ ଆତ୍ମହତ୍ୟା ଉଦ୍ୟମ କରିଛନ୍ତି । ପରିବାର ସଦସ୍ୟଙ୍କୁ ହତ୍ୟା କରିବା ପରେ ଯୁବକ ଜଣକ ଟ୍ରେନ୍‌ରୁ ଡେଇଁ ଆତ୍ମହତ୍ୟା କରିବାକୁ ଉଦ୍ୟମ କରିଛନ୍ତି । ଗୁରୁତର ଭାବରେ ଆହତ ଯୁବକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ଉକ୍ତ ବ୍ୟକ୍ତିଙ୍କ ନାମ ହେଉଛି ସଞ୍ଜୟ ଅରୋରା । ସଞ୍ଜୟ ଏକ ଧାରୁଆ ଛୁରୀରେ ପତ୍ନୀ ସରିତା(45), ଝିଅ ସାଞ୍ଚି(20) ଏବଂ 15 ବର୍ଷୀୟ ପୁଅ ଅର୍ଜୁନ୍‌କୁ ହତ୍ୟା କରିଥିଲେ । ପଞ୍ଚକୁଲାର ସେକ୍ଟର 9ରେ ସଞ୍ଜୟ ଏକ ବେକରୀ ଚଳାନ୍ତି ।

ଭାରତୀୟ ବଜାରରେ ଲଞ୍ଚ ହେଲା ଏମ୍‌ଜିର ଇଲେକ୍ଟ୍ରିକ୍‌ ଏସ୍‌ୟୁଭି କାର୍‌

ମୋରିସ୍‌ ଗ୍ୟାରେଜ୍‌ର ନୂତନ ଇଲେକ୍ଟ୍ରିକ୍‌ ଏସ୍‌ୟୁଭି କାର୍‌ ଲଞ୍ଚ କରାଯାଇଛି । ଏହି କାର୍‌ଟିର ନାମ ଜେଡ୍‌ ଏସ୍‌ ଇଭି ରଖାଯାଇଛି । ଗୁରୁବାର ଦିନ ଏମ୍‌ଜି ପକ୍ଷରୁ ଏହି ନୂତନ କାର ଲଞ୍ଚ କରାଯାଇଛି । କାରଟିର ମୂଲ୍ୟ 19.88 ଲକ୍ଷ ଟଙ୍କା ରହିଥିବା ବେଳେ ଏକ୍ସକ୍ଲ୍ୟୁସିଭ୍‌ ମଡେଲର ମୂଲ୍ୟ 23.58 ଲକ୍ଷ ଟଙ୍କା ରହିଛି । ପ୍ରଥମ ଥର ପାଇଁ ଏହି କାର୍‌ର ବ୍ୟାଟେରୀରେ ନୂତନ ବୈଷୟିକ କୌଶଳର ବ୍ୟବହାର କରାଯାଇଛି । ବ୍ୟାଟେରୀ ଉପରେ 8 ବର୍ଷର ଓ୍ବାରେଣ୍ଟୀ ସହିତ ଦେଢ ଲକ୍ଷ କିମିର ଯାତ୍ରା ଉପରେ ମଧ୍ୟ ଓ୍ବାରେଣ୍ଟୀ ପ୍ରଦାନ କରାଯାଇଛି ।

ନିର୍ଭୟା ମାମଲା : ପଟିଆଲା ହାଉସ୍‌ ବିଚାରପତିଙ୍କୁ ସୁପ୍ରିମକୋର୍ଟକୁ ବଦଳି

ନିର୍ଭୟା ଗଣଦୁଷ୍କର୍ମ ମାମଲାରେ ରହିଥିବା ବିଚାରପତିଙ୍କୁ ସୁପ୍ରିମକୋର୍ଟଙ୍କ ବଦଳି କରାଯାଇଛି ।2012 ନିର୍ଭୟା ଗଣଦୁଷ୍କର୍ମ ମାମଲାରେ ଦୋଷୀଙ୍କୁ ଫାଶୀ ଦଣ୍ଡ ଶୁଣାଇଥିବା ବିଚାରପତି ସତୀଶ କୁମାର ଅରୋରାଙ୍କୁ ସୁପ୍ରିମକୋର୍ଟଙ୍କୁ ବଦଳି କରାଯାଇଛି । ଆସନ୍ତା ଏକ ବର୍ଷ ପାଇଁ ଅରୋରାଙ୍କୁ ଡେପୁଟେସନରେ ସର୍ବୋଚ୍ଚ କୋର୍ଟକୁ ପଠାଯାଇଛି । ଦିଲ୍ଲୀ ହାଇକୋର୍ଟରୁ ପଟିଆଲା ହାଉସ୍‌ କୋର୍ଟକୁ ପ୍ରଦାନ କରାଯାଇଥିବା ଚିଠିରେ ସେସନ୍ସ କୋର୍ଟ ବିଚାରପତି ଅରୋରାଙ୍କୁ ବଦଳି କରିବା ପାଇଁ ନିର୍ଦ୍ଦେଶ ଦିଆଯାଇଛି ।

ୟେମେନ୍‌ ଉପରେ ହାଉଥି ଗୋଷ୍ଠୀଙ୍କ କ୍ଷେପଣାସ୍ତ୍ର ମାଡ : 2 ମୃତ, 50ରୁ ଅଧିକ ଆହତ

ୟେମେନ୍‌ ଉପରେ ହାଉଥି ଆତଙ୍କୀ ଗୋଷ୍ଠୀଙ୍କ ପକ୍ଷରୁ ପୁନର୍ବାର କ୍ଷେପଣାସ୍ତ୍ର ମାଡ କରାଯାଇଛି ।ଶୁକ୍ରବାର ସଙ୍ଗଠିତ ଆକ୍ରମଣରେ 70ରୁ ଅଧିକ ସୈନ୍ୟ ନିହତ ହୋଇଥିବା ବେଳେ ବୁଧବାର ଦିନ ପୁନର୍ବାର ଆକ୍ରମଣ କରାଯାଇଛି । ବୁଧବାର ବିଳମ୍ବିତ ରାତିରେ କରାଯାଇଥିବା କ୍ଷେପଣାସ୍ତ୍ର ଆକ୍ରମଣରେ 2 ଜଣଙ୍କ ପ୍ରାଣହାନି ଘଟିଥିବା ବେଳେ 50ରୁ ଅଧିକ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ଜଣେ ମହିଳା ଏବଂ ଶିଶୁ ରହିଥିବା ବେଳେ ଆହତଙ୍କ ମଧ୍ୟରେ 6 ଜଣ ଶିଶୁ ରହିଛନ୍ତି ।

ଅଷ୍ଟ୍ରେଲିଆନ୍‌ ଓପନ୍‌ରୁ ଓହରିଲେ ସାନିଆ

ଭାରତୀୟ ଟେନିସ୍‌ ଷ୍ଟାର ସାନିଆ ମିର୍ଜା ଅଷ୍ଟ୍ରେଲିଆନ୍‌ ଓପନ୍‌ରୁ ଓହରି ଯାଇଛନ୍ତି । ଆଘାତ ଜନିତ ସମସ୍ୟା କାରଣରୁ ସାନିଆ ମହିଳା ଯୁଗଳ ବର୍ଗରୁ ଓହରିଛନ୍ତି । ଗତକାଲି ମିକ୍ସଡ୍‌ ଡବଲ୍ସରୁ ଓହରିଥିବା ସାନିଆ ଯୁଗଳ ବର୍ଗ ମ୍ୟାଚ୍‌ ଅଧାରୁ ଓହରି ଯାଇଥିଲେ । ପ୍ରଥମ ରାଉଣ୍ଡରେ ସାନିଆ ଏବଂ ୟୁକ୍ରେନ୍‌ର ନାଦିଆ କିଚେନକ୍‌ଙ୍କ ଯୋଡି 2-6ରେ ପଛୁଆ ରହିଥିବା ବେଳେ ଆଘାତ ସମସ୍ୟା କାରଣରୁ ସାନିଆ ଓହରି ଯାଇଥିଲେ । ଆଘାତ କାରଣରୁ ପ୍ରଥମେ ମିକ୍ସଡ୍‌ ଡବଲ୍ସରୁ ସାନିଆ ଓହରିଥିବା ବେଳେ ଆଜି ମହିଳା ଡବଲ୍ସରୁ ଓହରିବା ସହିତ ଅଷ୍ଟ୍ରେଲିଆ ଓପନ୍‌ ଅଭିଯାନ ଶେଷ ହୋଇଛି ।

ଐତିହ୍ୟ ସୁରକ୍ଷା ନେଇ ପୁରୀରେ ମିନି ମାରାଥନ

ପୁରୀଠାରେ ଏକ ମିନି ମାରଥାନ ଆରମ୍ଭ ହୋଇଯାଇଛି। ଏହି ମାରାଥନ କାର୍ଯ୍ୟକ୍ରମରେ କ୍ରୀଡାମନ୍ତ୍ରୀ ତୁଷାରକାନ୍ତି ବେହେରା ଓ ବିଧାୟକ ଜୟନ୍ତ ଷଡଙ୍ଗୀ ପ୍ରମୁଖ ଉପସ୍ଥିତ ରହିଥିଲେ ।  ଏନ୍‌ଡିଆରଏଫ୍‌, ଓଏସ୍‌ଡିଏମ୍‌ଏ ଓ ଜିଲ୍ଲା ପ୍ରଶାସନର ମିଳିତ ଉଦ୍ୟମରେ ମିନି ମାରାଥନ ଅନୁଷ୍ଠିତ ହୋଇଯାଇଛି । ପ୍ରାକୃତିକ ବିପର୍ଯ୍ୟୟ ବେଳେ ଐତିହ୍ୟର ସୁରକ୍ଷା ବାର୍ତ୍ତା ନେଇ ଏହି ମାରାଥନ ଆୟୋଜନ କରାଯାଇଥିଲା । ଇଣ୍ଡୋର ଷ୍ଟାଡିୟମ୍‌ଠାରୁ ମଙ୍ଗଳା ନଦୀ ମୁହାଣ ପର୍ଯ୍ୟନ୍ତ ମିନି ମାରାଥନ କରାଯାଇଥିଲା । ପ୍ରାୟ ତିନି ହଜାର ପ୍ରତିଯୋଗୀ ଏହି ମାରାଥନ୍‌ରେ ସାମିଲ୍‌ ହୋଇଥିଲେ ।

ଜମ୍ମୁକାଶ୍ମୀର ପାଇଁ ୮୦ ହଜାର କୋଟି ଟଙ୍କାର ପ୍ୟାକେଜ୍‌ ଘୋଷଣା

ମୋଦି ସରକାର ଜମ୍ମୁ ଓ କଶ୍ମୀର ଲାଗି ୮୦, ୦୦୦ କୋଟି ଟଙ୍କାର ପ୍ୟାକେଜ ଘୋଷଣା କରିଛନ୍ତି। ବୁଧବାର ଦିନ କାଶ୍ମୀର ବିକାଶ ପାଇଁ ଏହି ମଞ୍ଜୁରି ଦିଆଯାଇଥିବାର ମାନବ ସମ୍ବଳ ବିକାଶ ସୂଚନା ଦେଇଛି । କେନ୍ଦ୍ର ସରକାରଙ୍କ କିଛି ମନ୍ତ୍ରୀ କାଶ୍ମୀର ଗସ୍ତରେ ରହିଛନ୍ତି । ନିକଟରେ ପିୟୁଷ ଗୋଏଲ ଓ ସ୍ମୁତି ଇରାନୀ ସମେତ ଅନେକ ମନ୍ତ୍ରୀ ଉପତ୍ୟକା ଗସ୍ତ କରି ବିକାଶମୂଳକ କାମର ସ୍ଥିତି କୁ ନେଇ ସମୀକ୍ଷା କରିଥିଲେ । ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଗଠିତ କ୍ୟାବିନେଟ୍‌ ବୈଠକରେ କାଶ୍ମୀର ସମ୍ପର୍କରେ ପ୍ରତିକ୍ରିୟା ସଂଗ୍ରହ କରାଯାଇ କାଶ୍ମୀରର ବିକାଶ ପାଇଁ ଏହି ଘୋଷଣା କରାଯାଇଛି ।

ଏକତ୍ର ନଜର ଆସିବେ ଡ୍ବେନ୍‌ ଜନସନ୍‌, ଗାଲ୍‌ ଗାଡୋଟ୍‌ ଏବଂ ରାନ୍‌ ରୋନାଲ୍ଡସ

ହଲିଉଡ୍‌ର ତିନି ସୁପରଷ୍ଟାର ଡ୍ବେନ୍‌ ଜନସନ୍‌, ଗାଲ୍‌ ଗାଡୋଟ୍‌ ଏବଂ ରାନ୍‌ ରୋନାଲ୍ଡସ ଏକତ୍ର ନଜର ଆସିବାକୁ ଯାଉଛନ୍ତି । ତିନି ଜଣଙ୍କ ଅଭିନୀତ ନେଟ୍‌ଫ୍ଲିକ୍ସ ଫିଲ୍ମ ରେଡ୍‌ ନୋଟିସ୍‌ର ସୁଟିଂ ମଙ୍ଗଳବାର ଆରମ୍ଭ ହୋଇଛି । ରକ୍‌ ବା ଅଭିନେତା ଡ୍ବେନ୍‌ ଜନ୍‌ସନ୍‌ ଫିଲ୍ମ ସୁଟିଂ ହେଇଥିବା ନେଇ ଏକ ଭିଡିଓ ଇନଷ୍ଟାଗ୍ରାମରେ ସେୟାର କରିଛନ୍ତି । ଭିଡିଓରେ ଡ୍ବେନ୍‌ ଜନସନ୍‌, ଗାଲ୍‌ ଗାଡୋଟ୍‌ ଏବଂ ରାନ୍‌ ରୋନାଲ୍ଡସ ଇଣ୍ଟରପୋଲ ଅଧିକାରୀ ଭାବରେ କାର୍ଯ୍ୟ କରୁଥିବାର ନଜର ଆସିଛନ୍ତି । ଇଣ୍ଟରପୋଲ ପକ୍ଷରୁ ଜାରି କରାଯାଉଥିବା ରେଡ କର୍ଣ୍ଣର ନୋଟିସ୍‌ ଉପରେ ଫିଲ୍ମଟି ପର୍ଯ୍ୟବେସିତ ।

ପାକିସ୍ତାନରେ ଯୌନ ଅପରାଧ ବୃଦ୍ଧି ପାଇଁ ବଲିଉଡ୍‌କୁ ଦାୟୀ କଲେ ଇମ୍ରାନ ଖାନ୍‌

ପାକିସ୍ତାନରେ ଯୌନ ଅପରାଧ ବୃଦ୍ଧି ପାଇଁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍‌ ଖାନ୍‌ ବଲିଉଡ୍‌କୁ ଦାୟୀ କରିଛନ୍ତି । ଜଣେ ୟୁଟ୍ୟୁବ୍‌ ଡେଭେଲେପର୍‌ଙ୍କୁ ନିଜର ସାକ୍ଷାତକାର ସମୟରେ ଏପରି ଦାୟିତ୍ବହୀନ ମନ୍ତବ୍ୟ ଦେଇଛନ୍ତି ଇମ୍ରାନ । ଦେଶରେ ବଢୁଥିବା ଯୌନ ଅପରାଧ ପାଇଁ ଇମ୍ରାନ କେବଳ ବଲିଉଡ୍‌ ନୁହେଁ ହଲିଉଡ୍‌କୁ ମଧ୍ୟ ଦୋଷାରୋପ କରିଛନ୍ତି । ମୋବାଇଲ୍‌ ଫୋନ୍‌ ସମସ୍ତଙ୍କ ହାତରେ ରହିଥିବାରୁ ଅଶ୍ଲୀଳ ବିଷୟବସ୍ତୁ ଥିବା ଛବି ଏବଂ ଭିଡିଓ ସମସ୍ତଙ୍କମ ହାତ ପାହାନ୍ତାରେ । ଏପରି ଭିଡିଓ ଜରିଆରେ ବଲିଉଡ୍‌ ପାକିସ୍ତାନର ଯୁବପିଢିଙ୍କୁ ନଷ୍ଟ କରୁଛି ବୋଲି ଇମ୍ରାନ ମତ ଦେଇଥିଲେ ।

ଏକ କପ୍‌ କଫିଠାରୁ କମ୍‌ ମୂଲ୍ୟରେ ମିଳୁଛି ଘର! ଜାଣନ୍ତୁ କେଉଁଠି?

ଏକ କପ୍‌ କଫିର ମୂଲ୍ୟରେ ମିଳୁଛି ଘର । ମେଟ୍ରୋ ସହର ଗୁଡିକର ମଲ୍‌ ଗୁଡିକରେ ଏକ କପ୍‌ କଫିର ମୂଲ୍ୟ 200ରୁ 250 ଟଙ୍କା ରହିଥିବା ବେଳେ ବିଶ୍ବରେ ଏମିତି ଏକ ସହର ରହିଛି ଯେଉଁଠି ମାତ୍ର 1 ୟୁରୋରେ ଘର ମିଳୁଛି । ଭାରତୀୟ ମୁଦ୍ରାରେ ମାତ୍ର 80ରୁ 85 ଟଙ୍କାରେ ଏହି ଘର ମିଳିବ । ଇଟାଲୀର ବିସାକ୍କିଆ ସହରରେ 90ଟି ଘରକୁ ବିକ୍ରୟ ପାଇଁ ରଖାଯାଇଛି । ଏହି ସମସ୍ତ ଘରର ମୂଲ୍ୟ 1 ୟୁରୋ ଲେଖାଏଁ ରଖାଯାଇଛି । ବିସାକ୍କିଆ ସହରର କାମ୍ପାନିଆ ପର୍ବତମାଳାରେ ଏହି 90 ଘର ରହିଛି ।

ନ୍ୟୁଜିଲ୍ୟାଣ୍ଡକୁ 5 ଓ୍ବିକେଟ୍‌ରେ ପରାସ୍ତ କଲା ଭାରତ ‘ଏ’

ନ୍ୟୁଜିଲ୍ୟାଣ୍ଡ ଗସ୍ତରେ ରହିଥିବା ଭାରତୀୟ ‘ଏ’ ଦଳ କ୍ରମାଗତ ତୃତୀୟ ବିଜୟ ସହିତ ସିରିଜ୍‌ ବିଜୟୀ ହୋଇଛି । ତୃତୀୟ ମ୍ୟାଚ୍‌ରେ ଭାରତ ‘ଏ’ 5 ଓ୍ବିକେଟ୍‌ରେ ବିଜୟୀ ହେବା ସହିତ ସିରିଜ୍‌ ବିଜୟୀ ହୋଇଛି । ଭାରତୀୟ ବୋଲର ନ୍ୟୁଜିଲ୍ୟାଣ୍ଡକୁ 230 ରନ୍‌ରେ ସୀମିତ ରଖିଥିବା ବେଳେ ବ୍ୟାଟ୍ସମ୍ୟାନ୍‌ 30 ଓଭର ମଧ୍ୟରେ 5 ଓ୍ବିକେଟ ହରାଇ ଭାରତ ବିଜୟ ହାସଲ କରିଥିଲା । ଭାରତ ପକ୍ଷରୁ ମହମ୍ମଦ ସିରାଜ ସର୍ବାଧିକ 3ଟି ଓ୍ବିକେଟ ହାସଲ କରିଥିବା ବେଳେ ଅକ୍ଷର ପଟେଲ ଏବଂ ଖଲୀଲ ଅହମଦ ଦୁଇଟି ଲେଖାଏଁ ଓ୍ବିକେଟ ଅକ୍ତିଆର କରିଥିଲେ ।

ପରୀକ୍ଷା ପେ ଚର୍ଚ୍ଚା ନେଇ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଲେ ଅନୀଲ କୁମ୍ବଲେ

ପରୀକ୍ଷା ପେ ଚର୍ଚ୍ଚା କାର୍ଯ୍ୟକ୍ରମକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଧନ୍ୟବାଦ ଜଣାଇଛନ୍ତି ଅନୀଲ କୁମ୍ବଲେ । ପରୀକ୍ଷା ପେ ଚର୍ଚ୍ଚା କାର୍ଯ୍ୟକ୍ରମର ଦୁଇ ଦିନ ପରେ କୁମ୍ବଲେ ମୋଦିଙ୍କୁ ଟ୍ବିଟ୍ଟର ଜରିଆରେ ଧନ୍ୟବାଦ ଜଣାଇଛନ୍ତି । ମୋଦି ପରୀକ୍ଷା ପେ ଚର୍ଚ୍ଚା କାର୍ଯ୍ୟକ୍ରମ ସମୟରେ ହନୁହାଡ ଭାଙ୍ଗିଥିବା ସତ୍ତ୍ବେ କୁମ୍ବଲେ ବୋଲିଂ କରିଥିବା ଘଟଣାର ଉଦାହରଣ ଦେଇଥିଲେ । ଏକ ଟ୍ବିଟ୍‌ କରି ଛାତ୍ରଛାତ୍ରୀଙ୍କୁ ଶୁଭେଚ୍ଛା ଜଣାଇବା ସହିତ ପରୀକ୍ଷା ପେ ଚର୍ଚ୍ଚାରେ ତାଙ୍କ ନାମ ନେଇଥିବାରୁ କୁମ୍ବଲେ ମୋଦିଙ୍କୁ ଧନ୍ୟବାଦ ଜ୍ଞାପନ କରିଥିଲେ ।

ମନୁଷ୍ୟ ପୂର୍ବରୁ ମହାକାଶକୁ ରୋବୋଟ୍‌ ପଠାଇବ ଇସ୍ରୋ

2022ରେ ଇସ୍ରୋର ମାନବ ମିଶନ ପୂର୍ବରୁ ଇସ୍ରୋ ଏକ ରୋବୋଟ୍‌ ପଠାଇବାକୁ ଯାଉଛି । ଏହି ମିଶନ ପୂର୍ବରୁ 2020 ମସିହାର ଶେଷ ଭାଗକୁ ଏହି ମିଶନ ଲଞ୍ଚ ହେବାକୁ ଯାଉଛି । ବୁଧବାର ଇସ୍ରୋ ପକ୍ଷରୁ ଏହି ରୋବୋଟ୍‌ର ଏକ ଫଟୋ ଜାରି କରାଯାଇଛି । ମାନବ ଜୀବନ ଅତ୍ୟନ୍ତ ଗୁରୁତ୍ବପୂର୍ଣ୍ଣ ତେଣୁ ମାନବ ପ୍ରେରଣ ପୂର୍ବରୁ ଏକ ରୋବୋଟ୍‌ ପଠାଇ ଏହାକୁ ଫେରାଇ ଆଣିବା ପାଇଁ ଇସ୍ରୋ ପକ୍ଷରୁ ଏହି ମିଶନ କରାଯାଇଛି । ଏହି ରୋବୋଟ୍‌ ଜଣେ ମହିଳା ହ୍ୟୁମାନଏଡ୍‌ । ଏହି ରୋବୋଟ୍‌ର ନାମ ବ୍ୟୋମ ମିତ୍ର ରଖାଯାଇଛି ।

ପାରିବାରିକ କଳହର କରୁଣ ପରିଣତି : ସ୍ବାମୀକୁ ଛୁରୀ ଭୁସି ହତ୍ୟା କଲା ସ୍ତ୍ରୀ

ପାରିବାରିକ କଳହର କରୁଣ ପରିଣତି ଦେଖିବାକୁ ମିଳିଛି ମାଲକାନଗିରି ଅଞ୍ଚଳରେ । ମାଲକାନଗିରିର ଆପନମାଲା ଅଞ୍ଚରେ ଏହି ଘଟଣା ଘଟିଥିବା ଜଣାପଡିଛି । ଘରୋଇ କଳହ କାରଣରୁ ସ୍ବାମୀକୁ ଛୁରୀ ଭୁସି ହତ୍ୟା କରିଛି ସ୍ତ୍ରୀ । ଏହି ହତ୍ୟାକାଣ୍ଡ ନେଇ ବାଲିମେଳା ଥାନାରେ ଏକ ମାମଲା ରୁଜୁ କରାଯାଇଛି । ହତ୍ୟାକାଣ୍ଡର ପ୍ରକୃତ କାରଣ ଜଣାପଡିନଥିଲେ ମଧ୍ୟ ଘରୋଇ କଳହକୁ ନେଇ ସ୍ବାମୀ ଛାତିରେ ଛୁରୀ ଭୁସି ହତ୍ୟା କରିଥିବା ଅନୁମାନ କରାଯାଉଛି । ଅଭିଯୁକ୍ତକୁ ବାଲିମେଳା ଥାନାରେ ଅଟକ ରଖି ପୁଲିସ୍‌ ପଚରାଉଚୁରା କରୁଛି ।

ଏଥର ଶସ୍ତାରେ ମିଳିବ ପ୍ରିମିୟମ୍‌ ହ୍ୟାଚ୍‌ବ୍ୟାକ୍‌ କାର୍‌!

ଅଟୋ ଏକ୍ସପୋ 2020ର ଏକ ସପ୍ତାହ ପୂର୍ବରୁ ଭାରତୀୟ ବଜାରରେ ଲଞ୍ଚ ହେବାକୁ ଯାଉଛି ଶସ୍ତା ପ୍ରିମିୟମ୍‌ ହ୍ୟାଚ୍‌ ବ୍ୟାକ୍‌ କାର । ମାତ୍ର 5 ଲକ୍ଷ ଟଙ୍କାରେ ଟାଟା ପକ୍ଷରୁ ଏହି କାରଟିକୁ ଭାରତୀୟ ବଜାରରେ ଲଞ୍ଚ କରାଯାଇଛି । ଟାଟା ଅଲଟ୍ରୋଜ୍‌ ନାମକ ଏହି କାର୍‌ଟି ପ୍ରିମିୟମ୍‌ ହ୍ୟାଚ୍‌ବ୍ୟାକ୍‌ ବର୍ଗର ବୋଲି ଟାଟା ପକ୍ଷରୁ ଘୋଷଣା କରାଯାଇଛି । କାର୍‌ଟିରେ ପ୍ରଥମ ଥର ପାଇଁ ଆଲ୍ଫା ମଡ୍ୟୁଲାର ପ୍ଲାଟଫର୍ମ (ଏଏମ୍‌ପି) ରହିଥିବା ଜଣାପଡିଛି । କାର୍‌ଟିର ସର୍ବନିମ୍ନ ମୂଲ୍ୟ 5.29 ଲକ୍ଷ ଟଙ୍କା ରହିଥିବା ବେଳେ ସର୍ବାଧିକ ମୂଲ୍ୟ 9.29 ଲକ୍ଷ ଟଙ୍କା ରହିଛି ।

4 ହଜାର କୋଟି ଠକେଇ ମାମଲା : 13ଟି ସ୍ଥାନରେ ସିବିଆଇର ଚଢାଉ

4 ହଜାର କୋଟିର ଠକେଇ ମାମଲାରେ ଉତ୍ତର ପ୍ରଦେଶ ଏବଂ ମୁମ୍ବାଇର 13ଟି ସ୍ଥାନରେ ସିବିଆଇ ପକ୍ଷରୁ ଚଢାଉ କରାଯାଇଛି । ଫ୍ରଷ୍ଟ ଇଣ୍ଟରନ୍ୟାସନାଲ୍‌ ଲିମିଟେଡ୍‌ ନାମରେ 4 ହଜାର କୋଟିର ଠକେଇ ମାମଲାକୁ ନେଇ 13ଟି ସ୍ଥାନରେ ଚଢାଉ କରାଯାଇଛି । ଦିଲ୍ଲୀ,ମୁମ୍ବାଇ ଏବଂ ୟୁପିର ମୁଖ୍ୟାଳୟ ସମେତ 13ଟି ସ୍ଥାନରେ ଏହି ଚଢାଉ କରାଯାଇଛି । ମୁମ୍ବାଇର ତିନିସ୍ଥାନରେ ଏବଂ ଦିଲ୍ଲୀର 4 ସ୍ଥାନ ବ୍ୟତିରେକ କାନପୁରର 6ଟି କାର୍ଯ୍ୟାଳୟ ଉପରେ ସିବିଆଇ ପକ୍ଷରୁ ଚଢାଉ କରାଯାଇଥିଲା । ଉଲ୍ଲେଖଯୋଗ୍ୟ ଯେ, ବ୍ୟାଙ୍କ ଅଫ୍‌ ଇଣ୍ଡିଆ ସମେତ 14ଟି ରାଷ୍ଟ୍ରାୟତ ବ୍ୟାଙ୍କରୁ 4061.17 କୋଟି ଟଙ୍କାର ଠକେଇ ଅଭିଯୋଗ ଆସିଥିଲା ।

ଅଷ୍ଟ୍ରେଲିଆନ୍‌ ଓପନ୍‌ ଦ୍ବିତୀୟ ରାଉଣ୍ଡରେ ଦ୍ବିଜ୍‌ ସରନ୍‌ : ଗୁରୁବାର ଅଭିଯାନ ଆରମ୍ଭ କରିବେ ସାନିଆ

ଅଷ୍ଟ୍ରେଲିଆନ୍‌ ଓପନ୍‌ର ଦ୍ବିତୀୟ ରାଉଣ୍ଡରେ ପ୍ରବେଶ କରିଛନ୍ତି ଦ୍ବିଜ୍‌ ସରନ୍‌ । ବୁଧବାର ବିଳମ୍ବିତ ରାତିରେ ଅନୁଷ୍ଠିତ ଯୁଗଳ ବର୍ଗର ପ୍ରଥମ ରାଉଣ୍ଡ ମ୍ୟାଚ୍‌ରେ ଦ୍ବିଜ୍‌ ସରନ ବିଜୟୀ ହୋଇଛନ୍ତି । ନ୍ୟୁଜିଲ୍ୟାଣ୍ଡର ଆର୍ଟେମ ସିଟାକ୍‌ଙ୍କ ସହିତ ଯୋଡି ହୋଇ ଖେଳୁଥିବା ଦ୍ବିଜ୍‌ 6-4 , 7-5 ସେଟ୍‌ରେ ପାବ୍ଲୋ କାରେନୋ ବୁଷ୍ଟା ଏବଂ ଜୋଆଓ ସୋଉସାଙ୍କୁ ପରାସ୍ତ କରିଥିଲେ । ଅପରପକ୍ଷରେ ଭେଟେରାନ୍‌ ଟେନିସ୍‌ ଷ୍ଟାର ସାନିଆ ମିର୍ଜା ଗୁରୁବାର ନିଜର ଅଭିଯାନ ଆରମ୍ଭ କରିବାକୁ ଯାଉଛନ୍ତି । ୟୁକ୍ରେନ୍‌ର ନାଦିଆ କିଚେନୋକ୍‌ଙ୍କ ସହିତ ଯୋଡି ହୋଇ ସାନିଆ ମ୍ୟାଚ୍‌ ଖେଳିବାକୁ ଯାଉଛନ୍ତି ।

କଟକ ଗସ୍ତରେ ଫାଇଭ୍‌ ଟି ସଚିବ

ଆଜି କଟକ ଗସ୍ତ କରିଛନ୍ତି ଫାଇଭ୍‌ ଟି ସଚିବ ଭିକେ ପାଣ୍ଡିଆନ୍‌। ଫାଇଭ୍‌ ଟି ସଚିବଙ୍କ ସମେତ ଜଳ ସମ୍ପଦ ବିଭାଗ ଉଚ୍ଚ ଅଧିକାରୀ, କଟକ ଜିଲ୍ଲାପାଳ, ପୋଲିସ କମିଶନର ଓ ଡିସିପି ମଧ୍ୟ ଉପସ୍ଥିତ ରହିଥିଲେ । ସିସୋର ପଠା, ହାଡ଼ିଆ ପଠା ଓ ନୌ ବାଣିଜ୍ୟ ସଂଗ୍ରହାଳୟ ପରିଦର୍ଶନ କରିଲେ ସମସ୍ତ ଅଧିକାରୀ। ବିଭାଗୀୟ ଅଧିକାରୀଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କଲେ ଫାଇଭ୍‌ ଟି ସଚିବ ।  ଏସସିବି ମେଡିକାଲର ଦ୍ଵିତୀୟ କ୍ୟାମ୍ପସ ରୂପରେଖ ନେଇ ୫ଟି ସଚିବ ଗସ୍ତ କରିଥିଲେ ବୋଲି ସୂଚନା ମିଳିଛି ।